ភ្នំពេញ៖ ទន្សោងញីមួយក្បាល ទម្ងន់១៥០គីឡូក្រាម ត្រូវបានជួយសង្គ្រោះបន្ទាប់ពីមានរបួសដោយសារអន្ទាក់។ បច្ចុប្បន្នសត្វនេះ កំពុងមានសុខភាពខ្សោយ និងត្រូវបានមើលថែពីគ្រូពេទ្យជំនាញ ដើម្បីឱ្យសុខភាពកាន់ប្រសើរ។
លោក សារ ថ្លៃ ប្រធានបណ្ដាញសហគមន៍ព្រៃឈើខេត្តឧត្តរមានជ័យបានប្រាប់សារព័ត៌មានThmeyThmey25ថា ទន្សោងមួយក្បាល ត្រូវបានពលរដ្ឋប្រទះឃើញដើរនៅជិតចម្ការដំឡូង នៅម៉ោងប្រមាណជាង១០ព្រឹក នៅថ្ងៃទី២២ ខែមករា និងបានជូនដំណឹងមកគណៈកម្មការសហគមន៍។ បន្ទាប់មកនៅម៉ោង១កន្លះថ្ងៃ ក្រុមការងារបានទៅឃើញ និងបញ្ជូនមកដល់ទីស្នាក់ការកណ្ដាលនៅម៉ោងជាង៣រសៀល។
លោក ថ្លៃ បញ្ជាក់ថា៖ « ពលរដ្ឋឃើញវា បែបជាឈឺជើង ទើបជូនដំណឹងមកយើង។ ពេលទៅដល់កន្លែងទន្សោងនោះ វាអស់កម្លាំងដើរមិនរួចទេ យើងបានចាំពេទ្យរបស់អង្គការ ប៉ុន្ដែដោយសារយូរពេកក៏សម្រេចចិត្តយក មកទៅទីស្នាក់ការកណ្ដាល»។
លោក ទ្រី ស៊ីថេង អ្នកសម្របសម្រួលសហគមន៍របស់អង្គការសម្ព័ន្ធមិត្តសត្វព្រៃ បានលើកឡើងថា ទន្សោងមួយក្បាលនោះ អាចជាប់អន្ទាក់យូរគួរសម។ ជើងខាងមុខទាំងពីរ នៅជាប់ចំណងខ្សែអន្ទាក់នៅឡើង ដោយរឹតដល់ឆ្អឹង។ លោកបន្ថែមថា សុខភាពសត្វមួយនេះ ប្រសើរជាងមុនដោយសារអាចស៊ីចំណីបានហើយ ( ដោយសារការបញ្ចុក)។
ស្នាមជាប់អន្ទាក់ របស់ សត្វទន្សោងញីមួយក្បាលជាប់អន្ទាក់ត្រូវបានជួយសង្គ្រោះនៅព្រៃសង្ឃរុក្ខាវ័ន។ រូបភាពដោយលោក ទ្រី ស៊ីថេង។
« យើងឃើញថា វាខ្សោយណាស់។ បើតាមសង្ឃឹមអាចមិនច្រើនទេ ប៉ុន្ដែយើងនឹងព្យាយាមជួយតាមលទ្ធភាព។តាមការមើលតាមទិដ្ឋភាព ក្រុមការងារនឹងមើលថែសិន មុនសម្រេចធ្វើអ្វីបន្ត»។ នេះជាការបញ្ជាក់របស់លោក ស៊ីថេង ដោយលោកបន្ថែមថា សត្វទន្សោងញីជាប់អន្ទាក់ចំនួនពីរគឺអន្ទាក់ខ្សែគោ និងអន្ទាក់កាប។ ជាមួយគ្នានោះវាអាចមានអាយុត្រឹមពីរឆ្នាំប៉ុណ្ណោះ។
ព្រៃសង្ឃសហគមន៍រុក្ខាវ័ន មានផ្ទៃដី ៣០២៥៤ហិកតាស្ថិតនៅស្រុកអន្លង់វែង ស្រុកចុងកាល់ ក្រុងសំរោង ខេត្តឧត្ដរមានជ័យ។ ព្រៃសហគមន៍សង្ឃរុក្ខាវ័ន បានក្លាយជាតំបន់ការពារដែនជម្រកសត្វព្រៃសង្ឃរុក្ខាវ័ននៅឆ្នាំ២០១៨។ ការណ៍នេះ ក៏ដោយសារមានការតស៊ូការពារតាំងពីឆ្នាំ២០០១ របស់អតីតព្រះសង្ឃលោក ប៊ុន សាលួត និងសមាជិកសហគមន៍ផ្សេងៗទៀតដែលស្រឡាញ់ព្រៃ និងធនធានធម្មជាតិ។ ព្រៃឈើក្នុងសហគមន៍នេះ អាចជាព្រៃចុងក្រោយនៅក្នុងខេត្តឧត្តរមានជ័យ ដែលនៅសេសសល់ព្រៃឈើ និងសត្វព្រៃប្រភេទកម្រ ដូចជាខ្ទីង ទន្សោង និងប្រភេទផ្សេងជាច្រើនទៀត៕
-
ដោយ៖ ប៉ូ សុភា
-
© រក្សាសិទ្ធិដោយ thmeythmey25.com