រដ្ឋមន្រ្តីកសិកម្ម ជ្រមុជទឹកពិនិត្យតំបន់អភិរក្សស្មៅសមុទ្រដោយផ្ទាល់ នៅកោះអាចម៍សេះ
ភ្នំពេញ៖ លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងលោក សោម ពិសិដ្ឋ អភិបាលខេត្តកែប បានចុះជ្រមុជទឹកពិនិត្យមើលតំបន់អភិរក្សស្មៅសមុទ្រ នៅតំបន់កោះអាចម៍សេះ ក្នុងភូមិសាស្រ្តខេត្តកែប។ បើតាមក្រសួងកសិកម្ម តំបន់កោះអាចម៍សេះ សម្បូរទៅដោយស្មៅសមុទ្រ ដែលជាប្រភពនៃប្រព័ន្ធអេកូឡូស៊ី សម្រាប់ពពួកសត្វគ្រប់ប្រភេទ។
នៅថ្ងៃទី១៨ ខែមេសា លោក ឌិត ទីណា និងលោក សោម ពិសិដ្ឋ រួមទាំងមន្រ្តីជលផល បានធ្វើដំណើរទៅកាន់កោះអាចម៍សេះ ស្ថិតក្នុងភូមិសាស្ត្រខេត្តកែប។ ការធ្វើដំណើរទៅកាន់កោះអាចម៍សេះនេះ ដើម្បីត្រួតពិនិត្យអំពីវឌ្ឍនភាពនៃការងារអភិរក្សធនធានជលផល និងប្រព័ន្ធជីវចម្រុះបាតសមុទ្រ របស់អង្គការអភិរក្សធនធានសមុទ្រកម្ពុជា MCC។
រូបភាពពីហ្វេសប៊ុកក្រសួងកសិកម្ម
តំបន់អភិរក្សនៅតំបន់កោះអាចម៍សេះ សម្បូរទៅដោយស្មៅសមុទ្រ។ លើសពីនេះ ស្មៅសមុទ្រដែលលូតលាស់ល្អ បង្កើតបានជាប្រព័ន្ធអេកូឡូស៊ី សម្រាប់ពពួកសត្វគ្រប់ប្រភេទ ជាពិសេសសត្វជ្រូកទឹកដែលចាប់ផ្ដើមលេចមុខឡើងវិញនៅតំបន់នេះ។
លោក ឌិត ទីណា រដ្ឋមន្រ្តីក្រសួងកសិកម្ម លើកឡើងថា ការងាររបស់អង្គការអភិរក្សធនធានសមុទ្រកម្ពុជា សហការជាមួយរដ្ឋបាលជលផល បានរួមចំណែកជួយស្ដារឡើងវិញនូវធនធានជលផល និងប្រព័ន្ធជីវចម្រុះបាតសមុទ្រ។ រដ្ឋមន្រ្តីកសិកម្មរូបនេះ ក៏បានជំរុញឱ្យអង្គការ MCC បន្តអនុវត្តការងាររបស់ខ្លួន ឱ្យ មានប្រសិទ្ធភាព និងត្រូវសហការឱ្យបានជិតស្និទ្ធជាមួយរដ្ឋបាលជលផល និងអាជ្ញាធរមូលដ្ឋាន។
រូបភាពពីហ្វេសប៊ុកក្រសួងកសិកម្ម
ជាមួយគ្នានេះ លោក ឌិត ទីណា អំពាវនាវឱ្យសាធារណជនគ្រប់រូព ចូលរួមថែរក្សា និងអភិរក្សស្មៅសមុទ្រ ដើម្បីនិរន្ដរភាពនៃធនធានជលផល និងប្រព័ន្ធជីវចម្រុះបាតសមុទ្ររបស់កម្ពុជា។ សូមបញ្ជាក់ថា ស្មៅសមុទ្រនៅក្នុងខេត្តកែប និងកំពត មានចំនួនជាង ១២០០០ហិកតា ដែលច្រើនជាងខេត្តជាប់តំបន់សមុទ្ររបស់កម្ពុជា៕
រូបភាពថតដោយលោក ម៉េង គឹមឡុង។រូបភាពពីហ្វេសប៊ុកក្រសួងកសិកម្ម
