សៀមរាប៖ ប្រាសាទអ្នកតាវាំង ឬអ្នកស្រុកនិយមហៅថា ប្រាសាទគោកតាវាំង ជាប្រាសាទតូចមួយ ស្ថិតនៅភូមិថ្មី សង្កាត់ស្វាយដង្គំ ក្រុងសៀមរាប។ ប្រាសាទនេះ បានបែកបាក់ និងបាត់បង់រូបរាងស្ទើរទាំងស្រុងទៅហើយ ដោយសារកត្តាធម្មជាតិ អាយុកាល និងកត្តាមនុស្ស។ ក្រុមជំនាញនៃអាជ្ញាធរជាតិអប្សរា កំពុងចុះបញ្ជីថ្ម ដែលធ្លាក់រាយប៉ាយនៅជុំវិញនោះ ដើម្បីស្វែងរកថ្ម រួចសម្អាត និងរៀបផ្គុំប្រាសាទឱ្យមានរូបរាងឡើងវិញ។

 
បើតាមការរៀបរាប់របស់លោក រស់ វិសុទ្ធ មន្ត្រីអភិរក្សប្រាសាទភ្នំក្រោម  ជាងមួយខែមកហើយ ដែលក្រុមការងារ បានចុះមកទីតាំងប្រាសាទនេះ និងពិនិត្យមើលកិច្ចការមួយចំនួន ដើម្បីអភិរក្សប្រាសាទ ​ដែលរងការខូចខាត​ទ្រុឌទ្រោម​​នៅសល់តែគ្រឹះខាងក្រោម និងមានថ្មធ្លាក់រាយប៉ាយ។ លោក វិសុទ្ធ បន្ធែមថា ទីតាំងនេះ ក៏មានការរំលោភបំពានពីសំណាក់ពលរដ្ឋរស់នៅក្បែរៗនោះដែរ ដោយបានចាក់ដីលុប និងសង់សំណង់ថ្មីពីលើ។ 
 

បំណែកចម្លាក់ថ្មប្រាសាទអ្នកតាវាំង។ រូបភាពពីអាជ្ញាធរជាតិអប្សរា

លោក វិសុទ្ធ ពន្យល់ថា ក្រៅពីការងារបោសសម្អាតនៅជុំវិញបរិវេណប្រាសាទ ក្រុមជំនាញកំពុងធ្វើបច្ចុប្បន្នភាពទៅលើថ្ម ដែលនៅរាយប៉ាយទាំងអស់។ អ្នកជំនាញ ត្រូវសម្អាតថ្ម បង់លេខថ្មទើបចុះបញ្ជី ដើម្បីកំណត់ចំនួនថ្មដូចជា ថ្មមានក្បាច់ ថ្មជញ្ជាំង ថ្មសសរផ្អោប ថ្មសសរពេជ្រ និងថ្មផ្សេងទៀត ។ លោកបន្តថា ជំហានដំបូងគេត្រូវសម្រង់ថ្មណា ដែលមានក្បាច់រចនា​​ ឬរូបរាងគ្រប់គ្រាន់ មុននឹងចាប់ផ្តើមជួសជុល ឬរៀបផ្គុំថ្ម​សាកល្បង​ឡើងវិញ ទៅតាមក្រុមថ្មនីមួយៗ។ កិច្ចការបន្ទាប់ គឺស្នើសុំគោលការណ៍ថ្នាក់លើដើម្បីរៀបចំ ជួសជុលឡើងវិញ។ 
 
សូមជម្រាបថា អំឡុងឆ្នាំ១៩៧២ សាលាបារាំងចុងបូព៌ា ធ្លាប់បានមកធ្វើកំណាយស្រាវជ្រាវ ​នៅលើទីតាំងនេះម្តងរួចមកហើយ។ កាលនោះនៅកំពូលខាងលើប្រាសាទ មានសំណង់​ប្រក់ក្បឿង ដែលប្រើសម្រាប់គោរពបូជាអ្នកតា។ អាជ្ញាធរជាតិអប្សរាស្នើឱ្យពលរដ្ឋនៅជុំវិញ ត្រូវជួយថែរក្សា ការពារនិងអភិរក្ស មិនថាប្រាសាទនោះតូចឬធំឡើយ ត្រូវឈ្វេងយល់​និងផ្តល់តម្លៃ​​ដល់សំណង់បុរាណទាំងអស់ ដែលបន្សល់ទុកពីជំនាន់មុនមក៕


ថ្មរាយប៉ាយនៅជុំវិញប្រាសាទអ្នកតាវាំង។ រូបភាពពីអាជ្ញាធរជាតិអប្សរា