ដោយ៖ នាយ យ៉ាន
ភ្នំពេញ៖ សណ្ឋាគារលំដាប់ផ្កាយ៥ Raffles LE ROYAL នៅរាជធានីភ្នំពេញ បានបើកទទួលធ្វើចត្តាឡីស័កមួយ។ ជាមួយកញ្ចប់ថវិកា ២៤២៦ដុល្លារអាម៉េរិក សណ្ឋាគារនេះផ្ដល់សេវាកម្មសន្ដិសុខ វេជ្ជសាស្ត្រ និងស្នាក់នៅក្នុងបន្ទប់ទូលាយស្អាត ដែលមានបាល់កុង និងភោជនីយាហារមួយថ្ងៃបីពេល ជាមួយតែកាហ្វេទឹកសុទ្ធមួយចម្អែត និងមានបន្ទប់ ដែលធំ និងថ្លៃផងដែរ។
ដើម្បីជ្រាបច្បាស់សូមអញ្ជើញលោកអ្នកទស្សនាវីដេអូខាងក្រោមដូចតទៅ៖
ដើម្បីចូលមកទឹកដីប្រទេសកម្ពុជា តាំងពីចុងខែវិច្ឆិកា ឆ្នាំ២០២០ រាជរដ្ឋាភិបាលតម្រូវឱ្យអ្នកដំណើរពីក្រៅប្រទេស ឬជនបរទេស ធ្វើតេស្តមេរោគកូរ៉ូណា។ ប្រសិនបើលទ្ធផលវិជ្ជមាន មាននីតិវិធីយកទៅព្យាបាល។ តែបើលទ្ធផលអវិជ្ជមាន ត្រូវធ្វើចត្តាឡីស័ក រយៈពេល១៤ថ្ងៃ។ មុននឹងចេញពីមណ្ឌល ឬសណ្ឋាគារត្រូវយកសំណាកម្ដងទៀត។ បើសិនជាតេស្តមានលទ្ធផលវិជ្ជមាន មន្ត្រីក្រសួងសុខាភិបាលជូនទៅព្យាបាល។ សំរាប់ប្រជាពលរដ្ឋខ្មែរដែលចង់ធ្វើចត្តាឡីស័កនៅក្នុងសណ្ឋាគារ និងសំរាប់បរទេសគ្រប់រូប (លើកលែងតែទិដ្ឋាការ A និង B) ត្រូវបង់ប្រាក់ ២០០០ដុល្លារសហរដ្ឋអាម៉េរិក ដែលគិតទាំងសេវាដឹកជិញ្ជូនទៅកន្លែងធ្វើចត្តាឡីស័ក និងយកសំណាកពីរដង។ ពលរដ្ឋបរទេសក៏ត្រូវចំណាយជិត ១០០ដុល្លារបន្ថែមទៀត សំរាប់ធានារ៉ាប់រងដែលថ្លៃសេវាព្យាបាលក្នុងករណីដែលកើតជំងឹកូវីដ-១៩។
LE ROYAL ត្រូវបានបើកទ្វារដំបូងនៅឆ្នាំ១៩២៩ គឺជាសណ្ឋាគារចាស់ជាងគេទាំងអស់នៅ ភ្នំពេញ។ សណ្ឋាគារនេះ ត្រូវបានសាងសង់វាពីឆ្នាំ១៩២៣ ដល់ឆ្នាំ១៩២៤ ដោយមានស្ថាបត្យករសញ្ជាតិបារាំងពីររូបគឺលោក DESBOIS Jean និងលោក HÉBRARD Ernest។ សណ្ឋាគារនេះធ្លាប់ទទួលភ្ញៀវល្បីល្បាញមួយចំនួនដូចជាលោក CHAPLIN Charlie (នាយ សាឡូ) លោកស្រី KENNEDY-ONASSIS Jacqueline (ភរិយាប្រធានាធិបតីសហរដ្ឋអាម៉េរិក) និង MALRAUX André (ចោររូបចម្លាក់សម័យអង្គរ អ្នកនិព័ន្ធ និងរដ្ឋមន្ត្រី) ជាដើម។ បច្ចុប្បន្នគឺជាកម្មសិទ្ធរបស់ក្រុមហ៊ុន Raffles នៃក្រុមសម្ព័ន្ធបារាំង Accor៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com