គ្រឹះស្ថានអប់រំបណ្ដុះបណ្ដាលជំនាញវិជ្ជាជីវៈទេសចរណ៍ ចាប់បើកដំណើរការវិញហើយ
ក្រសួងទេសចរណ៍ បានអនុញ្ញាតឲ្យបើកដំណើរការឡើងវិញ គ្រឹះស្ថានអប់រំបណ្ដុះបណ្ដាលជំនាញវិជ្ជាជីវៈទេសចរណ៍ សាលាបណ្ដុះបណ្ដាលជំនាញវិជ្ជាជីវៈទេសចរណ៍ និងមជ្ឈមណ្ឌលវាយតម្លៃសមត្ថភាព ចាប់ពីថ្ងៃទី១១ ខែមករាតទៅ។ នេះបើតាមសេចក្តីជូនដំណឹងរបស់ក្រសួងទេសចរណ៍ ចុះថ្ងៃទី១១មករា។
ដ្បិតអនុញ្ញាតឲ្យដំណើរការវិញ ប៉ុន្តែដើម្បីធានាបានសុវត្ថិភាព និងប្រសិទ្ធភាពនៃការបើកដំណើរការឡើងវិញ ក្រសួងទេសចរណ៍ បានណែនាំឲ្យគ្រឹះស្ថានបណ្ដុះបណ្ដាលវិជ្ជាជីវៈទេសចរណ៍ សាលាបណ្ដុះបណ្ដាលជំនាញវិជ្ជាជីវៈទេសចរណ៍ និងមជ្ឈមណ្ឌលវាយតម្លៃសមត្ថភាពទាំងអស់ ត្រូវបន្តចូលរួមតាមដាន ផ្ដល់ព័ត៌មាន និងអនុវត្តឲ្យបានខ្ជាប់ខ្ជួននូវវិធានការទប់ស្កាត់ការរីករាលដាល ជំងឺឆ្លងកូវីដ-១៩។
មិនតែប៉ុណ្ណោះ ត្រូវសហការជាមួយមាតាបិតា អាណាព្យាបាល មន្ត្រីរាជការ គ្រូ សិក្ខាកាម និងអ្នកពាក់ព័ន្ធ ដើម្បីផ្តល់ព័ត៌មានសុខភាព និងប្រវត្តិធ្វើដំណើរក្រៅប្រទេសរបស់សិក្ខាកាម ឬសិស្ស និស្សិត។ ជាមួយគ្នានេះដែរ ក្រសួងទេសចរណ៍ណែនាំឲ្យ គ្រឹះស្ថានអប់រំបណ្ដុះបណ្ដាលជំនាញវិជ្ជាជីវៈទេសចរណ៍ សាលាបណ្ដុះបណ្ដាលជំនាញវិជ្ជាជីវៈទេសចរណ៍ និងមជ្ឈមណ្ឌលវាយតម្លៃសមត្ថភាព ត្រូវសហការជាមួយមណ្ឌលសុខភាព មន្ទីរពេទ្យបង្អែក ដើម្បីចុះពិនិត្យ និងជំរុញការអនុវត្តវិធានការអនាម័យ ការទប់ស្កាត់ និងឆ្លើយតបការរាលដាលនៃជំងឺកូវីដ-១៩។
លើសពីនេះ ស្ថាប័នបណ្តុះបណ្តាលទាំងនេះ ត្រូវដាក់លេខទូរសព្ទទាន់ហេតុការណ៍របស់ខ្លួនដើម្បីទាក់ទងក្នុងករណីចាំបាច់ ឬក្នុងករណីសង្ស័យថាអាចមានករណីឆ្លងកូវីដ-១៩ នៅស្ថាប័នណាមួយនោះ ហើយត្រូវរាយការណ៍ទៅស្ថាប័នមានសមត្ថកិច្ចជាបន្ទាន់។ក្រសួងទេសចរណ៍ណែនាំឲ្យ គ្រឹះស្ថានអប់រំបណ្ដុះបណ្ដាលជំនាញវិជ្ជាជីវៈទេសចរណ៍ សាលាបណ្ដុះបណ្ដាលជំនាញវិជ្ជាជីវៈទេសចរណ៍ និងមជ្ឈមណ្ឌលវាយតម្លៃសមត្ថភាព ត្រូវទំនាក់ទំនងទៅកាន់នាយកដ្ឋានបណ្ដុះបណ្ដាលជំនាញវិជ្ជាជីវៈទេសចរណ៍ នៃក្រសួងទេសចរណ៍ ដើម្បីបំពេញបែបបទស្នើសុំ បើកគ្រឹះស្ថានអប់រំបណ្ដុះបណ្ដាលវិជ្ជាជីវៈទេសចរណ៍ឡើងវិញ ព្រមទាំងតម្រូវឲ្យមានរបាយការណ៍ប្រចាំខែ ពីសកម្មភាពដំណើរការ និងវិធានការការពារទប់ស្កាត់ ឆ្លើយតប ការរីករាលដាលជំងឺកូវីដ-១៩ ទៀងទាត់ផងដែរ៕
