ដើមឈើ៥ដើម ត្រង់ដូចសសរ ឈរបង្អួតសម្រស់នៅកណ្ដាលព្រៃលើភ្នំត្បែង
ខេត្តព្រះវិហារ៖ ដើមឈើចំនួន ៥ដើម ដុះត្រង់ដូចជាសសរ បានឈរបង្អួតសម្រស់យ៉ាងស្រស់ស្អាតនៅកណ្ដាលព្រៃលើភ្នំត្បែង ខេត្តព្រះវិហារ។ ដើមឈើដែលមានរុក្ខជាតិបប៉្រកដុះនៅពាក់កណ្ដាលនៃដើមនេះ បានទាក់ចិត្តឲ្យភ្ញៀវទេសចរដែលធ្វើដំណើរឆ្លងកាត់ឈប់ថតរូបកម្សាន្ត និងកម្សាន្តអារម្មណ៍សប្បាយរីករាយក្រោយឃើញដើមឈើដ៏ស្រស់ត្រកាលនេះ។ ដើមឈើដុះត្រង់ដូចសសរនេះ ស្ថិតនៅលើផ្លូវដែលភ្ញៀវទេសចរឆ្លងកាត់ទៅតំបន់តាំងយូ លើភ្នំត្បែង។
សូមអញ្ជើញទស្សនាវីដេអូដើមឈើ ៥ដើម នាភ្នំត្បែង ដូចតទៅ៖
ក្នុងដំណើរកម្សាន្តជាមួយ Cambodia Amazing Trip Planner កាលពីថ្ងៃទី ១០-១២ កក្កដានេះ នាតំបន់បេតិកភណ្ឌភ្នំត្បែង ក្រុមការងារ ThmeyThmey25 រាជធានី-ខេត្ត បានផ្ដិតទិដ្ឋភាព និងព័ត៌មានពីតំបន់ទេសចរណ៍ដ៏មានសក្តានុពលនេះ ដើម្បីផ្សព្វផ្សាយដល់ភ្ញៀវទេសចរជាតិ និងអន្តរជាតិ។ តំបន់បេតិកភណ្ឌធម្មជាតិ «ភ្នំត្បែង» ពោរពេញទៅដោយធម្មជាតិស្រស់បំព្រង មានទឹកជ្រោះដ៌ត្រជាក់ ដែលភ្ញៀវទេសចរមិនគួរមើលរំលង។ លើសពីនេះ ភ្នំត្បែង ក៏ជាទីសក្ការដ៏ស័ក្ដិសិទ្ធរបស់អ្នកមានជំនឿផងដែរ។
សូមបញ្ជាក់ថា ភ្នំត្បែង ជាតំបន់បេតិកភណ្ឌធម្មជាតិ ដែលត្រូវបានរដ្ឋាភិបាលកម្ពុជាបង្កើត កាលពីថ្ងៃទី១៣ ខែកញ្ញា ឆ្នាំ២០១៦ តាមរយៈសំណើរបស់រដ្ឋមន្ត្រីក្រសួងបរិស្ថាន។ ភ្នំត្បែង មានភូមិសាស្រ្តជាប់ស្រុកចំនួនបួន គឺស្រុកសង្គមថ្មី ស្រុកគូលែន ស្រុករវៀង និងក្រុងព្រះវិហារ នៃខេត្តព្រះវិហារ៕
