ជួរភ្នំក្រវាញ ប្រែក្លាយពីតំបន់ដែលរងការបំផ្លាញមកជាតំបន់ទេសចរណ៍ដ៏មានសក្ដានុពល
កោះកុង៖ ក្រោយពីរងការបំផ្លិចបំផ្លាញធនធានធម្មជាតិដូចជាការកាប់ព្រៃឈើ និងបរបាញ់សត្វពីសកម្មភាពប្រជាជនដើម្បីផ្គត់ផ្គង់ជីវភាពរស់នៅ តំបន់ជួរភ្នំក្រវាញ បានប្រែក្លាយមកជាតំបន់ដែលមានសក្ដានុពលលើវិស័យទេសចរណ៍នាពេលបច្ចុប្បន្ន។ តាមរយៈការជំរុញ ក៏ដូចជាទប់ស្កាត់ពីក្រសួងបរិស្ថាន និងអង្គការសម្ព័ន្ធមិត្តសត្វព្រៃ តំបន់នេះមានសន្ទុះខ្លាំងលើវិស័យទេសចរណ៍ ហើយប្រជាពលរដ្ឋដែលរស់នៅទីនោះស្ទើរតែទាំងស្រុងបានចូលរួមអភិរក្ស និងបោះបង់ចោលការបំផ្លាញធម្មជាតិ ហើយងាកមកពឹងផ្អែកលើវិស័យទេសចរណ៍វិញ។
នៅក្នុងដំណើរទស្សនកិច្ចរយៈពេលពីរថ្ងៃ គឺថ្ងៃទី៩ និង១០ ខែកក្កដា ឆ្នាំ២០២០ ទៅកាន់តំបន់ជួរភ្នំក្រវាញ លោក នេត្រ ភក្រា អ្នកនាំពាក្យក្រសួងបរិស្ថានបានលើកឡើងថា ក្រសួងបរិស្ថានបានរៀបចំផែនការបង្កើនជីវភាពប្រជាសហគមន៍មូលដ្ឋាន ដែលរស់នៅក្នុងតំបន់ការពារធម្មជាតិឲ្យរីកចម្រើនឡើងវិញតាមរយៈការជំរុញឲ្យមានការបង្កើតការងារថ្មីក្នុងវិស័យទេសចរណ៍ធម្មជាតិនៅក្នុងតំបន់របស់ពួកគាត់។
តំបន់ជួរភ្នំក្រវាញមានទំហំ ១,៤លានហិកតា កន្លងមក ប្រជាជនរស់នៅតំបន់ជួរភ្នំក្រវាញ ស្ទើរតែទាំងអស់ប្រកបរបរបាញ់សត្វ និងកាប់ព្រៃឈើ ដើម្បីផ្គត់ផ្គង់ជីវភាពរបស់ពួកគាត់។ ប៉ុន្តែចាប់ពីឆ្នាំ២០០៤ អង្គការសម្ព័ន្ធមិត្តសត្វព្រៃ សហការជាមួយក្រសួងបរិសា្ថន បានទប់ស្កាត់សកម្មភាពទាំងនោះ ដោយបានបង្វែរផ្នត់គំនិតពលរដ្ឋឲ្យងាកមកស្រឡាញ់ និងចូលរួមអភិរក្សធនធានធម្មជាតិ ដែលជាចលករសំខាន់ក្នុងវិស័យទេសចរណ៍។
សូមបញ្ជាក់ថា រយៈពេល១៨ខែចុងក្រោយ គិតចាប់ពីខែមករា ឆ្នាំ២០១៩ ដល់ខែមិថុនា ឆ្នាំ២០២០នេះ ក្រុមការងារឧទ្យានុរក្ស បានធ្វើការល្បាតចំនួន៦៥៤៥លើក ក្នុងចម្ងាយ ២៤៥០០០គីឡូម៉ែត្រ។ មន្ត្រីឧទ្យានុរក្ស បានដោះអន្ទាក់ចំនួន ៣២ ៣២២ រឹបអូសរណាយន្ដបាន ១ ៩៥៤គ្រឿង រឹបអូសឈើខុសច្បាប់បានចំនួន ២ ១៧៨ ម៉ែត្រគូប ឃាត់មធ្យោបាយដឹកជញ្ជូនបាន ១០១៩ គ្រឿង និងបញ្ជូនជនសង្ស័យទៅតុលាការចំនួន ៨៧នាក់ ព្រមទាំងទប់ស្កាត់ការទន្ទ្រានយកដីរដ្ ឋបានចំនួន ១៧២ករណី។ ឧបករណ៍ខុសច្បាប់ ដែលរឹបរូសមកទាំងអស់នោះ ត្រូវបានយកមករក្សាទុកនៅស្នាក់ការល្បាតស្រែអំបិល និងស្នាក់ការល្បាតស្ទឹងព្រាត នៅឃុំជីផាត ស្រុកថ្មបាំង ខេត្តកោះកុង៕
