ភ្នំទុង និងភ្នំគុហារហ្លួងនៅខេត្តកំពត នឹងត្រូវដាក់ជាតំបន់បេតិកភណ្ឌជាតិ
ភ្នំពេញ៖ ក្រសួងបរិស្ថាន គ្រោងដាក់តំបន់ពីរនៅក្នុងខេត្តកំពត ដើម្បីបង្កើតជាតំបន់បេតិកភណ្ឌជាតិ គឺភ្នំទុង និងភ្នំគុហារហ្លួង។ បន្ទាប់ពីខេត្តកំពត ក្រសួងក៏បានពិភាក្សា និងកំណត់យកទីតាំងខេត្ត ដែលត្រូវបន្តចុះកំណត់ស្ថានីយ៍បុរាណផងដែរ។
លោកស្រី ម៉ុម ថានី រដ្ឋលេខាធិការក្រសួងបរិស្ថាន នៅក្នុងកិច្ចប្រជុំ កាលពីថ្ងៃទី ២៥ ខែមីនា ឆ្នាំ២០២០ បានពិនិត្យ និងដឹកនាំកិច្ចប្រជុំ ពិនិត្យលើសេចក្ដីព្រាងអនុក្រឹត្យ ដើម្បីកំណត់ស្ថានីយ៍ នៅតាមតំបន់ភ្នំ នៅក្នុងនិងក្រៅតំបន់ការពារធម្មជាតិ។
កិច្ចប្រជុំនោះបានផ្ដោតទៅលើ សេចក្ដីព្រាងអនុក្រឹត្យស្ដីពី ការបង្កើតតំបន់បេតិកភណ្ឌចំនួនពីរនៅខេត្តកំពតគឺ ភ្នំទុង និងភ្នំគុហារហ្លួងស្ថិតនៅភូមិសាស្ត្រខេត្តកំពត។ លើសពីនេះ នៅក្នុងកិច្ចប្រជុំនេះក៏បានផ្ដោតសំខាន់ និងបានពិភាក្សា និងកំណត់យកទីតាំងខេត្តដែលត្រូវបន្តចុះកំណត់ស្ថានីយ៍បុរាណ បន្ទាប់ពីខេត្តកំពត។
កាលពីថ្ងៃទី២០ ខែមិថុនា គណៈរដ្ឋមន្ត្រី បានអនុញ្ញាតឲ្យក្រសួងបរិស្ថានដឹកនាំ និងសម្របសម្រួលការសិក្សាកំណត់ព្រំប្រទល់ កសាងផែនទី និងរៀបចំចងក្រងសេចក្ដីព្រៀងអនុក្រឹត្យស្ដីពីតំបន់បេតិកភណ្ឌធម្មជាតិ ដែលរួមបញ្ចូល ស្ថានីយ៍បុរាណ បុរាណស្ថាន និងទីសក្ការៈបូជាទាំង១៧៣ កន្លែង និងទីតាំងដ៏ទៃទៀតដែលស្ថិតនៅតំបន់ភ្នំ នៅក្នុងនិងក្រៅតំបន់ការពារធម្នជាតិនៅក្នុងប្រទេសកម្ពុជា ដើម្បីឈានទៅដល់ការចុះបញ្ជីដីសាធារណៈរបស់រដ្ឋ៕
