កូនត្រីជាង១ម៉ឺនក្បាល ត្រូវបានប្រលែងចូលក្នុងអាងព្រៃកំពែង ខេត្តត្បូងឃ្មុំ
កូនត្រីចំនួន ១១ ០០០ ក្បាល ត្រូវបានប្រលែងចូលក្នុងអាងព្រៃកំពែង ស្ថិតក្នុងភូមិខ្ជាយ ឃុំតំបែរ ស្រុកតំបែរ ខេត្តត្បូងឃ្មុំ ដោយលោក ជាម ច័ន្ទសោភ័ណ អភិបាលខេត្តត្បូងឃ្មុំ នៅព្រឹកថ្ងៃទី ២២ ខែតុលា ឆ្នាំ២០២០។ កូនត្រីទាំងនោះ រួមមាន កូនត្រីប្រា ត្រីក្រាញ់ ត្រីកន្ធរ និងអន្ទង់ ដែលបានប្រលែង ក្នុងអាងព្រៃកំពែកដែលមានទំហំរហូតដល់១.៥ ហិកតា ក្នុងសហគមន៍ព្រៃកំពែង។
លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានប្រាប់សារព័ត៌មានThmeyThmey25 ពី មូលហេតុដែលរដ្ឋបាលខេត្តត្បូងឃ្មុំ ជ្រើសរើសអាងមួយនេះ សម្រាប់ការប្រលែងត្រីជាង ១ម៉ឺនក្បាល ដូច្នេះថា៖ « ព្រោះជាអាងមានទំហំធំផ្សាភ្ជាប់ជាមួយប្រវត្តិសាស្ត្រ ដូច្នេះរដ្ឋបាលខេត្តទុកតំបន់នេះជាកន្លែងអភិរក្ស និងទាក់ទាញទេសចរ។ ម្យ៉ាងទៀតពេលត្រីទាំងអស់នេះមានកូនអាចហូរទៅស្រែរបស់ប្រជាពលរដ្ឋនៅតំបន់ហ្នឹង។ ទីពីរ ដើម្បីទាក់ទាញទេសចរ ពេលមានត្រីអ៊ីចឹងទៅ ទេសចរគាត់អាចទៅលេង»។
ប្រធានមន្ទីរកសិកម្មរូបនេះ បន្ថែមថា សហគមន៍ព្រៃកំពែងមិនទាន់បានប្រកាសជាតំបន់ទេសចរណ៍នោះទេ។ ប៉ុន្តែក្នុងពិធីប្រលែងកូនត្រីនេះ លោកអភិបាលខេត្តត្បូងឃ្មុំបាន ដាក់ចេញផែនការរៀបចំឲ្យ តំបន់នេះក្លាយជាតំបន់ទេសចរណ៍ធម្មជាតិប្រវត្តិសាស្ត្រមួយ ព្រោះជាតំបន់ប្រវត្តិសាស្ត្រ និងមានម្លប់ឈើធំៗជាច្រើន ។
លោក ហេង ពិសិដ្ឋ ក៏បានលើកឡើងដែរថា នេះជាលើកទីមួយហើយសម្រាប់ការលែងកូនត្រីក្នុងសហគមន៍ព្រៃកំពែងនេះ។ ដោយឡែងកាលពីខែ កក្កដា ឆ្នាំ២០២០ មន្ទីរកសិកម្មក៏បាន ដាំកូនឈើក្នុងសហគមន៍នេះ ចំនួន២០០ដើមបន្ថែមលើព្រៃឈើដែលមានស្រាប់ផងដែរ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com