តើសណ្ឋានដីបែបណា ដែលសមស្របសម្រាប់ដំឡូងជ្វា?
ដំឡូងជ្វា ជាដំណាំមួយប្រភេទដែលពលរដ្ឋនិយមទទួលទាន។ វាមានអត្ថប្រយោជន៍ច្រើនទាំងមើម ដែលសម្បូរដោយ វីតាមីនអា កាបូនអ៊ីដ្រាត ជាតិម្សៅ ដែលអាចហូបជំនួសបាយបាន ហើយចំពោះទង និងស្លឹក គេអាចធ្វើជាបន្លែ និងចំណីសត្វបានទៀតផង។ ដើម្បីជាប្រយោជន៍ដល់កសិករThmeyThmey25 សូមលើកយកបច្ចេកទេសដាំដុះដំឡូងជ្វា ដែលដកស្រង់ពីឯកសាររបស់ក្រសួងកសិកម្ម រុក្ខាប្រមាញ់និងនេសាទ។
ការជ្រើសរើសដី និងរដូវដាំដុះ៖ ដីដែលសមស្របជាមួយដំណាំដំឡូងជ្វា គឺតំបន់ដីក្រហម ដីភ្នំ ជាដីខ្សាច់ ដីល្បាប់ទន្លេ ស្ទឹង និងល្បាប់ខ្សាច់។ ចំណែកដីស្រែក៏អាចដាំបានដែរ បន្ទាប់ពីប្រមូលផលរួច តែបើនៅរដូវភ្លៀងគេត្រូវដាំលើទួល។ ដោយឡែករដូវសមស្របសម្រាប់ដាំដំឡូងជ្វា គឺនៅរដូវភ្លៀង។
ការរៀបចំដី៖ ចំពោះការដាំដំឡូងជ្វា នៅលើដីស្រែដែលទើបប្រមូលផលរួច ត្រូវភ្ជួរដីចោលឲ្យបាន ២សារជាមុនសិន។ ១០ថ្ងៃបន្ទាប់ពីភ្ជួរ ត្រូវបាចជីលាមកគោរួចត្រូវភ្ជួររាស់ត្រលប់ភ្លាម និងត្រូវទុកចោលរយៈពេល ៣ថ្ងៃ។ បន្ទាប់ពីទុកចោល ៣ថ្ងៃហើយត្រូវភ្ជួរឆូតរង សម្រាប់ដាំ។ តែត្រូវចាំថាមិនត្រូវឆូតរងតូចពេកនោះទេ ព្រោះអាចឲ្យដំឡូងពិបាកក្នុងការចុះមើម។
ការជ្រើសរើសទងសម្រាប់ដាំ៖ ត្រូវជ្រើសរើសទងណា ថ្លោស និងខ្លីល្មម និងមានអាយុចាប់ពី ៤០ ទៅ ៥០ថ្ងៃ និងមានថ្នាំងញឹកល្អ។ ប្រវែងទងដែលសមស្របល្អមានប្រវែង ២០ ទៅ ៣០សង់ទីម៉ែត្រ និងមិនត្រូវយកទងណាដែលមានដុះឬសច្រើននៅតាមថ្នាំងនោះទេ ម្យ៉ាងត្រូវកាត់ស្លឹកជាប់ទងមួយចំនួន ប៉ុន្តែត្រូវទុកខ្លះ។
វិធីដាំ៖ ការដាំដំឡូងជ្វា អាស្រ័យតាមប្រភេទដី បើសិននៅតាមតំបន់មាន់ទន្លេអាចដាំពីរជួរលើរង។ តែបើដីស្រែដាំតែមួយជួរក្នុងមួយរងជាការល្អ។ ចន្លោះពីមួយដើមទៅមួយដើមមានប្រវែង ៣០ ទៅ ៥០សង់ទីម៉ែត្រ ហើយចន្លោះពីរងមួយទៅរងមួយមានប្រវែង ១ម៉ែត្រ។ ការកប់ដើមដំឡូងត្រូវកប់ដីឲ្យផ្អៀង ៤៥ ដឺក្រេ និងឲ្យចុងទងផុតពីដីមួយថ្នាំង ឬពីរថ្នាំង។
ការថែទាំ៖ ក្រោយដាំរួចត្រូវយកចំប៉ើង ស្មៅក្រៀម ឬកំប្លោកគ្របពីលើរងឲ្យជិត ដើម្បីការពារកុំឲ្យក្ដៅពេក ដែលជាហេតុឆាប់ខ្សោះទឹកក្រោមដី។ បើសិនដំឡូងល្អខ្លាំងពេកត្រូវឧស្សាហ៍បេះត្រួយ ឬត្រូវកាត់រំលែកដើមខ្លះ។ សម្រាប់ទងដៃដំឡូងមិនត្រូវឲ្យលើស ២ម៉ែត្រ និងមិនត្រូវស្រោចទឹកឲ្យជោគពេកនោះទេ។ ត្រូវសំអាតស្មៅនៅពេលដំឡូងនៅតូច និងត្រូវជ្រោយពូនជុំវិញគល់ដើម្បីឲ្យមើមចុះល្អ។ ជាញឹកញាប់ជំងឺដែលតែងតែកើតលើកំណាំដំឡូងជ្វា គឺជំងឺក្រាស៊ីស្លឹក និងជងឺមើមរលួយ។ ដោយឡែកសត្វល្អិតវិញគឺពពួកសត្វដង្កូវដំឡូងឬស គឹងដំឡូង និងចៃ។
ការប្រមូលផល៖ អាយុចាប់ពី ៩០ ទៅ ១៥០ថ្ងៃ យើងអាចប្រមូលផលបាន។ ពេលដំឡូងជ្វាជិតគ្រប់ខែប្រមូលផល គប្បីឧស្សាហ៍ឆ្កឹះគល់ឲ្យចំមើម ដើម្បីពិនិត្យមើលថាមើមដំឡូងមានគឹងស៊ីឬអត់។ បើសិន ដំឡូងដាំនៅរដូវប្រាំងមិនគួរទុកយូរនោះទេ ព្រោះអាចគឹងស៊ីមើមដំឡូង៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com