យុវជនមួយក្រុមបង្កើតកសិដ្ឋានដាំបន្លែសុវត្ថិភាព ដើម្បីបំពេញតម្រូវការទីផ្សារដល់អ្នកបរិភោគ
ភ្នំពេញ៖ យុវជនមួយក្រុមមានសមាជិក ១៥នាក់ បានសហការគ្នាបង្កើតកសិដ្ឋានមួយដាំដុះបន្លែសុវត្ថិភាព ដែលមានឈ្មោះថាកសិដ្ឋាន DMMV កាលពីឆ្នាំ២០១៩។ កញ្ញា គង់ រដ្ឋា សមាជិកកសិដ្ឋាន DMMV ប្រាប់សារព័ត៌មានThmeyThmey25 ថាកសិដ្ឋាននេះបង្កើតឡើងគោលបំណង ចូលរួមលើកកម្ពស់សុខុមាលភាព បំពេញតម្រូវការបន្លែសុវត្ថិភាពនៅក្នុងស្រុក និងកាត់បន្ថយការនាំបន្លែចូលពីក្រៅប្រទេស។
កសិដ្ឋាននេះ មានទីតាំងស្ថិតនៅភូមិព្រៃផ្ដៅ ឃុំបឹងខ្នារ ស្រុកបាកាន ខេត្តពោធិ៍សាត់ លើផ្ទៃដីទំហំកន្លះហិកតា និងដែលកំពុងដាំដុះបន្លែជាច្រើនប្រភេទ ដូចជា សាលាដស និងស្វាយ ស្ពៃ ខាត់ណាដើម ត្រប់ ននោង ត្រឡាច ម្ទេស តាសក់ ម្រះ និងបន្លែមួយចំនួនទៀត។ បន្លែទាំងនេះ ត្រូវការរយៈពេល ៣០-៤០ ថ្ងៃ ទើបអាចប្រមូលផលបាន និងទៅតាមប្រភេទនីមួយៗ។
កញ្ញា គង់ រដ្ឋា ពន្យល់បន្ថែមពីការដាំដុះបន្លែនៅកសិកដ្ឋានរបស់ខ្លួនដូច្នេះ៖«បន្លែក្នុងកសិដ្ឋាន យើង គឺយើងដាំតាមបែបសុវត្ថិភាព តាមលក្ខណៈបច្ចេកទេសកសិកម្មទំនើប ប្រើប្រាស់សារធាតុចិញ្ចឹមតាមស្តង់ដារ មិនបាញ់ថ្នាំពុល មានការពិនិត្យ និងទទួលស្គាល់ពីមន្ទីរពិសោធន៍ជប៉ុន»។
បើតាម កញ្ញា គង់ រដ្ឋា ភាគច្រើនបន្លែដែលដាំដុះនៅកសិដ្ឋានរបស់ខ្លួន ត្រូវបាននាំចេញទៅកាន់តំបន់ក្បែរនោះ និងលក់នៅបណ្ដាផ្សារបន្លែធម្មជាតិ-សុវត្ថិភាព នៅរាជធានីភ្នំពេញ។ ក្នុងមួយថ្ងៃ កសិដ្ឋាននេះ មានលទ្ធភាពអាចផ្គត់ផ្គង់បន្លែនៅលើទីផ្សារ ប្រមាណ៤០-៥០គីឡូ។
ដោយមើលឃើញពីតម្រូវការច្រើនពីអ្នកប្រើប្រាស់ កញ្ញា គង់ រដ្ឋា បានឲ្យដឹងដែរថា ក្រុមខ្លួនគ្រោងពង្រីការដាំដុះបន្ថែមទៀត ដើម្បីឈានដល់ការបំពេញនូវតម្រូវការក្នុងស្រុកឲ្យបានកាន់តែច្រើន និងអាំចនាំចេញទៅកាន់ទីផ្សារក្រៅស្រុកថែមទៀត៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com