សត្វស្វាត្រោស ១ក្បាល ដែលព្រានតាមប្រមាញ់ ត្រូវបានលែងក្នុងដែនជម្រកសត្វព្រៃកែវសីមាវិញ
ភ្នំពេញ៖ សត្វស្វាត្រោស ១ក្បាល ត្រូវបានលែងចូលទៅក្នុងព្រៃធម្មជាតិ ក្នុងភូមិសាស្ត្រដែនជម្រកសត្វព្រៃកែវសីមា បន្ទាប់ពីត្រូវបានជួយសង្គ្រោះពីការតាមប្រមាញ់នៅក្នុងខេត្តមណ្ឌលគិរី។ នេះបើតាមទំព័រហ្វេសប៊ុកក្រសួងបរិស្ថាន។
សត្វស្វាត្រោស ត្រូវបានលែងចូលទៅក្នុងព្រៃធម្មជាតិ នៅក្នុងទីតាំងភូមិសាស្ត្រដែនជម្រកសត្វព្រៃកែវសីមា កាលពីថ្ងៃទី ៣០ ខែមិថុនា ឆ្នាំ២០២០កន្លងមកនេះ ដោយមានការចូលរួមពីលោកស្រី ម៉ុម ថានី រដ្ឋលេខាធិការក្រសួងបរិស្ថាន។ សត្វស្វាត្រោសនេះ ត្រូវបានលោក ជីម ផន្នី ដែលជាប្រជាពលរដ្ឋរស់នៅក្នុងស្រុកពេជ្រាដា ខេត្តមណ្ឌលគិរី ប្រគល់ជូនក្រុមការងារអនុវត្តច្បាប់ចល័តនៃមន្ទីរបរិស្ថានខេត្តមណ្ឌលគិរី ក្រោយជួយសង្គ្រោះពីការតាមប្រមាញ់។
រូបភាពពីក្រសួងបរិស្ថាន
រដ្ឋលេខាធិការក្រសួងបរិស្ថាន លោកស្រី ម៉ុម ថានី ថ្លែងអំណរគុណ ដល់មន្ត្រីឧទ្យានុរក្ស ដែលបានសហការជាមួយមន្ត្រីល្បាតនៃអង្គការ WWF ខិតខំការពារ និងអភិរក្សធនធានធម្មជាតិសម្រាប់មនុស្សគ្រប់ជំនាន់។ លោកស្រី ម៉ុម ថានី លើកទឹកចិត្តដល់ប្រជាពលរដ្ឋចូលរួមថែរក្សា និងអភិរក្សសត្វព្រៃ ដើម្បីរក្សាការពារ និងបន្តពូជទៅថ្ងៃអនាគត៕
រូបភាពពីក្រសួងបរិស្ថាន
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com