វល្លិ៍ទឹកឃ្មុំ ជាឱសថព្យាបាលជំងឺរលាកពោះវៀន និងជំងឺផ្សេងទៀតយ៉ាងមានប្រសិទ្ធភាព
វល្លិ៍ទឹកឃ្មុំជាប្រភេទរុក្ខជាតិភ្នំ ដែលគេយកមកប្រើប្រាស់ជាឱសថ សម្រាប់ព្យាបាលនូវជំងឺបានយ៉ាងច្រើនមុខស្ទើរនឹកស្មានមិនដល់។ នេះបើតាមសៀវភៅរុក្ខជាតិឱសថរបស់ក្រសួងសុខាភិបាល។
តាមសៀវភៅរុក្ខជាតិឱសថ ដើមរបស់វាអាចយកមកប្រើប្រាស់ធ្វើជាឱសថសម្រាប់ព្យាបាលនូវជំងឺដូចជាគ្រុនផ្ដាសាយ រាករូស ធ្លាក់ឈាម ដំបៅរលួយ មូល ចុករោយ ឈឺសន្លាក់ រោកស្បែករលាកក្រពះ ដំបៅក្រពះ ប្ញសដូងបាត និងឈឺក។ ដើមរបស់វាអាចប្រើប្រាស់បានដោយយកមកហាល ឬ ប្រើប្រាស់ទាំងស្រស់តែម្ដង ដោយការយកមកដាំទឹកផឹក។
ចំណែកឯផ្ការបស់វាវិញ ក៏អាចយកប្រើប្រាស់សម្រាប់ព្យាបាលជំងឺរលាកពោះវៀន រលាកផ្លូវដង្ហើម ក្អក ហឺតហត់ ហើយទឹកហូតពីផ្ការបស់វានេះអាចអាចប្រើប្រាស់ជាថ្នាំសម្រាប់ហូបបាយបាន។
លក្ខណៈរបស់វល្លិ៍នេះវិញ វាជាប្រភេទវល្លិ៍វាឡើងរុក្ខជាតិដទៃទៀត មានមែកខ្លី ហើយមានរោមទន់ខ្លីៗពណ៌ស្ករ។ វាច្រើនដុះនៅតំបន់ភ្នំ ហើយពេលខ្លះគេក៏យកវល្លិ៍នេះមកដាំលម្អ ឬ សម្រាប់ប្រើប្រាស់ជាឱសថ។ គួរបញ្ជាក់ផងដែរថា វល្លិ៍នេះបន្តពូជដោយគ្រាប់ និងកាប់មែកដាំ។
ស្លឹករបស់វាជាស្លឹកទោលដុះដល់ទង រាងជាផ្លែលំពែងទទឹង ១,៥-៣សង់ទីម៉ែត្រ បណ្ដោយ៤-១១សង់ទីម៉ែត្រ ចុងរបស់វាស្រួចប៉ិចគល់ស្លឹករាងមូល ឬ ស្ទើរបេះដូងទ្រនុងកណ្ដាល និងគែមស្លឹកមានរោម។
ហើយផ្ការបស់វាវិញ កញ្ចុំផ្កាចេញតាមស្រគាបស្លឹក និងចុងមែក។ ផ្កាមានរាងជាបំពង់វែង រីកខាងចុងជាពីរផ្នែក មិនស្មើគ្នា មានពីរត្របកវែងងរ ត្របកលើព្រែកចុងជា៤ រីឯកេសរឈ្មោល និងកេសរញីស្ថិតនៅក្រៅត្របកផ្កា៕
(សារព័ត៌មានអនឡាញ ថ្មីៗ២៥ រាជធានី-ខេត្ត ដកស្រង់ចេញពីសៀវភៅរុក្ខជាតិឱសថរបស់ក្រសួងសុខាភិបាល)
