ខេត្តត្បូងឃ្មុំ ផលិតពោតក្រហមស្ងួតបានជាង ៥.៦ម៉ឺនតោន ក្នុងមួយឆ្នាំៗ
ភ្នំពេញ៖ ស្រុកចំនួន៤ នៅក្នុងខេត្តត្បូងឃ្មុំ ផលិតគ្រាប់ពោតក្រហមស្ងួតបានប្រមាណ ៥៦ ៧៥០តោន ក្នុងមួយឆ្នាំៗសម្រាប់នាំចេញ និងកែច្នៃទៅជាចំណីសត្វ។ ស្រុកដែលមានដាំដុះពោតក្រហម មានស្រុកក្រូចឆ្មារ, ត្បូងឃ្មុំ, មេមត់ និងស្រុកអូររាំងឪ ដែលមានផ្ទៃដីសរុប ១០ ៧៩០ ហិកតា។ នេះបើតាម លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលសរសេរនៅលើគណនីហ្វេសប៊ុកផ្ទាល់ខ្លួន។
លោក រដ្ឋមន្ត្រីក្រសួងកសិកម្ម បានឲ្យដឹងទៀតថា បច្ចុប្បន្នប្រជាកសិករក្នុងខេត្តនេះ កំពុងដាំ
ពូជពោតប្រមាណ ១០ប្រភេទផ្សេងៗគ្នា ដើម្បីឆ្លើយតបនឹងតម្រូវការទីផ្សារ។ ទន្ទឹមនឹងនោះ ប្រជាកសិករ ក៏បានងាកពីការដាំដុះបែបប្រពៃណី មកជាការដាំដុះតាមបច្ចេកទេសថ្មី ដែលបានធ្វើឲ្យទិន្នផលពោត កើនឡើងពីមួយឆ្នាំទៅមួយឆ្នាំផងដែរ។ ការដាំដុះតាមបច្ចេកទេសថ្មីមានដូចជាការជ្រើសរើសពូជ,ការប្រើប្រាស់ប្រព័ន្ធស្រោចស្រពដែលត្រូវការបរិមាណទឹកតិច,ការប្រើប្រាស់ជី និងថ្នាំ ដែលដែលឆ្លើយតបទៅនឹងការប្រែប្រួលអាកាសធាតុ។
រូបភាពពីហ្វេសប៊ុកលោក វេង សាខុន រដ្ឋមន្រ្តីក្រសួងកសិកម្ម
ដំណាំ នៅរដូវប្រាំង ប្រជាកសិករខេត្តត្បូងឃ្មុំ អាចប្រមូលផលនៅចន្លោះខែកុម្ភៈ ដល់ខែមេសា រីឯនៅរដូវស្សា វេលាប្រមូលផលក្រហម គឺនៅចន្លោះខែកក្កដា ដល់ខែកញ្ញា។ លោក វេង សាខុន បញ្ជាក់ដូច្នេះ រួចបន្តថា៖«ការប្រមូលផល ក៏ត្រូវបានផ្លាស់ប្តូរពីការប្រើប្រាស់កម្លាំងពលកម្មមនុស្សទាំងស្រុង មកប្រើម៉ាស៊ីនច្រូតពោត និងប្រឡេះគ្រាប់ពោតច្រកការ៉ុងតែម្តង ដែលចំណេញពេលវេលា ថវិកា កម្លាំងពលកម្ម និងកាត់បន្ថយការខាតបង់»។
រូបភាពពីហ្វេសប៊ុកលោក វេង សាខុន រដ្ឋមន្រ្តីក្រសួងកសិកម្ម
ជាមួយគ្នានេះដែរ ឡសម្ងួតពោតតាមលំនៅដ្ឋាន ចំនួន១៤ ត្រូវបានបង្កើតឡើងផងដែរនៅក្នុងខេត្តនេះ ដែលឡនីមួយៗ មានសមត្ថភាពសម្ងួតពោតពី ១ ៥០០ តោនទៅ ៣ ០០០ តោន ក្នុងមួយឆ្នាំ ដែលបានរួមចំណែកកាត់បន្ថយការលំបាករបស់កសិករ ជាពិសេសថ្លៃដើមផលិតបានយ៉ាងច្រើន៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com