សៀមរាប៖ «ម្ជូរកូនម៉ែ» គឺជាគ្រឿងផ្សំធ្វើម្ហូបម្យ៉ាង ស្រដៀងគ្នានឹងត្រប៉ែដំណើបស មានក្លិនប្រហើរ និងរសជាតិជូរ។ ម្ជូរកូនម៉ែនេះ ផ្សំពីបាយផ្អាប់ជាមួយមេម្ជូរកូនម៉ែ អាចយកទៅធ្វើម្ហូបបានច្រើនប្រភេទទាំងសម្ល ឆា និងទឹកជ្រលក់ជាដើម។

ដើម្បីជ្រាបច្បាស់សូមលោកអ្នកទស្សនាវីដេអូខាងក្រោម៖
«ម្ជូរកូនម៉ែ» ជាឈ្មោះដើមនៃគ្រឿងធ្វើម្ហូបមុខមានប្រភពមកពីខេត្តស្វាយរៀង។ លោក រ៉ុង បូរិន អ្នកលក់ម្ហូបទាដើមចេក ម្ជូរកូនម៉ែ នៅខេត្តសៀមរាប ពន្យល់ថា គ្រឿងធ្វើម្ហូបនេះ ផ្សំពីបាយជាមួយមេម្ជូរកូនម៉ែតូចៗ ផ្អាប់ទុករយៈពេល១សប្ដាហ៍ទៅ១០ថ្ងៃ ទើបអាចយកមកធ្វើម្ហូបបាន។ 

លោក បូរិន បញ្ជាក់ថា ការផ្សំម្ជូរកូនម៉ែឱ្យបានល្អ ត្រូវការការយកចិត្តទុកដាក់ និងអនាម័យខ្ពស់ រាប់តាំងពីការជ្រើសរើសអង្ករ ការសម្អាតអង្ករ ការផ្អាប់ ការរក្សាទុក និងភាពស៊ាំរបស់មេម្ជូរជាដើម។ ម្ជូរកូនម៉ែនេះ មានរសជាតិជូរឈ្ងុយ អាចយកមកធ្វើម្ហូបបានច្រើនប្រភេទទាំងសម្ល ឆា ជ្រក់ និងទឹកជ្រលក់ផ្សេងៗ ជំនួស សណ្ដាន់ អំពិល ឬក្រូចឆ្មា។

ចុងភៅវ័យ៣៣ឆ្នាំរូបនេះ ប្រាប់ពីរបៀបធ្វើដូច្នេះថា៖«ម្ជូរកូនម៉ែនេះ ត្រូវយកបាយដាំឆ្អិន (ដាំស្ងួត) មករោយពីលើមេម្ជូរកូនម៉ែបន្តិចម្ដងៗ។ យើងដាក់បាយចិញ្ចឹមឱ្យវាស៊ីពីក្រោមឡើងលើ ហើយបញ្ចេញត្រប៉ែ (ជាតិជូរ) សម្រាប់យកមកធ្វើម្ហូប»។ លោកបញ្ជាក់ថា មេម្ជូរ១កូនចាន អាចធ្វើម្ជូរកូនម៉ែបានប្រមាណ១៦លីត្រ។

លោក បូរិន បានមេម្ជូរកូនម៉ែ និងរបៀបធ្វើពីបងប្អូនខេត្តស្វាយរៀង ហើយយកមកច្នៃធ្វើម្ហូបលក់នៅសៀមរាប រយៈពេល៣ឆ្នាំហើយ។ ម្ហូបរបស់លោកមាន ឆាទាដើមចេក ម្ជូរកូនម៉ែ និងសម្លម្ជូរគ្រឿងទាកាប៉ាម្ជូរកូនម៉ែ។ លោក បូរិន បញ្ជាក់ថា ម្ជូរកូនម៉ែអាចទុកបានរយៈពេលខ្លី ចន្លោះពី១០ថ្ងៃ ទៅ២សប្ដាហ៍ប៉ុណ្ណោះ បន្ទាប់ពីវាជូរហើយ៕