ពីសិស្សហាត់របាំ លោក ច័ន្ទសិទ្ធិការ្យ ក្លាយជាអ្នកបន្តវេនបង្ហាត់ល្ខោនខោលដល់ក្មេង
ដោយ៖ ហេង ស្រីលីន
ផ្តើមចេញពីអ្នកហាត់រៀនផ្នែកភ្លេង និងរបាំខ្មែរបុរាណ លោក ខុន ច័ន្ទសិទ្ធិការ្យ បានក្លាយជាគ្រូបង្វឹកល្ខោនខោលដ៏ជំនាញមួយរូបនៅសាលាមធ្យមវិចិត្រសិល្បៈ។ ជិត១០ឆ្នាំមកហើយដែល លោក ច័ន្ទសិទ្ធិការ្យ បានបង្ហាត់បង្រៀនដល់កុមារកម្ពុជាក្នុងឆន្ទៈចូលរួមលើកស្ទួយវិស័យសិល្បៈបុរាណរបស់ខ្មែរ ជាពិសេសល្ខោនខោលនេះ ដែលជាបេតិកភណ្ឌវប្បធម៌អរូបីនៃមនុស្សជាតិ។
អាចនិយាយបានថា លោក ច័ន្ទសិទ្ធិការ្យ គឺដើរតាមគន្លងឪពុកម្តាយនៅក្នុងវិស័យសិល្បៈខ្មែរបុរាណ ដោយមានឪពុកជាគ្រូបង្រៀនផ្នែកតន្រ្តីករ និងម្តាយជាសិល្បការិនីផ្នែកល្ខោនបាសាក់។ ច័ន្ទសិទ្ធិការ្យ បានចាប់ចិត្តស្រឡាញ់ និងចង់ហាត់រៀនសិល្បបុរាណខ្មែរតាំងពីកុមារភាពមកម្លេះ ពោលគឺស្ថិតនៅក្នុងវ័យ១១ឆ្នាំ លោក បានចូលហាត់រៀនផ្នែកភ្លេង និងរបាំបុរាណខ្មែរ នៅសាលាមធ្យមវិចិត្រសិល្បៈ។
សកម្មភាពបង្រៀន របស់លោកគ្រូ ម៉ូ
បន្ទាប់ពីហាត់ភ្លេង និង របាំខ្មែរអស់ជាច្រើនឆ្នាំមក យុវជនដែលមានកំណើតមកពីនៅរាជធានីភ្នំពេញរូបនេះ ក៏បានបន្តរៀនសិល្បៈបុរាណខ្មែរ ដោយចាប់យកជំនាញ ល្ខោនខោល ព្រមទាំងបញ្ចប់ការសិក្សាដោយជោគជ័យ នាអំឡុងឆ្នាំ២០១១។
ស្ថិតក្នុងបរិវេណនៃសាលាមធ្យមវិចិត្រសិល្បៈ ដែលមានទីតាំងនៅតាមបណ្តោយមហាវិថីបណ្ឌិតម៉ុងឬទ្ធី(បឹងបាយ៉ាប) សង្កាត់ភ្នំពេញភ្នំពេញ ខណ្ឌសែនសុខ យើងឃើញមានសិស្សានុសិស្សមួយក្រុមកំពុងហាត់រៀនល្ខោនខោល ។ សិស្សនីមួយៗ មានភាពស្វាហាប់ តែមានកាយវិការទន់ភ្លន់ ដែលផ្តើមហាត់ពីក្បាច់បាត។ បន្ទាប់មក សិស្សក៏ត្រូវហាត់សមរាល់តួអង្គទាំងអស់ទៅតាមរឿងរាមកេរ្តិ៍ ដែលមានតួព្រះរាម ព្រះលក្សណ៍ ទូភី ឥសីពិស្វាមិត្ត ក្រុងរាពណ៍ នាងសុបនខា តួយក្ស ព្រមទាំងតួអង្គជាច្រើនទៀត។
ការហាត់សមរបស់សិស្សទាំងនោះ យើងឃើញមានគ្រូបង្វឹកមាឌក្រអាញនិងសម្បុរស្រអែមពីររូប ដោយក្នុងក៏មានវត្តលោក ខុន ច័ន្ទសិទ្ធិការ្យ ផងដែរ។ ច័ន្ទសិទ្ធិការ្យ ជាទូទៅនៅក្នុងសាលាមធ្យមវិចិត្រសិល្បៈត្រូវបានគេឈ្មោះថា ជា លោកគ្រូ ម៉ូ។
អាជីពជាគ្រូបង្ហាត់ល្ខោនខោល
លោក ខុន ច័ន្ទសិទ្ធិការ្យ សម្រេចចូលប្រឡងក្របខណ្ឌរដ្ឋ ដោយជាប់ធ្វើជាគ្រូបង្ហាត់បង្រៀនល្ខោនខោល នៅសាលាមធ្យមវិចិត្រសិល្បៈចាប់តាំងពីឆ្នាំ២០១៤ មកដល់បច្ចុប្បន្ន។ ជារៀងរាល់ថ្ងៃ លោក តែងចាប់ផ្តើមបង្ហាត់សិស្សរបស់ខ្លួនចាប់ពីម៉ោង៧ រហូតដល់ម៉ោង១១ព្រឹក។ សិស្សដែលមករៀនហាត់ល្ខោនខោលនេះ គឺមានសុទ្ធតែក្មេងប្រុសៗ ដោយភាគច្រើនពួកគេមកហាត់រៀនតាំងពីអាយុ៨ឆ្នាំ រហូតដល់អាយុ១៨ឆ្នាំ។
ក្នុងបទសម្ភាសជាមួយសារព័ត៌មានថ្មីៗ គ្រូបង្ហាត់ល្ខោនខោលវ័យ៣១ឆ្នាំរូបនេះបាននិយាយថា៖ «ការងារនេះ ជាក្តីស្រឡាញ់របស់ខ្ញុំ។ បើខ្ញុំមិនបានជួយអ្វីច្រើនដល់សង្គម យ៉ាងហោចណាស់ក៏ខ្ញុំអាចជួយក្មេងៗក្នុងការរៀននូវសិល្បៈនេះ ផងដែរ»។ លោកបន្តរៀបរាប់ថា៖ « អ្នកខ្លះចូលចិត្តយកសិល្បៈ ទៅទាញយកចំណាប់អារម្មណ៍ឱ្យគេអាណិត ប៉ុន្តែពួកយើង គឺមិនដែលធ្វើបែបនោះឡើយ។ ពួកយើង គឺយកការងារជាមោទកភាព ជាធំ និងតម្លៃជំនាញយើង»។
បច្ចុប្បន្ន មានសិល្បករវ័យក្មេងមិនក្រោមសាបសិបនាក់ឡើយ ដែលកំពុងក្រេបយកចំណេះដឹង និងស្រឡាញ់ក្នុងការហាត់រៀនល្ខោនខោលនេះពី លោក ច័ន្ទសិទ្ធិការ្យ។
ការឡើងសម្តែងរបស់ក្រុមយុវជនល្ខោនខោល
ជាសិស្សឆ្នាំទី៤ នៃសាលាមធ្យមវិចិត្រសិល្បៈផ្នែកល្ខោនខោល បានកោតសរសើរនឹងទេពកោសល្យនៃការបង្ហាត់បង្រៀនរបស់ លោក ច័ន្ទសិទ្ធិការ្យ។ យុវជនវ័យ ១៨ឆ្នាំរូបនេះ បង្ហើបថា កាលពីក្មេងរូបគេមិនស្គាល់ថាល្ខោនខោលជាអ្វីនោះឡើយ។ ក្រោយហាត់រៀនបានជិតមួយឆ្នាំជាមួយ លោក ច័ន្ទសិទ្ធិការ្យ ទើប មិថុនា ជាប់ចិត្តស្រឡាញ់ផ្នែកល្ខោនខោលនេះជាខ្លាំង។
សិល្បករវ័យក្មេងម្នាក់នេះបានបញ្ជាក់ថា៖ «ខ្ញុំបានហាត់រៀន ជាមួយគ្រូជាច្រើន ប៉ុន្តែសម្រាប់លោកគ្រូ ម៉ូ[លោក ច័ន្ទសិទ្ធិការ្យ] គាត់ជាមនុស្សច្បាស់លាស់ ហើយក៏កាចណាស់ ដែរ។ គាត់កាច ព្រោះចង់ឱ្យយើងចេះ ពេលយើងខុស គាត់ដាក់ទោសឱ្យយើងលោត ប៉ុន្តែលោតយកកម្លាំងជើង»។
កូនសិស្ស ដែលហាត់ល្ខោនខោលជាមួយលោក ខុន ច័ន្ទសិទ្ធិការ្យ ម្នាក់ៗតែងមានទឹកមុខមាំទាំ និងគោរពលោកគ្រូរបស់ខ្លួនជានិច្ច។ បើទោះការហាត់រៀន និង ហាត់សមសម្រាប់ការសម្តែងក្នុងព្រឹត្តការណ៍នានាមានភាពលំបាកយ៉ាងណាក្តី តែពួកគេហាក់មិននឿយណាយ ទៅនឹងសកម្មភាពប្រចាំថ្ងៃបែបនេះឡើយ។
ឆ្លៀតចេញសម្តែងសិល្បៈ
ក្រៅពីការបង្ហាត់បង្រៀនសិស្ស លោក ខុន ច័ន្ទសិទ្ធិការ្យ ក៏ចេញទៅសម្តែងជាមួយក្រុមការងារ ដើម្បីផ្សព្វផ្សាយអំពីសិល្បៈល្ខោនខោលនេះនៅក្នុងកម្មវិធីវប្បធម៌នានា។ រាល់ការចេញសំដែងក្នុងកម្មវិធីនីមួយៗ លោក តែងតែសំដែង ជាតួអង្គ ហនុមាន។ បើតាមយុវជនរូបនេះ កន្លងមកតាមរយៈក្រុមយុវជនល្ខោនខោល លោក បានចូលរួមសំដែងល្ខោនខោល ក្នុងកម្មវិធីផ្ទះសិល្បៈលើកទីមួយនិងទីពីរ, ការពិព័រណ៌សិល្បៈខ្មែរគ្រប់ទម្រង់ ការសំដែងសិល្បៈនារដូវវស្សាចំនួន៤លើក និងចូលរួមសំដែងនៅតាមមហាស្រព និងនៅខេត្តបណ្តាខេត្តមួយចំនួន ក្នុងកម្មវិធីពាក់ព័ន្ធនឹងវប្បធម៌។
ក្រុមការងារយុវជនល្ខោនខោលរៀបចំព្រឹត្តិការណ៍វប្បធម៌
លោក ខុន ច័ន្ទសិទ្ធិការ្យ មើលទៅហាក់មានមោទកភាព និង មានភាពរីករាយយ៉ាងខ្លាំង នៅពេលដែលខ្លួន និងក្រុមការងារបានចេញសម្តែងសិល្បៈល្ខោនខោលនេះនៅចំពោះមុខទស្សនិកជនជាតិ និងអន្តរជាតិ បើទោះការសំដែង បានកម្រៃ ឬមិនបានកម្រៃក៏ដោយ។ លោកបានបញ្ជាក់ថា៖« រាល់កម្មវិធីដែលយើងបង្កើតឡើង គឺមិនមានការបញ្ជាទិញសំបុត្រចូលទស្សនានោះឡើយ។ អ្នកចូលរួមទស្សនា គឺមានចំនួនច្រើនគួរឱ្យកត់សម្គាល់។ នេះបង្ហាញឱ្យឃើញថា សិល្បៈខ្មែរនៅតែស្ថិតក្នុងក្រអៅបេះដូងជនជាតិខ្មែរយើងជានិរន្តរ៍»។
យុវជនល្ខោនខោល
ក្រៅតែពីជាគ្រូបង្វឹកសិស្ស នៅសាលាមធ្យមវិចិត្រសិល្បៈ លោក ច័ន្ទសិទ្ធិការ្យ ក៏ជាប្រធានយុវជនល្ខោនខោល ផងដែរ។ រយៈពេល៨ឆ្នាំមកហើយ នៃការបង្កើតក្រុមយុវជននេះឡើង ដើម្បីចូលរួមផ្សព្វផ្សាយល្ខោនខោល តាមរយៈការសំដែងនៅតាមមហោស្រពនានា នៅតាមខេត្ត ជាពិសេសនៅក្នុងកម្មវិធីដែលពាក់ព័ន្ធនឹងវប្បធម៌។
«កត្តាដែលខ្ញុំសម្រេចបង្កើតយុវជនល្ខោនខោលកម្ពុជានេះឡើង គឺខ្ញុំគិតថាយើងអាចរួមគ្នា ក្រោយពេលវេលាដែលយើងសម្រាកពីធ្វើការងាររដ្ឋ។ យើងចាប់ការងារក្រៅប្រព័ន្ធ ដើម្បីធ្វើការផ្សព្វផ្សាយនូវសិល្បៈនេះឱ្យបានកាន់តែច្រើន»។ នេះជាការរៀបរាប់របស់លោក ច័ន្ទសិទ្ធិការ្យ ដោយសង្ឃឹម ថា ទៅថ្ងៃមុន មិនថាក្រុមយុវជនល្ខោនខោលកម្ពុជា ឬមិនថាសាលាមធ្យមវិចិត្រសិល្បៈទេ គឺអ្នកទាំងអស់គ្នាដែលធ្វើការលើជំនាញសិល្បៈ នឹងខិតខំបង្កើតកម្មវិធីសិល្បៈសំដែងផ្សេងៗតូច-ធំ ឱ្យបានច្រើន ដើម្បីផ្សព្វផ្សាយសិល្បៈទាំងបុរាណ និងវប្បធម៌ ទៅកាន់ទស្សនិកជនក្នុងការស្វែងយល់បន្ថែម។
ក្រុមយុវជនល្ខោនខោលកម្ពុជា
លោក ច័ន្ទសិទ្ធិការ្យ បន្តនិយាយយ៉ាងដូច្នេះ៖ «ខ្ញុំរីករាយ និងពេញចិត្តនូវជំនាញរបស់ខ្ញុំ ហើយកាន់តែពិសេស ខ្ញុំគឺជាផ្នែកមួយនៃវប្បធម៌របស់យើង»។
សម្រាប់យុវជនរូបនេះ ក្នុងនាមជាប្រតិបត្តិករ និងជាគ្រូបង្ហាត់ល្ខោនខោលផ្ទាល់ លោកនៅតែបន្តរក្សា និងបង្ហាត់ដល់ក្មេងជំនាន់ក្រោយឱ្យអស់ពីកម្លាំងកាយចិត្ត។ បើទោះវាមានភាពលំបាកយ៉ាងណាក្តី ក៏លោកមិនដែលមានគំនិតចង់បោះបង់ល្ខោនខោលចោលឡើយ។ លោក ខុន ច័ន្ទសិទ្ធិការ្យ តែងរំពឹងជានិច្ច ចំពោះក្មេងជំនាន់ក្រោយ ក៏ដូចជាយុវជន ត្រូវតែរក្សាជំហរបស់ខ្លួនក្នុងការថែរក្សាសម្បត្តិវប្បធម៌ជាតិ បើទោះជាការសំដែងនោះតូច ឬធំក៏ដោយ សិល្បករត្រូវតែខិតខំ នូវអ្វីដែលខ្លួនបានចាប់ផ្តើមពីចំណុចសូន្យមក៕
សកម្មភាពហាត់សមល្ខោនខោល របស់សិស្សសាលាមធ្យមវិចិត្រសិល្បៈ (រូបភាព ៖ លោក ខុន ច័ន្ទសិទ្ធិការ្យ)
រូបភាព៖ ពី សិស្សហាត់របាំ លោក ច័ន្ទសិទ្ធិការ្យ ក្លាយជាអ្នកបន្តវេនបង្ហាត់ល្ខោនខោលដល់ក្មេង
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com