ក្រសួងពាណិជ្ជកម្ម នឹងរៀបចំពិព័រណ៍ផលិតផលខ្មែរនាខែវិច្ឆិកាខាងមុខ នៅខេត្តមណ្ឌលគិរី, រតនគិរី និងព្រះវិហារ ដើម្បីលើកកម្ពស់ផលិតផលក្នុងស្រុក
ភ្នំពេញ៖ ដើម្បីជួយជំរុញ និងលើកកម្ពស់ផលិតក្នុងស្រុកឲ្យមានការទទួលស្គាល់ និងចូលរួមប្រើប្រាស់កាន់តែទូលំទូលាយទូទាំងប្រទេសក្រសួងពាណិជ្ជកម្ម នឹងរៀបចំ «ពិព័រណ៍ផលិតផលខ្មែរ ក្នុងឱកាសយុទ្ធនាការទិញផលិតផលខ្មែរ» នៅខេត្តមណ្ឌលគិរី, រតនគិរី និងខេត្តព្រះវិហារ។ នេះបើតាមក្រសេចក្តីជូនដំណឹងក្រសួងពាណិជ្ជកម្ម។
សេចក្ដីជូនដំណឹងរបស់ក្រសួងពាណិជ្ជកម្ម បញ្ជាក់ថា ការបង្កើតពិព័រណ៍នេះ ដើម្បីតភ្ជាប់ទំនាក់ទំនងសេដ្ឋកិច្ចគ្រប់ប្រព័ន្ធរវាងរាជធានី-ខេត្តទូទាំងប្រទេស និងដើម្បីរួមចំណែកដល់ដំណើរការអភិវឌ្ឈន៍សេដ្ឋកិច្ចជាតិឡើងវិញ បន្ទាប់ពីជួបវិបត្តិកូវីដ-១៩។ ក្រសួងពាណិជ្ជកម្ម នឹងប្រមូលកៀរគរផលិតផលខ្មែរដែលមានគុណភាពខ្ពស់ សុវត្ថិភាពសម្រាប់អ្នកប្រើប្រាស់ និងមានការវេចខ្ចប់បានល្អត្រឹមត្រូវ អនុលោមតាមស្តង់ដារផលិតកម្មពីគ្រប់ទិសទីនៅទូទាំងប្រទេសមកដាក់តាំងបង្ហាញ និងស្វែងរកដៃគូរយកទៅលក់បន្ត។
ពិព័រណ៍ផលិតផលខ្មែរនេះ រៀបចំចាប់ពីថ្ងៃទី ០៥-០៨ ខែវិច្ឆិកា នាក្រុងសែនមនោរម្យ ខេត្តមណ្ឌលគិរី។ ចំណែក ខេត្តរតនគិរី ចាប់ពីថ្ងៃទី០៦-០៩ ខែវិច្ឆិកា នាក្រុងបានលុង និងខេត្តព្រះវិហារចាប់ពីថ្ងៃទី២៣-២៦ ខែវិច្ឆិកា នាក្រុងព្រះវិហារ។ បើតាមក្រសួងពាណិជ្ជកម្ម ការរៀបចំពិព័រណ៍នេះ នឹងគោរពតាមការណែនាំរបស់ក្រសួងសុខាភិបាល ក្នុងការការពារអនាម័យ ដើម្បីប្រយុទ្ធប្រឆាំងនឹងជំងឺកូវីដ-១៩។
ក្រសួងពាណិជ្ជកម្ម សូមអញ្ជើញពាណិជ្ជករ ផលិតករ សមាគមអាជីវកម្ម និងក្រុមហ៊ុនពាណិជ្ជកម្ម ដែលមានបំណងចង់ចូលរួមក្នុងព្រឹតិ្តការណ៍ «ពិព័រណ៍ផលិតផលខ្មែរ» ត្រូវទៅបំពេញបែបបទនៅនាយកដ្ឋានកិច្ចការពិព័រណ៍ នៃអគ្គនាយកដ្ឋានជំរុញពាណិជ្ជកម្ម ក្រសួងពាណិជ្ជកម្មឲ្យបានមុនថ្ងៃ២៥ ខែតុលា ឆ្នាំ២០២០ ជាកំណត់៕
