ព្យុះទី១៥«លីនហ្វា» នឹងធ្វើឲ្យទឹកទន្លេសេកុង សេសាន និងស្រែពកហក់ឡើង អាចក្លាយជាជំនន់
ព្យុះទី១៥ ឈ្មោះលីនហ្វា ដែលកំពុងមានឥទ្ធិពលលើតំបន់ប៉ាកសេ ប្រទេសឡាវ បានធ្វើឲ្យមានធ្លាក់ច្រើន ដែលស្ថានភាពនេះ ធ្វើឲ្យទឹកទន្លេសេកុង សេសាន និងទន្លេស្រែពក នៃភាគឦសានប្រទេស នឹងហក់ឡើងអាចក្លាយជាទឹកជំនន់។ នេះបើតាមសេចក្តីប្រកាសព័ត៌មានរបស់ក្រសួងធនធានទឹក និងឧតុនិយម ចេញផ្សាយនៅយប់ថ្ងៃទី១១តុលា។
ក្រៅពីទន្លេទាំង៣ ក្រសួងក៏បញ្ជាក់ដែរថា ទឹកទន្លេមេគង្គនៅស្ទឹងត្រែង ក្រចេះ និងកំពង់ចាម ក៏ហក់បន្តិចដែរ ប៉ុន្តែស្ថិតនៅទាបជាងកម្រិតកម្ពស់ឲ្យមានការប្រុងប្រយ័ត្ន។ ទោះជាយ៉ាងនេះក្តី ក្រសួងជំនាញនេះ ក៏នៅតែទទូចអំពាវនាវឲ្យ ស្ថាប័នពាក់ព័ន្ធ អាជ្ញាធរដែនដី និងពិសេសប្រជាពលរដ្ឋរស់នៅអមសងខាងទន្លេខាងលើ បង្កើនការប្រុងប្រយ័ត្នខ្ពស់ ដើម្បីចៀសវាគ្រោះថ្នាក់នានា។ ទន្ទឹមនឹងនោះ ក៏បញ្ជាក់ឲ្យបណ្តាខេត្តដែលមានទំនាក់ទំនងនឹងរបបទឹកទន្លេ ត្រូវមានវិធានការក្នុងការបើកទ្វារទឹក បញ្ចូលទៅតាមព្រែក បណ្តាអាងទឹកនានា និងទំបន់ទំនាប។
ទាក់ទងនឹងស្ថានភាពទឹកជំនន់នៅខេត្តស្ទឹងត្រែងនេះដែរ កាលពីព្រឹកថ្ងៃទី១១តុលា រដ្ឋបាលខេត្តស្ទឹងត្រែង បានសរសេរនៅទំព័រហ្វេសប៊ុករបស់ខ្លួនថា មានឃុំចំនួន៦ នៃស្រុកថាឡាបរិវ៉ាត់ បានរងគ្រោះដោយទឹកជំនន់ក្នុងនោះ មានពលរដ្ឋចំនួន ៥៥គ្រួសារ ត្រូវបានជម្លៀសទៅទីទួលសុវត្ថិភាព ខណៈផ្ទះសម្បែងចំនួន ៦៩៣ខ្នង ត្រូវបានទឹកលិច។
សូមជម្រាបថា រយៈពេលជិត១សប្តាហ៍មកនេះ ខេត្តបាត់ដំបង និងពោធិ៍សាត់ បន្ទាយមានជ័យ បានរងគ្រោះខ្លាំងដោយសារទឹកជំនន់។ យ៉ាងហោចមានពលរដ្ឋប្រមាណ១០នាក់ បានបាត់បង់ជីវិតដោយសារទឹកជំនន់ ផ្ទះសម្បែង និងដំណាំជាច្រើនហិកតា បានទទួលរងគ្រោះ៕
