«ការអភិរក្សជីវៈចម្រុះដើម្បីយើងទាំងអស់គ្នា» ជាប្រធានបទសំខាន់ក្នុងទិវាបរិស្ថាន ៥មិថុនាខាងមុខ
ភ្នំពេញ៖ «ការអភិរក្សជីវៈចម្រុះដើម្បីយើងទាំងអស់គ្នា» គឺជាប្រធានបទដែលក្រសួងបរិស្ថាន បានឲ្យដឹងថា កម្ពុជាបានកំណត់យកដើម្បីប្រារព្ធក្នុងទិវាបរិស្ថានជាតិ និងទិវាបរិស្ថានពិភពលោក នៅថ្ងៃទី៥ មិថុនា ខាងមុខ។ ក្រសួងបរិស្ថាន បានបញ្ជាក់ថា បច្ចុប្បន្ន ជីវៈចម្រុះនៅកម្ពជាកំពុងទទួលរងនូវការគំរាមកំហែង ដែលទាមទារឲ្យមានការចូលរួមអភិរក្សទាំងអស់គ្នា ដើម្បីយើងទាំងអស់គ្នា និងជៀសវាងស្តាយក្រោយនៅពេលដែលបាត់បង់។ នេះបើតាមការចុះផ្សាយតាមទំព័រហ្វេសប៊ុករបស់ក្រសួងបរិស្ថាននៅថ្ងៃទី១ មិថុនា។
បើតាមក្រសួងបរិស្ថាន ជីវៈចម្រុះ សំដៅដល់សារពាង្គកាយខុសគ្នានៅក្នុងប្រភេទតែមួយ ឬប្រភេទផ្សេងគ្នា និងបណ្តាសារពាង្គកាយរស់នៃគ្រប់លំដាប់ថ្នាក់ និងប្រភពទាំងអស់ រួមទាំងប្រព័ន្ធអេកូឡូស៊ីដែនដីគោក ដែនសមុទ្រ ដែនទឹកសាប និងបណ្តាទំនាក់ទំនងអេកូឡូស៊ី។
ក្រសួងបរិស្ថាន បញ្ជាក់ថា នៅកម្ពុជា មានធនធានចម្រុះដ៏សម្បូរបែប ក្នុងនោះរួមមានថនិកសត្វ ១២៣ប្រភេទ, សត្វស្លាប ៥៤៥ប្រភេទ, ឧរង្គសត្វ ៨៨ប្រភេទ, រុក្ខជាតិតូចៗ(Vascular plants) ២៣០៨ប្រភេទ, ត្រី ៨៧៤ប្រភេទ, ផ្កាថ្មរឹង ២៤ប្រភេទ, ផ្កាថ្មទន់ ១៤ប្រភេទ, ស្មៅសមុទ្រ ១០ប្រភេទ និងថលជលិក ៦៣ប្រភេទ។ ធនធានចម្រុះទាំងនេះ បានផ្តល់អត្ថប្រយោជន៍ដល់ប្រជាជនកម្ពុជាយ៉ាងច្រើនទៅលើវិស័យ ទេសចរណ៍ វប្បធម៌ បរិស្ថាន និងជាផ្នែកមួយយ៉ាងសំខាន់ក្នុងការជួយដល់សេដ្ឋកិច្ចកម្ពុជាផងដែរ។
សូមបញ្ជាក់ថា បច្ចុប្បន្ននេះ ជីវៈចម្រុះដ៏សម្បូបែបនេះ កំពុងទទួលការគំរាមកំហែងយ៉ាងខ្លាំង ដែលទាមទាឲ្យមានការមើលថែអភិរក្ស និងការយកចិត្តទុកដាក់ក្នុងការការពារ។ នេះបើតាមក្រសួងបរិស្ថានដដែល៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com