ឆ្នាំ២០១៩ ចាប់ពីខែមិថុនា ដល់ខែតុលានេះ អង្គការជីវិតសត្វស្លាបអន្តរជាតិ រកឃើញសំបុកត្រយងយក្ស(ឪលើក) ដែលជាប្រភេទបក្សីកម្រ ចំនួន១០សំបុក។
សំបុកសត្វត្រយងយក្សនេះ រកឃើញដោយក្រុមការងារអង្គការជីវិតសត្វស្លាបអន្តរជាតិ គម្រោងដែនជម្រកសត្វលំផាត់ ខេត្តរតនគិរី។ សំបុកទាំង១០នោះ មានសំបុក៨ ទទួលបានជោគជ័យ ដែលមានកូនហើរចេញពីសំបុកចំនួន១១ក្បាល។ ចំណែកពីរសំបុកទៀត មួយកំពុងបន្តក្រាបពង និងមួយទៀតបរាជ័យ ដោយសារមានការរំខានពីសកម្មភាពមនុស្ស ដែលចូលទៅប្រព្រឹត្តបទល្មើសក្នុងតំបន់ការពារ។ នេះបើតាម លោក ប៊ូ វរសក្ស ប្រធានអង្គការជីវិតសត្វស្លាបអន្តរជាតិប្រចាំកម្ពុជា ថ្លែប្រាប់សារព័ត៌មានថ្មីៗ នៅពីថ្ងៃទី២៨តុលា ឆ្នាំ២០១៩។
ទន្ទឹមនឹងនេះ ប្រធានអង្គការជីវិតសត្វស្លាបអន្តរជាតិ បានឲ្យដឹងថា ប្រភេទសត្វត្រយងយក្សនៅលើពិភពលោកមានប្រមាណ២៥០ក្បាល ដែលក្នុងនោះ មានជាង៩០ភាគរយនៅកម្ពុជា។ សត្វត្រយងយក្សនៅកម្ពុជា មាននៅតំបន់ដែនជម្រកសត្វលំផាត់ក្នុងខេត្តរតនគិរី តំបន់ដែនជម្រកសត្វព្រៃឆែបក្នុងខេត្តព្រះវិហារ និងសត្វព្រៃសៀមប៉ាង ខេត្តស្ទឹងត្រែង៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com