សៀមរាប៖ ការងារជួសជុលប្រាសាទបាខែង នៅតែបន្តឥតឈប់ឈរ។ បច្ចុប្បន្ន អ្នកជំនាញកំពុងជួសជុលរចនាសម្ព័ន្ធប្រាសាទ នៅផ្នែកខ្លះដែលថ្មមានសភាសពុកផុយ ប្រេះដោយសារកត្តាអាយុកាល។ ដំណើរការជួសជុល កែលម្អ ធ្វើវឱ្យរចនាសម្ព័ន្ធប្រាសាទប្រសើរឡើងនេះប្រព្រឹត្តទៅក្រោមជំនួយថវិការបស់រដ្ឋាភិបាលអាម៉េរិក។
ដើម្បីជ្រាបច្បាស់ពីបច្ចេកទេសនៃការជួសជុលប្រាសាទបាខែងនេះ សូមលោកអ្នកនាង ទស្សនាបទសម្ភាស៍ដូចខាងក្រោម៖
ប្រាសាទភ្នំបាខែង ជាប្រាសាទដែលមានស្ថាបត្យកម្មសាងសង់ប្លែកពីប្រាសាទភ្នំដទៃ នៅក្នុងតំបន់អង្គរ។ ដូនតាខ្មែរ បានកាត់ថ្មភ្នំធម្មជាតិធ្វើជារាងពីរ៉ាមិត និងរៀបថ្មភក់ផ្នែកខាងលើ ឱ្យចេញជារូបរាងប្រាសាទតែម្តង។
បច្ចុប្បន្ន អ្នកជំនាញ កំពុងព្យាបាល ជួសជុលហេដ្ឋារចនាសម្ព័ន្ធមួយចំនួនដូចជា ជណ្ដើរ និងជញ្ជាំង ផ្នែកខាងត្បូងឆៀងខាងលិច នៃបូជនីយដ្ឋានហិណ្ឌូសាសនា ដែលរងការខូចខាតនេះ។
នេះបើតាម លោក ជីវ ភិរម្យ វិស្វករ និងអ្នកគ្រប់គ្រងការដ្ឋានជួសជុល ដោយលោកបានបញ្ជាក់ថា ជ្រុងចំនួន៣ផ្សេងទៀតនៃប្រាសាទនេះ ត្រូវបានជួសជុលរួចហើយ គឺជ្រុងខាងជើងឆៀងខាងលិច, ខាងជើងឆៀងខាងកើត និងខាងត្បូងឆៀងខាងលិច និងមុខជណ្ដើរខាងលិច។
គួរជម្រាបថា គម្រោងជួសជុលប្រាសាទភ្នំបាខែង ត្រូវបានអនុវត្តដោយអង្គការមូលនិធិប្រាសាទពិភពលោក ដោយចាប់ផ្តើមតាំងពីឆ្នាំ២០០៨មក។ នៅប៉ែកខាងកើត នៃប្រាសាទ បានទទួលការជួសជុលមុនគេ។ ក្រៅពីជួសជុលតួប្រាសាទពីរ៉ាមីត អង្គការមូលនិធិប្រាសាទពិភពលោក ក៏មានគម្រោងជួយជួសជុលប្រាសាទឥដ្ឋនៅជុំវិញប្រាសាទ ដែលមានចំនួន៤៤ប្រាសាទដែរ នាពេលអនាគត។
ជាមួយគ្នានេះ កាលពីដើមខែធ្នូ ឆ្នាំ២០២៣ មូលនិធិឯកអគ្គរដ្ឋទូតដើម្បីការអភិរក្សវប្បធម៌លើគម្រោងជំនួយសម្រាប់ជួសជុលប្រាសាទភ្នំបាខែង បានបន្តជំនួយថវិកាចំនួន៤៥ម៉ឺនដុល្លារ ដើម្បីជួសជុលរចនាសម្ព័ន្ធប្រាសាទបាខែងនេះ៕
