លោក សុខ ធី ច្នៃសំណល់ប្លាស្ទិក ធ្វើជាឥដ្ឋ ដើម្បីចូលរួមជួយដល់បរិស្ថាន
ដើម្បីចូលរួមចំណែកកាត់បន្ថយសំណល់ប្លាស្ទិក និងបញ្ចៀសផលប៉ះពាល់ទៅលើបរិស្ថាន លោក សុខធី បានបង្កើតសហគ្រាសផលិតឥដ្ឋ នៅក្នុងភូមិព្រែកហូរលិច សង្កាត់ព្រែកហូរ ក្រុងតាខ្មៅ ខេត្តកណ្ដាល ដោយប្រើប្រាស់សំណល់ប្លាស្ទិកក្នុងសហគមន៍យកមកធ្វើជាវត្ថុធាតុដើម។ នេះបើតាមហ្វេសប៊ុកក្រសួងបរិស្ថាន ចេញផ្សាយនៅថ្ងៃទី១៣ ខែសីហា ឆ្នាំ២០២០កន្លងទៅ។
លោក សុខ ធី បានទៅសិក្សាបច្ចេកទេសផលិតឥដ្ឋនេះ នៅតាមបណ្ដាប្រទេសមួយចំនួនដូចជា ម៉ាឡេស៊ី ឥណ្ឌា ថៃ ចិន និងហ្វីលីពីន មុននឹងសម្រេចចិត្តមកបើកសហគ្រាស នៅឆ្នាំ២០១៩ ដោយដាក់ឈ្មោះឥដ្ឋនេះថា «ឥដ្ឋអេកូ ឬឥដ្ឋបរិស្ថាន»។ លោក សុខ ធី បន្តថា សហគ្រាសរបស់លោក មានការសហការជាមួយនឹងប្រជាសហគមន៍ និងអាជ្ញាធរមូលដ្ឋាន ក្នុងការប្រមូលថង់ប្លាស្ទិក កញ្ចប់មី និងសំណល់ប្លាស្ទិកផ្សេងៗទៀត នៅតាមសហគមន៍ ដើម្បីយកមកផលិតជាឥដ្ឋបរិស្ថាននេះ។
ម្ចាស់សហគ្រាសផលិតឥដ្ឋបរិស្ថាននេះ បានបញ្ជាក់ថា ឥដ្ឋដែលផលិតចេញពីសំណល់ប្លាស្ទិកនេះ មានគេស្គាល់ច្រើន និងបញ្ជាទិញជាហូរហែ ដោយពួកគាត់ គាំទ្រចំពោះគំនិតច្នៃប្រឌិត ក្នុងការជួយដល់បរិស្ថាន។ បច្ចុប្បន្ននេះ សហគ្រាសរបស់លោក មិនទាន់មានសមត្ថភាពផ្គត់ផ្គង់តម្រូវការទីផ្សារបាននៅឡើយនោះទេ ព្រោះចង្វាក់ផលិតកម្មនៅមានទំហំតូច ដោយក្នុងមួយថ្ងៃសហគ្រាសនេះ អាចផលិតឥដ្ឋបានចន្លោះពី១០០ទៅ២០០ដុំតែប៉ុណ្ណោះ។
ក្រៅតែពីផលិតឥដ្ឋ លោក សុខ ធី ក៏មានគម្រោងផលិតសម្ភារសំណង់ផ្សេងៗទៀតដូចជា ក្បឿង និងឥដ្ឋការ៉ូចេញពីសំណល់ប្លាស្ទិកដូចគ្នាដែរ។ ប៉ុន្តែដើម្បីធ្វើបែបនេះបាន លោកត្រូវការដើមទុនច្រើន និងត្រូវការទិញម៉ាស៊ីនកែច្នៃធុនធំៗ៕
