សត្វប្រើស ជ្រូកព្រៃ និងទន្សោង យ៉ាងហោច ៦ក្បាល​បានងាប់នៅក្នុងព្រៃ​សង្ឃសហគមន៍​រុក្ខាវ័ន ខេត្តឧត្ដរមានជ័យ ដែលគិតចាប់ពីខែធ្នូ ឆ្នាំ២០២៤ ដល់ខែមីនា ឆ្នាំ២០២៥។ នេះបើ​តាមសង្ឃដីការបស់ព្រះតេជព្រះ​គុណ ថូ ធូរស់ ព្រះប្រធានគណៈកម្មការសហគមន៍​​រុក្ខា វ័ន មក​កាន់សារព័ត៌មានឌីជីថលថ្មីៗ នាថ្ងៃទី២ ខែមេសា។

ព្រះអង្គ ថូ ធូរស់ បានផ្ដល់សង្ឃដីកាថា នៅរដូវប្រាំងនេះ សត្វព្រៃជួបបញ្ហាប្រឈមធំៗ​ចំនួនពីរ គឺអន្ទាក់ និងខ្វះប្រភពទឹកផឹក ដែលបណ្ដាលឱ្យពួកវាងាប់ស្ទើររាល់ខែ។ គិត​ចាប់​ពីខែធ្នូ ឆ្នាំ ២០២៤ ដល់ខែមីនា ឆ្នាំ ២០២៥ មានសត្វព្រៃយ៉ាងហោច ៦ក្បាល ត្រូវបានគេ​ប្រទះឃើញងាប់រប៉ាត់រប៉ាយនៅក្នុងព្រៃសហគមន៍រុក្ខាវ័ន។ ដោយឡែក សត្វដែលរួចផុត​ជីវិតវិញ ក៏រស់នៅយ៉ាងវេទនាដែរ ដ្បិតខ្លះរងរបួស និងពិការជើង។ 

​ព្រះប្រធានគណៈកម្មការសហគមន៍រុក្ខាវ័ន មានសង្ឃដីកាបន្តថា រដូវប្រាំង ឆ្នាំ២០២៥នេះ មាន​សត្វងាប់ច្រើនជាងបណ្ដាឆ្នាំមុន ធៀបនឹងរយៈពេលដូចគ្នា។ ប៉ុន្តែការងាប់របស់​សត្វ​ទន្សោងវិញ បានថយចុះពី៣ក្បាល មកត្រឹម១ក្បាលប៉ុណ្ណឹង ធៀបនឹងរយៈពេលឆ្នាំ ២០២៤។ សម្រាប់ករណីទន្សោងងាប់នេះដែរ អាជ្ញាធរ និងប្រជាសហគមន៍ ឃាត់បានជន​ល្មើសដែលរាយឧបករណ៍ឆក់ចំនួន ២ នាក់ និងបានដាក់ទោសទណ្ឌតាមច្បាប់រួចហើយ។

ព្រះតេជព្រះគុណ ថូ ធូរស់ បន្តសង្ឃដីកាបែបនេះ​៖ «ចាប់ពីខែធ្នូមក យើងឃើញថា ទឹក​បានរី​ងជាបន្តបន្ទាប់ ដែលធ្វើឱ្យសត្វអត់សូវមានកន្លែងផឹកទឹកទេ ដូច្នេះ នៅពេលពួកវា (សត្វ​ព្រៃ) ទៅរកស៊ីឆ្ងាយៗ ហើយដើររកកន្លែងផឹកទឹកអត់បាន គឺនឹងប្រឈមងាប់ហើយ។ បើសិនពួកវារកកន្លែងផឹកទឹកបាន ក៏មិនធានាសុវត្ថិភាពដែរ ព្រោះថា អន្ទាក់ត្រូវបានព្រាន​រាយនៅតាមថ្លុក ឬមាត់ទឹកផ្សេងៗ ដែលបានសម្លាប់សត្វព្រៃ និងធ្វើឱ្យរបួស ឬពិការជើង ជាដើម។»។

ព្រៃសង្ឃសហគមន៍រុក្ខាវ័នមានផ្ទៃដី ៣០ ២៥៤ហិកតា ដែលមានទាំងផ្ទៃដីគោក និងទឹក​ស្ទឹងផងដែរ។ ទោះយ៉ាងណា សត្វព្រៃភាគច្រើន មិនហ៊ានចុះផឹកទឹកស្ទឹងនោះទេ ដោយ សារខ្លាចសកម្មភាពនេសាទរបស់ពលរដ្ឋជុំវិញ។ ព្រះតេជព្រះគុណ ថូ ធូរស់ មានសង្ឃដីកាដូច្នេះ មុននឹងបន្ត​បារម្ភថា សត្វព្រៃរងភាពអត់ឃ្លានកាន់តែច្រើន បើសិន​គ្មាន​ភ្លៀងធ្លាក់នៅចន្លោះខែមេសា និង​មិថុនា។ ទោះបីយ៉ាងណា សហគមន៍ព្រៃសង្ឃរុក្ខាវ័ន និងមន្ទីរបរិស្ថានខេត្តឧត្ដរមានជ័យ មិនបានឈរមើលនោះទេ ដោយគ្រប់គ្នាបានពិភាក្សាលើគម្រោងជីកស្រះ, ទប់ទំនប់ទឹក និងបុកអណ្ដូង ដែលគ្រោងធ្វើនៅខែមេសានេះ ដើម្បីធានាទឹកឱ្យសត្វផឹកគ្រប់គ្រាន់។ 


 

ព្រះអង្គមានសង្ឃដីកាដូច្នេះថា៖ «ចាប់ពីខែនេះ ដល់ខែឧសភា ឬមិថុនា បើសិនមិនមានភ្លៀងធ្លាក់ទេ សត្វនឹងប្រឈមមុខនឹងការដាច់ទឹកផឹកកាន់តែច្រើន ព្រោះថា នៅតាមស្ទឹងដែលធ្លាប់តែផឹកនោះ មានប្រជាពលរដ្ឋចូលទៅនេសាទ​ ធ្វើឱ្យសត្វអត់ហ៊ានចុះផឹកទេ។ ប៉ុន្តែ រឿងនេះ អាត្មាក៏បានជជែកជាមួយប្រធានមន្ទីរបរិស្ថានខេត្តឧត្ដរមានជ័យដែរថា ដោយយើងនឹងរៀបចំជីកស្រះ និងទប់ទំនប់ទឹក ក៏ដូចជា បុកអណ្ដូង ដើម្បីឱ្យសត្វផឹកនៅខែមេសានេះ។»។ 

ទាក់ទងនឹងបញ្ហាខ្វះទឹកនេះ កន្លងមក លោក ខ្វៃ អាទិត្យា អ្នកនាំពាក្យក្រសួងបរិស្ថាន ​បា​នឱ្យដឹងថា ក្រសួងបរិស្ថាន តែងតែគិតគូរខ្ពស់ពីបញ្ហាខ្វះខាតទឹកសម្រាប់​សត្វព្រៃ​នៅប្រាំង​។ ជារៀងរាល់ឆ្នាំ ក្រសួងបានទប់ស្កាត់ការបង្ហូរទឹកចេញប្រព័ន្ធបឹងធម្មជាតិ ជាពិសេសបន្ត​ជីកស្រះ និងស្ដារឡើងវិញនូវបឹងបួធម្មជាតិនានា ដើម្បីធ្វើយ៉ាងណារក្សាទឹកទុកឱ្យសត្វ​ស្លាប និងជីវចម្រុះផ្សេងៗអាចចិញ្ចឹមជីវិត៕