ម៉ាស៊ីនអង្គុលីលេខ អាយុប្រហែល៤០ឆ្នាំ ត្រូវបានដាក់តាំងក្នុងហាងកាហ្វេទំនើប
ក្រៅពីឧបករណ៍សោតទស្ស ភាជន៍ ជញ្ជីង និងបាវបុរាណ នៅជាន់ក្រោមសាខាហាងកាហ្វេ TEMPLE នៃវិថីឧកញ៉ាជ្រុនយូហាក់ (ផ្លូវ២៩៤) សង្កាត់បឹងកេងកង ខណ្ឌបឹងកេងកង រាជធានីភ្នំពេញ គេដាក់តាំងលម្អម៉ាស៊ីនអង្គុលីលេខ ១គ្រឿង។ វា គឺជាម៉ាក abc ប្រភេទ 8800 ដែលជាម៉ាស៊ីនវាយអក្សរឡាតាំង។ វាមានអាយុកាល៤០ឆ្នាំ។ ពីដើម វាបំពាក់ជ័រពណ៌ស ក៏ប៉ុន្តែមកដល់ពេលនេះ វាបានក្លាយទៅជាពណ៌ពងមាន់វិញ ព្រោះតែចាស់ពេក។ ម៉ាស៊ីននេះ មានបណ្ដោយ ៣៩៥មីលីម៉ែត្រ ទទឹង ៣៥០ មីលីម៉ែត្រ និងកម្ពស់ ១៤០ មីលីម៉ែត្រ។ វាប្រើកម្លាំងដៃ។ តាមទីផ្សារវត្ថុបុរាណ អង្គុលីលេខប្រភេទនេះ មានតម្លៃ ២០ដុល្លារឡើងទៅ។
សូមអញ្ជើញលោកអ្នកនាងទស្សនាវីដេអូខាងក្រោមនេះ៖
ម៉ាស៊ីនអង្គុលីលេខដំបូងគេបង្អស់ ត្រូវបានបង្កើតដោយលោក MILL Henry នៅអង់គ្លេស នាឆ្នាំ១៧១៤។ ដោយឡែក វាមិនបានជោគជ័យទេ ពីព្រោះប្រហែលជាលឿនពេក វាមុនសម័យ។
អង្គុលីលេខ បានជោគជ័យក្នុងអំឡុងសតវត្សទី ១៩ វិញ។ មានការរីកចម្រើន ដែលបានធ្វើឱ្យម៉ាស៊ីនវាយអក្សរងាយទៅៗ។ ចុងសតវត្សទី១៩ គេបង្កើតក្ដារចុចស្តង់ដារអក្សរឡាតាំង QWERTY និង AZERTY ដែលឧបករណ៍ទំនើប នៅតែប្រើរហូតដល់សព្វថ្ងៃនេះ។ ក្នុងទសវត្សរ៍ឆ្នាំ១៩៩០ គេបង្កើតអង្គុលីលេខអគ្គិសនី ខណៈការប្រើកំព្យូទ័រចាប់ផ្ដើមពេញនិយម។ ដោយសារការរីកចម្រើននៃបច្ចេកទេសព័ត៌មានវិទ្យា តាំងពី២០ឆ្នាំមកហើយ គេលែងប្រើម៉ាស៊ីនអង្គុលីលេខ។
ហាង TEMPLE ជាអាហារដ្ឋាន ហាងកាហ្វេ និងឌីស្កូទែក ដែលតុបតែងជាមួយវត្ថុបុរាណ។ Temple គឺជាពាក្យបារាំង ដែលបកប្រែជាភាសាខ្មែរថា ប្រាសាទ។ ពីដំបូងត្រូវបានបង្កើតយីហោនេះ នៅក្រុងសៀមរាប ពីព្រោះវត្ថុបុរាណសមនឹងប្រាសាទបុរាណ ដែលមានចំនួន២០០ នៅឯអង្គរ។ ហើយតាំងពីជំងឺកូវីដបានផ្ទុះឡើង ក៏មានហាង TEMPLE នៅរាជធានីភ្នំពេញផងដែរ៕
