ខុសបច្ចេកទេស និងគ្មានច្បាប់! អាជ្ញាធរខេត្តតាកែវ ផ្អាកការសាងសង់សំណង់នៅផ្ទះលោក ធាន វុទ្ធី
ថ្មីៗនេះ អាជ្ញាធរខេត្តតាកែវ បានចុះពិនិត្យសំណង់ និងរូបបដិមា នៅទីតាំងផ្ទះរបស់លោក ធាន វុទ្ធី ដែលតាំងខ្លួនជាព្រះសិរអារ្យមេត្រីយ៍។ ក្រោយចុះដល់ទីតាំងនៅស្រុកព្រៃកប្បាស អាជ្ញាធរបានសម្រេចផ្អាកការសាងសង់សំណង់នានា ព្រោះគ្មានច្បាប់អនុញ្ញាត គ្មានបច្ចេកទេស និងខុសរចនាបថវប្បធម៌ខ្មែរ។
លោក វ៉ី សំណាង អភិបាលខេត្តតាកែវ បានបញ្ជាក់ប្រាប់សារព័ត៌មានឌីជីថលថ្មីៗតាមទូរសព្ទថា កាលពីថ្ងៃទី៦ មករា អាជ្ញាធរពិតជាបានចុះទៅពិនិត្យទីតាំងផ្ទះលោក ធាន វុទ្ធី ដែលស្ថិតនៅស្រុកព្រៃកប្បាស។ ក្នុងដំណើរការចុះពិនិត្យនេះ អាជ្ញាធរខេត្ត រួមទាំងតំណាងមន្ទីរវប្បធម៌, មន្ទីរធម្មការ និងមន្ទីររៀបចំដែនដី បានសម្រេចផ្អាកភ្លាមៗនូវការសាងសង់សំណងនានា ដោយសារគ្មានច្បាប់អនុញ្ញាត និងមិនត្រឹមត្រូវតាមបច្ចេកទេសសំណង់។
អភិបាលខេត្តតាកែវ រៀបរាប់ដូច្នេះ៖«យើងផ្អាកគាត់សិន ព្រោះសំណង់មិនត្រូវជាមួយរចនាបថ។ យើងចង់ឱ្យគាត់ធ្វើយ៉ាងណា ជ្រើសរើសជាងដែលមានចំណេះជំនាញខាងសូន្យរូបឱ្យបានត្រឹមត្រូវ»។ នៅទីតាំងផ្ទះរបស់លោក ធាន វុទ្ធី ដែលមានផ្ទៃដី ១៤ហិកតា បានចាប់ផ្ដើមសាងសង់សំណង់ និងរូបបដិមាតាំងពីឆ្នាំ២០១៤មក។
សាងសង់តាំងពីឆ្នាំ២០១៤ ហេតុអ្វីអាជ្ញាធរទើបតែដឹងរឿង? ត្រង់ចំណុចនេះ អភិបាលខេត្តតាកែវ បញ្ជាក់ថា ដោយសារការចាប់ផ្ដើមសំណង់នៅទាប មើលមិនទាន់ឃើញ ម៉្យាងលោកទើបមកកាន់តំណែងជាអភិបាលខេត្ត។ បើតាមលោក វ៉ី សំណាង ទីតាំងខាងលើ មានសណ្ឋានជាទីអារាម ទើបបញ្ជាឱ្យចុះទៅពិនិត្យ។ «ទីតាំងនោះខ្ញុំឃើញដូចជាវត្ត ខ្ញុំឃើញដូចជាចម្លែក ទើបបានឱ្យទៅមើល»។
ក្រោយចុះពិនិត្យមន្រ្តីជំនាញ រកឃើញថាទីតាំងខាងលើ សាងសង់មិនត្រូវតាមបច្ចេកទេស និងមិនមានការត្រួតពិនិត្យពីអ្នកបច្ចេកទេស។ ជាអាជ្ញាធរដែនដី លោក វ៉ី សំណាង គាំទ្រចំពោះការអភិវឌ្ឍ ប៉ុន្តែត្រូវគោរពក្រមបច្ចេកទេសវិជ្ជាជីវៈទាំងសំណង់ និងសិល្បៈ។
បើតាមមន្ទីរព័ត៌មានខេត្តតាកែវ នៅទីតាំងខាងលើ មានសំណង់ដូចជា អគារគុណមាតាបិតា ប្រាសាទជល់មុន្នី១៨សែនកោដ អគារកម្ពស់៥ជាន់ ដែលមិនបានឆ្លងកាត់ជំនាញវិស្វករ និងមិនមានច្បាប់អនុញ្ញាត ដោយធ្វើតាមការបញ្ជាពីលោក ធាន វុទ្ធី។ ក្រៅពីនេះ ក៏មានរូបបដិមាជាច្រើន ដែលគ្មានការពិនិត្យពីជំនាញ និងមិនមានក្បួនខ្នាតត្រឹមត្រូវផងដែរ។
សូមបញ្ជាក់ថា លោក ធាន វុទ្ធី ក៏ធ្លាប់បានផ្ដើមគំនិតសាងសង់សំណង់ និងរូបបដិមាធំៗ នៅវត្តទួលព្រះរាជា ក្នុងស្រុកកោះធំ ខេត្តកណ្ដាលផងដែរ៕
