ពិព័រណ៍ពិភពលោក និងពិព័រណ៍​ពាណិជ្ជកម្ម​អន្តរជាតិនៅទីក្រុងអូសាកាកាន់សៃ ប្រទេសជប៉ុន  នឹងធ្វើពីថ្ងៃទី១២ ខែមេសា ដល់ថ្ងៃទី១៣ ខែតុលា ឆ្នាំ២០២៥។​ ពិព័រណ៍ពិភពលោកដែលមានរយៈពេល៦ខែនេះ គឺមាន១៦១ប្រទេសចូលរួម។​ ក្នុងឱកាសនេះ កម្ពុជា នឹងនាំផលិតផលសំខាន់ៗរបស់ខ្លួនទាំងវិស័យកសិកម្ម សិប្បកម្ម ឧស្សាហកម្ម វប្បធម៌ និងទេសចរណ៍...ជាដើម តាំងបង្ហាញនៅក្នុងពិព័រណ៍កម្រិតពិភពលោកនេះ។​

-

បើតាមលោក ប៉ែន សុវិជាតិ អ្នកនាំពាក្យពាណិជ្ជកម្ម នៅក្នុងពិពិរណ៍ពិភពលោក​ និងពិព័រណ៍​ពាណិជ្ជកម្ម​អន្តរជាតិនៅប្រទេសជប៉ុននេះ កម្ពុជាបានត្រៀមលក្ខណៈសម្បតិ្តរួចរាល់ហើយក្នុងការចូលរួម។ លោកបានបញ្ជាក់ប្រាប់សារព័ត៌មានឌីជីថលថ្មីៗ(ThmeyThmey) នាថ្ងៃទី១១ ខែកញ្ញា ថា​ កម្ពុជាទទួលបានពន្លាជាតិប្រភេទB ក្នុងទំហំ ៣០០ម៉ែត្រការ៉េ​ដែលមានតំបន់ពាណិជ្ជកម្ម​ (Commercial Area) មួយនៅក្នុងពន្លាជាតិនោះ(ទំហំប្រមាណ២០ភាគរយនៃទំហំពន្លាជាតិកម្ពុជាសរុប)។​ 

សម្រាប់ឱកាសផ្សព្វផ្សាយផលិតផលខ្មែរគ្រប់ប្រភេទ ឱ្យពិភពលោកបានស្គាល់កាន់តែច្បាស់ពីកម្ពុជានេះ ក្រសួងពាណិជ្ជកម្ម បានចុះកិច្ចសន្យាផ្តល់សិទ្ធិឱ្យក្រុមហ៊ុនឯកជនមួយដែលមាន​លក្ខណៈសម្បត្តិគ្រប់គ្រាន់ ជាតំណាង​ក្នុងការដាក់តាំងបង្ហាញ និងលក់​ផលិតផលខ្មែរក្នុ​ងតំបន់ពាណិជ្ជកម្មនៃពន្លាជាតិកម្ពុជា។ បើតាមលោករដ្ឋលេខាធិការ និងជាអ្នកនាំពាក្យក្រសួងទេសចរណ៍ក្រុមហ៊ុនផ្លូវការមួយនេះ នឹងប្រមូល​ទិញ​​ និងនាំយកផលិតផលខ្មែរផលិតដោយក្រុមហ៊ុនផ្ទាល់ផង និង​ពីក្រុមហ៊ុន/សហគ្រាសក្នុងស្រុកមួយចំនួនផ្សេងទៀតផងដែរ។​ 

ក្រុមហ៊ុននោះ នឹងប្រមូលប្រភេទផលិតផលខ្មែរ ដាក់តាំងបង្ហាញក្នុងពិព័រណ៍ពិភពលោក ​នៅទីក្រុងអូសាកាកាន់សៃ។ ​ ដូចជា វត្ថុអនុស្សារីយ៍ អាហារនិងភេសជ្ជៈ​ សិប្បកម្មសូត្រ សម្ភារប្រើប្រាស់ក្នុងផ្ទះ ផលិតផលសិប្បកម្មដែលប្រើប្រាស់វត្ថុធាតុដើមក្នុងស្រុក (ថ្ម ឈើ រពាក់ ផ្តៅ និងស្បែក) ផ្ទាំងគំនូរ ផលិតផលសុខភាព គ្រឿងអលង្ការ និងស្នាដៃសិល្បៈ ជាដើម។ល។

«ការរៀបចំតុបតែងពន្លាជាតិកម្ពុជា គឺនឹងបង្ហាញពីវប្បធម៌ អរិយធម៌ខ្មែរ និងរួមបញ្ចូលគ្នានៃការរចនាបែបសហសម័យទាំងបែបប្រពៃណីនិងបែបទំនើប ដែលបំផុសគំនិតពី​ការ​រីក​ចម្រើន និងការអភិវឌ្ឍប្រកបដោយភាពធន់របស់កម្ពុជាលើគ្រប់វិស័យ ទាំងសេដ្ឋកិច្ច ​ពាណិជ្ជកម្ម ឧស្សាហកម្ម ​កសិកម្ម វប្បធម៌ ទេសចរណ៍ ពិពិធកម្មទីផ្សារ​នាំ​ចេញ និងផលិតផលសក្ដានុពល​របស់កម្ពុជា។ រួមមាន  ស្រូវ, អង្ករ, ម្រេច, ស្វាយចន្ទី, និងដំណាប់ស្វាយ...ទៅចូលរួមផ្សព្វផ្សាយជាអន្តរជាតិ ក្នុងអំឡុងពេលពិព័រណ៍ពិភពលោកនេះ ដែល​មាន​រយៈពេល​​៦ខែ»។ នេះជាការអះអាងបន្ថែមរបស់លោក ប៉ែន សុវិជាតិ ដែលរំពឹងទទួលបានប្រយោជន៍ជាច្រើនពីការចូលរួមក្នុងពិព័រណ៍ពិភពលោក នៅទីក្រុង​អូសាកា​ ​កាន់សៃ ប្រទេសជប៉ុន  ចាប់ពីថ្ងៃទី១២ ខែមេសា ដល់ថ្ងៃទី១៣ ខែតុលា ឆ្នាំ២០២៥។

ការចូលរួមពិព័រណ៍ពិភពលោកនេះ កម្ពុជា នឹងបង្កើនបាននូវទំនាក់ទំនងកិច្ចសហប្រតិបត្តិការល្អជាមួយម្ចាស់ផ្ទះជប៉ុន និងប្រទេសចូលរួមទាំងអស់​ដែលមានរហូត១៦១ ប្រទេស និងអង្គការអន្តរជាតិធំៗចំនួន ៩។  ជាពិសេស ពិព័រណ៍នេះ នឹងជំរុញចលនាឱ្យពាណិជ្ជករ និងផលិតករកម្ពុជា ខិតខំផលិតទំនិញប្រកបដោយគុណភាព សុវត្ថិភាព និងសោភណ្ឌភាពនៃការវេចខ្ចប់ បានល្អត្រឹមត្រូវតាមស្តង់ដា ដើម្បីចូលទីផ្សារ និងបង្កើនលទ្ធភាពប្រកួតប្រជែងក្នុងកម្រិតទីផ្សារអន្តរជាតិ។

លោក ប៉ែន សុវិជាតិ បន្តនិយាយថា ពិព័រណ៍នេះនឹងពង្រីកឱកាសរបស់កម្ពុជាទៅកាន់វិនិយោគិនក្នុងជំនួបធុរកិច្ច និងការចាប់យកដៃគូរពាណិជ្ជកម្ម, ពង្រឹងកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម រវាងកម្ពុជាជាមួយម្ចាស់ផ្ទះជប៉ុន និងប្រទេសចូលរួម។ « ជាពិសេស គឺធ្វើឱ្យពិភពលោកបានស្គាល់កម្ពុជាកាន់តែច្បាស់ ជាប្រទេសមានវ័យចំណាស់មានមរតកវប្បធម៌ អរិយធម៌ ដ៏សម្បូរបែប និងផ្សព្វផ្សាយវប្បធម៌ អរិយធម៌ខ្មែរទាំងនោះនៅលើឆាកអន្តរជាតិ និងទាក់ទាញទេសចរ​អន្តរជាតិចូលមកទស្សនាកម្ពុជាកាន់តែច្រើនឡើង ខណៈម្ចាស់ផ្ទះជប៉ុន រំពឹងថានឹងមានភ្ញៀវចូលទស្សនាពិព័រណ៍នេះ ប្រមាណ២៨,២ លាននាក់ ដោយក្នុងនោះមាន៣,៥លាននាក់ មកពីបរទេស»។ នេះជាការលើកឡើងរបស់អ្នកនាំពាក្យក្រសួងពាណិជ្ជកម្ម។​

ក្រៅពីអត្ថប្រយោជន៍ខាងលើហើយនោះ ការចូលរួមពិព័រណ៍ពិភពលោករបស់កម្ពុជានៅជប៉ុន ក៏នឹងបង្កើនការតភ្ជាប់រវាងកម្ពុជា និងពិភពលោក ដោយបង្ហាញពីកាលានុវត្តសេដ្ឋកិច្ច និងពាណិជ្ជកម្មដែលទទួលបានពីការបន្តធ្វើពិពិធកម្មទីផ្សារនាំចេញរបស់កម្ពុជា។  ជាពិសេស គឺតាមរយៈកិច្ចព្រមព្រៀងពាណិជ្ជកម្មសេរី និងការបន្តធ្វើកិច្ចសម្រួលពាណិជ្ជកម្ម ដើម្បីទាក់ទាញការវិនិយោគផ្ទាល់មកកាន់កម្ពុជាបន្ថែមទៀត រួមទាំងជំរុញការនាំយកផលិតផលសក្ដានុពលកម្ពុជាទៅកាន់ទីផ្សារពិភពលោក។ ជាមួយគ្នា កម្ពុជាទទួលបានលើកតម្កើងកេរ្តិ៍ឈ្មោះរបស់ខ្លួនលើឆាកអន្តរជាតិ ខណៈកម្ពុជាបច្ចុប្បន្ន  គឺជាប្រទេសសមាជិករបស់​ការិ​យា​ល័​យ​ ពិព័រណ៍​អន្តរជាតិ (Bureau International des Expositions: BIE)។

របាយការណ៍ពាណិជ្ជកម្ម​ដែលសារព័ត៌មានឌីជីថលថ្មីៗទទួលបានពីលោក ប៉ែន សុវិជាតិ បានបង្ហាញថា ក្នុងរយៈពេល៨ខែមកនេះ(ពីខែមករា-ខែសីហា ឆ្នាំ២០២៤) ទំនាក់ទំនងពាណិជ្ជកម្មរវាងកម្ពុជា-ជប៉ុន សម្រេចបានក្នុងទំហំទឹកប្រាក់ប្រមាណ ១ ៤០០លានដុល្លារអាម៉េរិក កើន១៦,៨៩ភាគរយ ធៀបនឹងគ្រាដូចគ្នា កាលឆ្នាំ២០២៣។ ក្នុងនោះ ទំហំនាំចេញរបស់កម្ពុជា មានជាង៩០០លានដុល្លារ កើន១៩,៩៧ភាគរយ ខណៈវិញមានប្រមាន៤៧៩លានដុល្លារ កើន១១,៤០ភាគរយ៕