អ្នកជំនួញចិន ចង់កែច្នៃស្រូវអង្ករកម្ពុជាទៅកាន់ទីផ្សារចិន និងអន្តរជាតិ
ក្រុមគណៈប្រតិភូក្រុង Zhengzhou នៃខេត្តហឺណាន ប្រទេសចិន បានចាប់អារម្មណ៍លើផលិតផលសក្តានុពលរបស់កម្ពុជាដូចជាស្រូវអង្ករ ដែលមានគុណភាពខ្ពស់ រស ជាតិ ឆ្ងាញ់។ នាជំនួបនៅក្រសួងកសិកម្ម រុក្ខាប្រមាញ់ និងនេសាទ ភាគីចិន បានបង្ហាញបំណងកែច្នៃ ស្រូវអង្ករកម្ពុជាទៅកាន់ទីផ្សារចិន និងអន្តរជាតិ។
ជំនួបពិភាក្សារវាងលោក ប្រាក់ ដាវីដ រដ្ឋលេខាធិការក្រសួងកសិកម្ម ជាមួយគណៈប្រតិភូ ក្រុង Zhengzhou នៃខេត្តហឺណាន ប្រទេសចិន កាលពីថ្ងៃទី៩ ខែកញ្ញា មានគោលបំណងពិភាក្សាលើកិច្ចសហប្រតិបត្តិការឧស្សាហកម្មដំណាំស្រូវ ការសាងសង់ឃ្លាំងស្តុកស្រូវ ការបង្កើនសមត្ថភាពកែច្នៃដំណាំស្រូវ ការផ្លាស់ប្តូរបច្ចេកវិទ្យា។
ជំនួបនេះ ក៏ពិភាក្សាពីការអនុវត្តកិច្ចសហប្រតិបត្តិការលើសេវាកម្មហិរញ្ញវត្ថុសម្រាប់ឧស្សាហកម្មដំណាំស្រូវ តាមរយៈផែនការគម្រោងកិច្ចសហប្រតិបត្តិការកម្ពុជា-ខេត្តហឺណានលើវិស័យដំណាំស្រូវផងដែរ។ ទំព័រហ្វេសប៊ុកក្រសួងកសិកម្ម ក៏បានបង្ហាញលទ្ធផលនៃជំនួបខាងលើ ដោយភាគីចិន បង្ហាញចំណាប់អារម្មណ៍ចង់កែច្នៃ ស្រូវអង្ករកម្ពុជាទៅកាន់ទីផ្សារចិន និងអន្តរជាតិ។
លោក ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងថា កិច្ចសហប្រតិបត្តិការ «ត្បូងពេជ្រ» នៃប្រទេសទាំងពីរ ជាកិច្ចសហប្រតិបត្តិការគំរូដែលអាចផ្តល់ផលប្រយោជន៍ទៅវិញទៅមក និងជួយឱ្យវិស័យកសិកម្មមានភាពល្អប្រសើរឡើង តាមរយៈច្រករបៀងមច្ឆា និងអង្ករ។
រដ្ឋលេខាធិការរូបនេះ ក៏បានលើកឡើងពីគោលនយោបាយអាទិភាពក្នុងវិស័យកសិកម្ម គឺសហគមន៍កសិកម្មទំនើប ដែលភាគីចិនអាចពិនិត្យលទ្ធភាពក្នុងការផ្តល់កម្ចីដែលមានអត្រាការប្រាក់ទាប ដើម្បីចូលរួមគាំទ្រ។ បើតាមលោក ប្រាក់ ដាវីដ សហគមន៍ទំនើបនេះ អាចឆ្លើយតបទៅនឹងតម្រូវការទីផ្សារ ផលិតផលគុណភាពល្អ និងមានតម្លៃបន្ថែមខ្ពស់។
លោក ប្រាក់ ដាវីដ បានវាយតម្លៃខ្ពស់នូវការអភិវឌ្ឍខេត្តហឺណាន ដែលពោរពេញទៅដោយបច្ចេកវិទ្យាកែច្នៃ វេចខ្ចប់ ជាមួយនឹងធនធានមនុស្សក្នុងវិស័យកសិកម្ម ព្រមទាំងធនធានហរិញ្ញវត្ថុ។ សម្រាប់ចំណុចនេះ រដ្ឋលេខាធិការក្រសួងកសិកម្មរូបនេះ ចាត់ទុកជាអ្វីដែលកម្ពុជាត្រូវការ ដើម្បីវិនិយោគក្នុងវិស័យកសិកម្មកម្ពុជា ឱ្យមានភាពល្អប្រសើរ។
សូមបញ្ជាក់ថា រយៈពេល៨ខែមកនេះ កម្ពុជានាំចេញអង្ករទៅកាន់ទីផ្សារអន្តរជាតិបានចំនួន ៤១២ពាន់តោន ខណៈការនាំចេញស្រូវ គឺមានប្រមាណ ៣,៣លានតោន។ ប្រទេសដែលជាទីផ្សារអង្ករធំរបស់កម្ពុជា រួមមានប្រទេសចិន និងតំបន់រដ្ឋបាលស្វយ័ត បានបញ្ជាទិញអង្ករពីកម្ពុជាក្នុងបរិមាណ ៧៧ ៧៩២ តោន ស្មើនឹងទឹកប្រាក់ ៤៨,៨៧លានដុល្លារ៕
