កែច្នៃត្រីប្រឡាក់ ៤ឆ្នាំ អ្នកស្រី សុខ ឃីម អាចនាំចេញទៅលក់ក្រៅប្រទេស
ភ្នំពេញ៖ ផ្តើមចេញពីការកែច្នៃប្រហិតសាច់គោ ដោយសារវិបត្តិកូវីត-១៩ អ្នកស្រី សុខ ឃីម បានផ្លាស់ប្តូរមកកែច្នៃត្រីប្រឡាក់វិញដើម្បីផ្គត់ផ្គង់តម្រូវការទីផ្សារ។ ដោយមានការគាំទ្រពីអតិថិជន និងទទួលបានការបណ្តុះបណ្តាលបច្ចេកទេស ស្តង់ដា អនាម័យ ពីអង្គការមួយ នៅឆ្នាំ ២០២២ ត្រីប្រឡាក់របស់អ្នកស្រី សុខ ឃីម អាចនាំចេញទៅក្រៅប្រទេស ដូចជា អូស្តា្រលី កាណាដា និងអាម៉េរិកជាដើម។
ដើម្បីជ្រាបច្បាស់សូមលោកអ្នកទស្សនាវីដេអូខាងក្រោម៖
បើតាមម្ចាស់អាជីកម្ម មកពីខេត្តសៀមរាបរូបនេះ ត្រីដែលយកមកកែច្នៃ ជាត្រីចិញ្ចឹមបែបធម្មជាតិនៅទន្លេសាប។ ត្រីប្រឡាក់របស់អ្នកស្រី មានតម្លៃចាបពី ២ម៉ឺន ដល់១៨ម៉ឺនរៀល អាស្រ័យទៅតាមបរិមាណ និងប្រភេទត្រី។ ជាមួយគ្នានេះអ្នកស្រី សុខ ឃីម ក៏ទទូចឱ្យសាធារណជន គាំទ្រផលិតផលក្នុងស្រុក ដើម្បីឱ្យពលរដ្ឋមានការងារធ្វើ កាត់បន្ថយចំណាក់ស្រុក និងជួយសេដ្ឋកិច្ចជាតិ។
ស្រ្តីរូបនេះ បានកែច្នៃត្រីប្រឡាក់ ដូចជា ត្រីកេស, ត្រីប្រា, ត្រីរ៉ស់, ត្រីអណ្ដែង និងត្រីមួយចំនួនទៀត។ រសជាតិ និងអនាម័យ បានធ្វើឱ្យត្រីប្រឡាក់របស់អ្នកស្រី ឃីម ទទួលបានការគាំទ្រពីអតិថិជនកាន់ច្រើន។ អតិថិជនភាគច្រើន អ្នករស់នៅរាជធានីភ្នំពេញ។ មូលហេតុដែលអ្នកស្រី សុខ ឃីម កែច្នៃត្រីប្រឡាក់ទាំងនេះ ដោយសារអ្នកស្រីចង់លើកស្ទួយផលិតផលក្នុងស្រុក ជាពិសេសមានគុណភាព និងស្ដង់ដារដល់អតិថិជន។ ពីមុនមក អ្នកស្រី ឃីម ជាអ្នកកែច្នៃប្រហិត ប៉ុន្តែដោយសារតែបរិបទកូវីដ-១៩ ប្រហិតមិនអាចលក់ចេញបានទើបអ្នកស្រី កែច្នៃត្រីប្រឡាក់វិញ។
សូមបញ្ជាក់ថា សហគ្រាសនេះ ទទួលបានការគាំទ្រផ្នែកបច្ចេកទេស សម្ភារៈ បរិក្ខារ និងជំនួយបច្ចេកទេស ពីកម្មវិធីគាំទ្រសហគ្រាសជលផលខ្នាតតូច និងមធ្យម ពីអង្គការ UNIDO៕
