កសិករជាង៧ម៉ឺនគ្រួសារ បានប្រើសេវាធានារ៉ាប់រង«ស្រូវ»លើការប្រែប្រួលអាកាសធាតុ
ភ្នំពេញ៖ ការប្រែប្រួលអាកាសធាតុបានកើនឡើងពីមួយឆ្នាំទៅមួយ ដែលបាននិងកំពុងគំរាមកំហែងដល់ការដាំដុះរបស់ប្រជាកសិករ ជាពិសេសលើដំណាំស្រូវតែម្តង។ ដើម្បីការពារនូវហានិភ័យនេះ បច្ចុប្បន្នមានកសិករប្រមាណ៧,៦ម៉ឺនគ្រួសារហើយ បានប្រើប្រាស់សេវាធានារ៉ាប់រងស្រូវលើការប្រែប្រួលអាកាសធាតុ។
កសិករចំនួន ៧៦ ១០៣គ្រួសារ នៅក្នុងខេត្តគោលដៅបាត់ដំបង កំពង់ធំ និងព្រៃវែង កំពុងប្រើប្រាស់សេវាធានារ៉ាប់រងស្រូវលើការប្រែប្រួលអាកាសធាតុពីក្រុមហ៊ុនធានារ៉ាប់រង Forte ដែលជាក្រុមហ៊ុនតែមួយគត់ក្នុងចំណោមក្រុមហ៊ុនធានារ៉ាប់រងទាំង៤០នៅកម្ពុជា ដែលធានារ៉ាប់រងលើវិស័យកសិកម្ម។ បើតាមលោក នី លីហួង អគ្គនាយកធានារ៉ាប់រងខ្នាតតូច និងកសិកម្ម នៃក្រុមហ៊ុន Forte ការធានារ៉ាប់រងស្រូវលើការប្រែប្រួលអាកាសធាតុនេះ គឺដើម្បីផ្ទេរនូវហានិភ័យរបស់ប្រជាកសិករ ក៏ដូចដើម្បីធានានូវសន្តិសុខស្បៀង ផងដែរ។
ប្រសិនមិនអាចធ្វើស្រូវបានដោយសារគ្មានភ្លៀងធ្លាក់គ្រប់គ្រាន់ ឬដំណាំងស្រូវត្រូវបានជន់លិចដោយសារជំនន់ទឹកភ្លៀង នោះកសិករដែលប្រើប្រាស់សេវាកម្មធានារ៉ាប់រងស្រូវពី Forte នឹងទទួលបានសំណងក្នុងទំហំណាមួយដែលបានព្រមព្រៀងជាមួយក្រុមហ៊ុន។ «សំណងដែលយើងផ្តល់ជូនអតិថិជន គឺយើងផ្អែកលើកម្រិតទឹកភ្លៀងដែលបានធ្លាក់គ្របដណ្តប់លើផលដំណាំស្រូវរបស់កសិករ»។ លោក នី លីហួង បាននិយាយបែបនេះមកកាន់សារព័ត៌មានថ្មីៗ(ThmeyThmey)។
អ្នកជំនាញរូបនេះបន្តពន្យល់ដោយលើកឧទាហរណ៍មកបង្ហាញយ៉ាងដូច្នេះ៖ «បើមានភ្លៀងច្រើនជ្រួលធ្វើឱ្យជន់លិចដំណាំស្រូវ! នោះយើងនឹងពិនិត្យមើលថា តើការលិចនៅក្នុងកម្រិតណា ហើយយើងផ្តល់សំណងឱ្យគាត់[កសិករ] នៅក្នុងកម្រិតណាដែរ។ បើស្រូវនោះខូចខាតខ្លាំងដោយទឹកភ្លៀង យើងនឹងផ្តល់ឱ្យគាត់នៅក្នុងកម្រិតណាមួយដែរ។ អ៊ីចឹង! សំណងរបស់យើងផ្តល់ឱ្យកសិករ គឺជាចែកចេញពីកម្រិតផ្សេងៗគ្នាអាស្រ័យទៅលើទំហំខូចខាតនៃដំណាំស្រូវដោយសារការប្រែប្រួលអាកាសធាតុ»។
បើតាមលោក នី លីហួង ការផ្តល់សំណងជូនកសិករដែលប្រើប្រាស់សេវាធានារ៉ាប់រងស្រូវនេះ គឺមានរៀងរាល់ឆ្នាំ។ លោកបានរៀបរាប់ថា កាលពីឆ្នាំ២០២៣ Forte បានផ្តល់សំណងលើការធានារ៉ាប់រងស្រូវនេះអស់ប្រមាណ៥០-៦០ម៉ឺនដុល្លារ ដល់កសិករចំនួន ៩ ០០៦នាក់។ « សម្រាប់សំណងរបស់យើងឆ្នាំនេះ គឺអាចមានទំហំធំជាងឆ្នាំទៅទៀត ក៏ព្រោះតែឆ្នាំនេះមានបាតុភូតអែលនីញ៉ូបានបង្កភាពរាំងស្ងួតខ្លាំងធ្វើឱ្យប៉ះពាល់ដល់ការដាំដុះស្រូវរបស់កសិករយើងច្រើនផងដែរ»។ នេះជាការបញ្ជាក់របស់លោកអគ្គនាយកធានារ៉ាប់រងខ្នាតតូច និងកសិកម្ម នៃក្រុមហ៊ុន Forte ។
ក្នុងឆ្នាំ២០២៤ មានកសិករនៅក្នុងខេត្តបាត់ដំបង កំពង់ធំ និងព្រៃវែង ចំនួន៧៦ ១០៣គ្រួសារ បានប្រើប្រាស់សេវាធានារ៉ាប់រងស្រូវពីក្រុមហ៊ុន Forte លើការប្រែប្រួលអាកាសធាតុ។ ចំនួននេះបើធៀបនឹងឆ្នាំ២០២៣ មានកសិករចំនួន ៥៤ ៨០០គ្រួសារប៉ុណ្ណោះ។ លោក នី លីហួង បានបន្ថែមថា ចំនួនបុព្វលាភ ឬប្រាក់ដែលក្រុមហ៊ុនប្រមូលបានពីកសិករទាំងនោះក្នុងឆ្នាំនេះមានប្រមាណ៧៦ម៉ឺនលានដុល្លារ។
ក្រៅពីសេវាធានារ៉ាប់រងលើដំណាំស្រូវ, ក្រុមហ៊ុន Forte ក៏កំពុងសាកល្បងការធានារ៉ាប់រងកសិកម្មទៅលើដំណាំស្វាយ ពោត ដំឡូង និងស្វាយចន្ទី ផងដែរ។ អ្នកជំនាញដដែលរូបនេះ បានអះអាងថា សេវាធានារ៉ាប់រងនៅក្នុងវិស័យកសិកម្ម គឺពិតជាមានសារៈសំខាន់ណាស់នៅក្នុងការជួយផ្ទេរហានិភ័យរបស់ប្រជាកសិករ និងដើម្បីធានាបាននូវស្ថិរភាពសន្តិសុខស្បៀងនៅក្នុងស្រុក ឬបម្រើដល់ការនាំចេញរបស់កម្ពុជា ផងដែរ។
កាលឆ្នាំ២០២៣ កម្ពុជាជាប់ចំណាត់ថ្នាក់លេខ១០ក្នុងចំណោមប្រទេសផលិតអង្ករច្រើនជាងគេក្នុងពិភពលោក ទាំងសម្រាប់ការប្រើប្រាស់នៅក្នុងស្រុក និងសម្រាប់នាំចេញ។ ក្នុងឆ្នាំនោះកម្ពុជាបាននាំចេញអង្ករចំនួន ៦៥៦ ៣២៣តោន ទៅកាន់ប្រទេសចំនួន៦១ និងស្រូវ៤,៤លានតោន ដែលបង្កើតប្រាក់ចំណូលសរុបចំនួន១,៨ពាន់លានដុល្លារ។
សម្រាប់ឆមាសទី១ ឆ្នាំ២០២៤ កម្ពុជានាំចេញអង្ករបាន៣៣៨ ៦៥៤ តោន ក្នុងទំហំទឹកប្រាក់ជាង២៤៧លានដុល្លារ និងនាំចេញស្រូវជាង២,៥លានតោនដោយទទួលបានទឹកប្រាក់ជាង៧២៧លានដុល្លារ។ នេះបើយោងតាមរបាយការណ៍របស់សហព័ន្ធស្រូវអង្ករកម្ពុជា៕
