ទៅលេងប្រាសាទតាមាន់ និងប្រាសាទតាក្របី នឹងមានមគ្គទេសក៍ជូនទស្សនាដោយឥតគិតថ្លៃ
ទេសចរដែលមកទស្សនាប្រាសាទតាមាន់ និងប្រាសាទតាក្របី ក្នុងខេត្តឧត្តរមានជ័យ នឹងទទួលបានសេវាកម្មណែនាំពីមគ្គទេសក៍ទេសចរណ៍ ដោយឥតគិតថ្លៃ។ នេះបើតាមសំណេរលើហ្វេសប៊ុក របស់លោក មាន ចាន់យ៉ាដា អភិបាលខេត្តឧត្តរមានជ័យថ្មី។ យ៉ាងណាក៏ដោយ លោក មាន ចាន់យ៉ាដា មិនបានបញ្ជាក់ទេថា តើសេវាមគ្គទេសក៍នេះ នឹងត្រូវផ្តល់ជូនសម្រាប់តែទេសចរជាតិ ឬក៏រាប់បញ្ចូលទាំងទេសចរអន្តរជាតិដែរនោះ។
ចូលកាន់តំណែងជិត១០ថ្ងៃ អភិបាលខេត្តឧត្តរមានជ័យថ្មី បានចុះសួរសុខទុក្ខកងកម្លាំងឈរជើង តាមបណ្ដោយព្រំដែន ចំណុចប្រាសាទតាមាន់ និងប្រាសាទតាក្របីជាបន្តបន្ទាប់។ លោក មាន ចាន់យ៉ាដា ក៏ឆ្លៀតផ្សព្វផ្សាយទេសចរណ៍ក្នុងខេត្តខ្លួនដែរ និងអះអាងពីការផ្តល់មគ្គទេសក៍ឥតគិតថ្លៃ សម្រាប់ការចូលទស្សនាប្រាសាទតាមាន់ និងប្រាសាទតាក្របីទៀតផង។
លោក មាន ចាន់យ៉ាដា អភិបាលខេត្តឧត្តរមានជ័យ បញ្ជាក់ថា៖ «ដើម្បីផ្ដល់ភាពងាយស្រួលដល់ទេសចរ រដ្ឋបាលខេត្ត នឹងរៀបចំមគ្គទេសក៍ រង់ចាំជូនទេសចរចូលទស្សនាប្រាសាទតាមាន់ និងប្រាសាទតាក្របី ដោយឥតគិតថ្លៃ។»។
ក្រៅពីនេះ អភិបាលខេត្តថ្មីរូបនេះ ក៏សំណូមពរឱ្យទេសចរមកកម្សាន្តទស្សនាប្រាសាទកេរដំណែលរបស់ដូនតាខ្មែរផងដែរ។
ជុំវិញព័ត៌មានលម្អិតអំពីការផ្ដល់មគ្គទេសក៍នេះ សារព័ត៌មានថ្មីៗ មិនអាចសុំការបញ្ជាក់បន្ថែមពីលោក មាន ចាន់យ៉ាដា បាននោះទេ ដោយលោកមិនទទួលទូរសព្ទ។ សូមបញ្ជាក់ថា ប្រាសាទតាក្របី មានទីតាំងស្ថិតនៅស្រុកបន្ទាយអំពិល និងប្រាសាទតាមាន់ ស្ថិតនៅលើជួរភ្នំដងរែក នៃខេត្តឧត្តរមានជ័យ៕
ប្រាសាទតាមាន់
ប្រាសាទតាក្របី
