ភ្នំពេញ៖ តំបន់ទេសចរណ៍ចំនួន៥ក្នុងខេត្តព្រះសីហនុ ហាក់មានភាពលេចធ្លោ ដោយសារមានភ្ញៀវទេសចរជាតិ និងទេសចរអន្តរជាតិ ទៅកម្សាន្តច្រើនគួរឱ្យកត់សម្គាល់ នាឆ្នាំ២០២៣នេះ។ លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ  បានឱ្យដឹងថា​ ទេសចរនិយមទៅកម្សាន្តនៅតាមឆ្នេរអូត្រេះ, ឆ្នេរអូរឈើទាល, កោះរ៉ុង, កោះសង្សារ និងកោះពស់។

ប្រធានមន្ទីរទេសចរណ៍រូបនេះ បានលើកឡើងថា ភាពល្បីល្បាញរបស់ខេត្តមួយនេះ ​ព្រោះជាខេត្តដែលមាន សមុទ្រ ឆ្នេរ កោះ និងភ្នំស្រស់ស្អាត។ ខេត្តជាប់សមុទ្រមួយនេះ មានកន្លែងកម្សាន្តជាច្រើន សម្រាប់ឱ្យទេសចរលម្ហែអារម្មណ៍ ក៏មានទេសភាពយ៉ាងស្រស់ត្រកាលទាក់ទាញទេសចរដើរកម្សាន្តផងដែរ។

បច្ចុប្បន្ន ទេសចរភាគច្រើនទៅកម្សាន្តលេងខេត្តព្រះសីហនុ មិនសូវជាស្នាក់នៅមួយថ្ងៃ ឬពីរថ្ងៃដូចមុននោះទេ ដោយសារតែខេត្តព្រះសីហនុមានផ្លូវល្បឿនលឿនពីភ្នំពេញ-ក្រុងព្រះសីហនុ ទើបទេសចរទៅកកម្សាន្តវិលវិញល្ងាច។  តំបន់ទេសចរណ៍តាមឆ្នេរ និងកោះ  អំណោយផលពីធម្មជាតិ កំពុងទាក់ទាញភ្ញៀវទេសចរជាតិ និងអន្តរជាតិយ៉ាងច្រើន។ នេះជាការបញ្ជាក់បន្ថែមរបស់លោក តាំង សុចិត្តគ្រឹស្នា។ 


 

ប្រធានមន្ទីរទេសចរណ៍៍រូបនេះ បន្តថា៖ «ចំនួនទេសចរមកកម្សាន្តខេត្តព្រះសីហនុច្រើន ប៉ុន្តែទេសចរមិនបានស្នាក់នៅច្រើនដូចមុននោះទេ។ ទិន្នន័យនៃការថយចុះទេសចរស្នាក់នៅតាមផ្ទះស្នាក់ក្នុងខេត្តព្រះសីហនុ ធ្វើឱ្យអាជីវកម្មទេសចរណ៍ និងម្ចាស់ផ្ទះស្នាក់មួយចំនួនបាត់បង់ចំណូលរបស់ខ្លួន »។

សេវាកម្មល្អ និងទេសភាពស្រស់ស្អាត ជាកត្តាដែលធ្វើឱ្យកោះស្ដេចភ្ញៀវទេសចរមកកម្សាន្តលេងជាច្រើន។ ភ្ញៀវទេសចរទៅ ឆ្នេរអូត្រេះ, ឆ្នេរអូរឈើទាល, កោះរ៉ុង, កោះសង្សារ និងកោះពស់ ព្រោះទីនោះមានសក្តានុពលសម្បូរបែបដូចជា ភាពស្ងប់ស្ងាត់ ទេសភាពស្អាត ។ 

ដោយឡែក តំបន់ទេសចរណ៍នៅខេត្តព្រះសីហនុតែងមានភ្ញៀវទៅកម្សាន្តច្រើនរៀងរាល់សប្តាហ៍ ជាពិសេសតំបន់ឆ្នេរតែម្ដង។ ទោះយ៉ាងណា រដ្ឋបាលខេត្តព្រះសីហនុនៅតែប្រកាន់ភ្ជាប់សេវាកម្មល្អ និងបរិស្ថានស្អាត ធ្វើឱ្យខេត្តព្រះសីហនុ កាន់តែមានភាពទាក់ទាញ និងមានទេសចរទៅកម្សាន្តកើនឡើងរៀងរាល់សប្តាហ៍មិនដាច់ឡើយ។ 


 

ទេសចរភាគច្រើនទៅកម្សាន្តនៅទីនោះ ចូលចិត្តអង្គុយគយគន់សម្រស់ធម្មជាតិជាប់ឆ្នេរសមុទ្រយ៉ាងស្រស់ត្រកាល និងទេសចរជិះទូកកម្សាន្តតាមដងព្រែកទស្សនាថ្ងៃរះ ថ្ងៃលិច ដាំដើមកោងកាង បោះតង់ ចាក់ខ្យង ​ ស្ទូចត្រី ផ្ទះស្នាក់ និងអាហារសហគមន៍ផងដែរ។ ឆ្នេរចំនួនទៀតក្នុងខេត្ត រដ្ឋបាលខេត្តព្រះសីហនុ បានអភិវឌ្ឍន៍តំបន់សក្តានុពលទាំងនោះ ទៅជាតំបន់ទេសចរណ៍ធម្មជាតិផងដែរ។

សូមជម្រាបថា រយៈពេល៦ខែនៃឆ្នាំ២០២៣នេះ  ខេត្តព្រះសីហនុទទួលបានទេសចរទៅកម្សាន្តសរុបចំនួន ៣ ៣៩១ ២៣៣នាក់ កើនឡើង ៦៥ភាគរយ បើធៀបទៅនឹងឆមាសទី១នៃឆ្នាំ ២០២២ មានទេសចរចំនួន ២ ០៤៩ ៤៩៤នាក់។  ទេសចរជាង៣លាននាក់នេះ ក្នុងនោះភ្ញៀវជាតិ ចំនួន ៣ ២១៣ ៤៥១នាក់ កើនឡើង៧៦ភាគរយ និងភ្ញៀវអន្តរជាតិចំនួន ១៧៧ ៧៨២នាក់ ថយចុះ ២១ភាគរយ បើធៀបរយៈពេលដូចគ្នាឆមាសទី១នៃឆ្នាំ២០២២៕