ស្ករត្នោតកំពង់ស្ពឺប្រភេទម្សៅ ប្រមាណ៧០តោន ត្រូវបាននាំចេញទៅទីផ្សារអន្តរជាតិ និងស្ករប្រភេទសាច់ ប្រមាណ៣០តោនត្រូវបានផ្គត់ផ្គង់នៅលើទីផ្សារក្នុងស្រុក គិតចាប់ពីខែធ្នូ ឆ្នាំ២០២២ ដល់ខែឧសភា ឆ្នាំ២០២៣។ នេះបើតាមលោក វី វាសនា ជំនួយការសហគមន៍ស្ករត្នោតកំពង់ស្ពឺ បានប្រាប់សារព័ត៌មានថ្មីៗដូច្នេះ។
លោក វី វាសនា បានបញ្ជាក់ថា ទិសដៅនៃការនាំចេញ ស្ករប្រភេទម្សៅ ៧០តោននោះ មានទីផ្សារអឺរ៉ុប បារាំង អាល្លឺម៉ង។ ក្រៅពីនេះ ស្ករកំពង់ស្ពឺ ៧តោន ក៏ត្រូវបាននាំចេញទៅកាន់ទីផ្សារចិនជាលើកដំបូងផងដែរ ខណៈការបញ្ជាទិញលើកទី២ ក៏មានបរិមាណប្រហែលនឹងលើកទី១ផងដែរ។
សមាគមន៍ស្ករត្នោតកំពង់ស្ពឺ មានពលរដ្ឋជាសមាជិតចំនួន១៥០គ្រួសារ ដោយពួកគេកំពុងផលិតស្ករ២ប្រភេទ គឺប្រភេទស្ករម៉ាកសម្គាល់ភូមិសាស្រ្ត(GI) ដែលលក់បានថ្លៃ ៧៣០០ រៀល ក្នុង១គីឡូក្រាម និងប្រភេទស្ករសាច់ដែលមានតម្លៃពី ៦ ៥០០រៀល ដល់ ៧ ០០០រៀល ក្នុង១គីឡូក្រាម។ នេះបើតាមជំនួយការសហគមន៍ស្ករត្នោតកំពង់ស្ពឺ ដោយលោក វី វាសនា បន្ថែមទៀតថា សមាគមន៍មិនមែនជាទិញលក់នោះទេ គឺគ្រាន់តែគ្រប់គ្រងបរិមាណស្ករសម្រាប់នាំចេញ និងផ្គត់ផ្គង់ក្នុងស្រុកនោះទេ សមាគមន៍ក៏ជាអ្នកចរចាតម្លៃជាមួយដៃគូចែកចាយដែរ។
លោក វី វាសនា បន្ថែម៖ «ទិញដែលចាត់ទុកជាប្រភេទ GI ឬទំនិញម៉ាកស្គាល់ភូមិសាស្រ្ត គឺទំនិញវាពិសេសជាងគេ។ ហើយពិសេសេត្រង់ណា គឺដោយសារអាកាសធាតុ ការផលិតរបស់កសិករមានអនាម័យល្អ។ មួយទៀត ទំនិញ ដែលមានឈ្មោះថា GI ជាទំនិញដែលគេទទួលច្រើន។ ជាក់ស្ដែងនៅឆ្នាំ២០១៩ សហគមន៍អឺរ៉ុបទទួលស្គាល់ស្ករកំពង់ស្ពឺទាំងមូល»។
លោក វាសនា បានបន្ថែមថា ក្រៅពីនាំចេញទៅ អឺរ៉ុប បារាំង អាល្លឺម៉ង បច្ចុប្បន្នមានក្រុមហ៊ុននៅប្រទេសជប៉ុន និងប៊ុលហ្ការី កំពុងពិចារណានាំចូលស្ករត្នោតកំពង់ស្ពឺ ខណៈមានក្រុមហ៊ុននៅក្នុងស្រុក បានបង្ហាញចេតនាចង់នាំចេញស្ករត្នោតកំពង់ស្ពឺទៅទីក្រុងឌូបៃផងដែរ៕
