ដោយ: ស៊ុល រ៉វី
ភ្នំពេញ៖ ក្នុងសម័យប្រឡងជ្រើសរើសនាយទាហានក្នុងឆ្នាំ២០២៣នេះ មានបេក្ខជនចំនួន ៦ ៣៩៩នាក់ ចូលប្រឡង ក្នុងនោះមានបេក្ខនារីជិតពាក់កណ្ដាល ពោលគឺ ២ ៩៩៨នាក់។ នេះបើតាម កងទ័ពជើងគោកនៃកងយោធពលខេមរភូមិន្ទ។

ការប្រឡងនេះ ត្រូវបានរៀបចំឡើងក្នុងរាជធានីភ្នំពេញ ដោយមាន៤មណ្ឌលប្រឡង គឺ វិទ្យាល័យបាកទូក វិទ្យាល័យជាស៊ីមសន្ធរម៉ុក វិទ្យាល័យឥន្ទ្រទេវី និងវិទ្យាល័យ ហ៊ុន សែន ប៊ុន រ៉ានី វត្តភ្នំ។
 
នាពិធីបើកការប្រឡង នៅថ្ងៃទី៥មីនានេះ លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន មេបញ្ជាការកងទ័ពជើងគោក និងជាប្រធានអនុគណៈកម្មការជ្រើសរើសនាយទាហាន ជំរុញទឹកចិត្តឱ្យបេក្ខជនទាំងអស់ទុកចិត្តលើសមត្ថភាព និងចំណេះដឹងផ្ទាល់ខ្លួន​ ជាជាងពឹងផ្អែកលើកត្តាខាងក្រៅខ្លួន។ 
 
លោក ហ៊ុន ម៉ាណែត បានផ្ដល់ដំបូន្មានដល់បេក្ខជនដូច្នេះថាថា៖«ត្រូវផ្ចិតផ្ចង់ និងហ្មត់ចត់ គ្រប់ចំណុចទាំងអស់ ព្រោះពិន្ទុបន្តិចបន្តួចនោះ នឹងធ្វើឱ្យយើងជាប់ក្នុងការប្រឡងនេះបាន»៕