ដោយ៖ សែម ប្រាក់ដាវ
ភ្នំពេញ៖ កម្ពុជាទទួលបានទេសចរចិនជាង១០ម៉ឺននាក់ នៅឆ្នាំ២០២២ កើនឡើង១៣៣,៥ភាគរយ បើធៀបទៅនឹងឆ្នាំ២០២១ ដែលទទួលបានទេសចរចិនជាង៤ម៉ឺននាក់។ ក្នុងនោះរាជធានី ខេត្តចំនួន៥ ទទួលបានភ្ញៀវទេសចរចិន ដើរកម្សាន្តច្រើន។
បច្ចុប្បន្នភ្ញៀវទេសចរចិនភាគច្រើន បានសម្រុកទៅតំបន់មាត់សមុទ្រ ឆ្នេរ កោះ និងដើរទស្សនាប្រាសាទនានា ។ ជាពិសេសគឺខេត្តព្រះសីហនុ ដែលមានជនជាតិចិន កំពុងតែក្តោបក្តាប់អាជីវកម្ម ដូចជា កាស៊ីណូ សណ្ឋាគារ និងភោជនីយដ្ឋានជាដើម។
លោក តុប សុភ័ក អ្នកនាំពាក្យក្រសួងទេសចរណ៍ បានប្រាក់សារព័ត៌មានThmeyThmey25 តាមទូរស័ព្ទដៃថា ទីផ្សារទេសចរចិនបានឈរនៅលេខរៀងទី៣ បន្ទាប់ពី ថៃ និងវៀតណាម។ បើតាមលោក សុភ័ក កម្ពុជាជាគោលដៅទេសចរណ៍ដ៏ទាក់ទាញមួយសម្រាប់ចិន។
ក្នុងតំបន់ទេសចរណ៍នៅកម្ពុជា ភាគច្រើនទេសចរចិន បានមកស្នាក់នៅ និងកម្សាន្តនៅក្នុងខេត្តព្រះសីហនុច្រើនជាងគេ ក្នុងឆ្នាំ២០២២។ វត្តមានជនជាតិចិន បានផ្តល់ប្រយោជន៍ជាច្រើនសម្រាប់ការអភិវឌ្ឍ នៅក្នុងខេត្តជាប់មាត់សមុទ្រមួយនេះ។ នេះបើតាមលោក សុភ័ក។
លោក តុប សុភ័ក អ្នកនាំពាក្យក្រសួងទេសចរណ៍
អ្នកនាំពាក្យក្រសួងទេសចរណ៍រូបនេះ បញ្ជាក់ដូច្នេះ៖ « ទេសចរចិនទៅលេងខេត្តព្រះសីហនុ និងរាជធានីភ្នំពេញច្រើន។ រីឯខេត្តសៀមរាបតំបន់ប្រាសាទក៏ទទួលបានទេសចរចិនច្រើន។ ដោយឡែកខេត្តជាប់តំបន់ឆ្នេរដូចជា កំពត កោះកុងក៏ទទួលបានទេសចរចិនទៅកម្សាន្តច្រើនដែរ »។
សម្រាប់ខេត្តសៀមរាប គេសង្កេតឃើញថា វត្តមានទេសចរជនជាតិចិនច្រើន ដែលនិយមមកជាក្រុមៗ ដោយពួកគេនិយមទៅទស្សនាតំបន់វប្បធម៌ និងប្រាសាទនានាក្នុងខេត្តសៀមរាប។ ទេសចរចិនបានរួមចំណែកធ្វើឱ្យមានកំណើនសេដ្ឋកិច្ចជាតិ និងជួយអភិវឌ្ឍតំបន់នានា ក្នុងខេត្តសៀមរារ។
ចំណែកឯ កោះកុង និងខេត្តកំពតវិញ ជាខេត្តមួយដែលមានឆ្នេរស្រស់ស្អាត កោះ និងបរិយាកាសល្អ ដែលបានទាកទាញទេសចរចិន មកកម្សាន្តច្រើនដែរ។ បើតាមលោក តុប សុភ័ក ទេសចរចិនចូលចិត្តកម្សាន្តតាមឆ្នេរ និងចាយលុយដូចទេសចរពីបណ្តាប្រទេសផ្សេងៗផងដែរ។
លោក តុប សុភ័ក ថ្លែងថា៖ «ខ្ញុំមិនទាន់ប្រាប់បានទេថាទិន្នន័យទេសចរចិនកម្សាន្តតាមខេត្តនីមួយប៉ុន្មាននោះទេ ប៉ុន្តែទេសចរចិននិយមទៅកម្សាន្តនៅ តាមបណ្តាខេត្តជាប់សមុទ្រ ឆ្នេរ និងតំបន់វប្បធម៌ច្រើន»។
លោក តុប សុភ័ក ជឿថាកំណើនទេសចរចិន នឹងកើនឡើងច្រើនទ្វេដង ដោយសារសហប្រតិបត្តិការល្អ រវាងរដ្ឋាភិបាលប្រទេសទាំងពីរ ក្រោយប្រទេសចិនបានបើកប្រទេសឡើងវិញ កាលពីថ្ងៃទី៨ ខែមករា ឆ្នាំ២០២៣។
ក្រៅពីខេត្តទាំង៥នេះ បណ្តាខេត្តនានា ក៏ទេសចរចិននិយមទៅកម្សាន្តផងដែរ។ សូមបញ្ជាក់ដែរថា មន្ទីរទេសចរណ៍នឹងរៀបចំតំបន់អេកូទេសចរណ៍ និងសហគមន៍ទេសចរណ៍ ដែលមន្ទីរ និងអង្គការនានាបានរកឃើញឱ្យបានស្អាត ដើម្បីស្វាគមន៍កំណើនភ្ញៀវទេសចរចិន មកទស្សនាក្នុងរាជធានី-ខេត្តឡើងវិញ៕
-
ដោយ៖ សែម ប្រាក់ដាវ
-
© រក្សាសិទ្ធិដោយ thmeythmey25.com