ចៅអធិការវត្តទីបសិម្ពលីវនារាម ដាំព្រៃឈើឡើងវិញក្នុងវត្តអារាម
វត្តទីបសិម្ពលីវនារាម នៅភូមិកោះរការក្រៅ ឃុំកោះរការ ស្រុកកំពង់សៀម ខេត្តកំពង់ចាម មានព្រៃឈើមួយ។ តាមពិត គឺជាទីតាំងវត្តចាស់ ដែលត្រូវបានបង្កើតកាលពី ៤០០ឆ្នាំមុន។ វត្តចាស់នេះ មិនសល់អាគារបុរាណ ក្រៅពីប្រាសាទថ្មមួយ ដែលបានដួលរលំ។ តាំងពី២០ឆ្នាំមកហើយ ចៅអធិការវត្តទីបសិម្ពលីវនារាម ដាំដើមឈើ ដើម្បីពង្រីកព្រៃដល់ទំហំដូច ៥០ឆ្នាំមុន។ នាពេលនេះ ជិតជោគជ័យហើយ ដើមគគីរ ដើមនាងនួន ដើមក្រញូង ដើមពោធិ៍ កំពុងលូតលាស់យ៉ាងល្អ។ ដើមឈើពីមុន ត្រូវបានគេកាត់ ដើម្បីធ្វើទូក បន្ទាប់ពីថ្ងៃរំដោះ ៧ មករា ឆ្នាំ១៩៧៩។
ចៅអធិការវត្តទីបសិម្ពលីវនារាម មានគំនិតថា មនុស្សមកពីធម្មជាតិ ហើយត្រូវការធម្មជាតិ។ វាជួយឱ្យមនុស្សជាតិមានជីវិត លំនឹង និងភាពស្ងប់។ នេះជាមូលហេតុ ដែលត្រូវការពារ និងដាំដើមឈើ។ វត្តទីបសិម្ពលីវនារាមមានទីតាំងនៅចម្ងាយ ៩គីឡូម៉ែត្រពីទីរួមខេត្តកំពង់ចាម តាមផ្លូវខេត្ត២២៣។ វាជាប់ទន្លេមេគង្គ៕
-
ដោយ៖ នាយ យ៉ាន តាមដងផ្លូវ
-
© រក្សាសិទ្ធិដោយ thmeythmey25.com