ដោយ: អ៊ូ សុខមាន (OU Sokmean)

កម្ពុជា នាំចេញគ្រាប់ស្វាយចន្ទីទៅទីផ្សារអន្តរជាតិបានជាង៤៧ម៉ឺនតោន​ នារយៈពេល១០ខែមកនេះ។ ការនាំចេញនេះ គឺបានធ្លាក់ចុះក្នុងអត្រា៤៨,៥៩ភាគរយ បើធៀបនឹងគ្រាដូចគ្នា កាលឆ្នាំ២០២១។​

វៀតណាម ជាទីផ្សារលំដាប់លេខមួយរបស់កម្ពុជា ក្នុងការនាំចេញគ្រាប់ស្វាយចន្ទីស្រស់។ បើតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ​ ក្នុងរយៈពេល១០ខែ ឆ្នាំ២០២២​ កម្ពុជានាំចេញគ្រាប់ស្វាយចន្ទីស្រស់បានចំនួន ៤៦៩ ៥១៥.១៥តោន ដោយក្នុងនោះ នាំទៅប្រទេសវៀតណាមមានរហូតដល់ ៤៦៧ ៣០១.២២តោន។​ លើសពីនេះ កម្ពុជាក៏នាំចេញគ្រាប់ស្វាយចន្ទីប្រភេទកែច្នៃបានជិត៦០០តោន ផងដែរ។ ទីផ្សារចន្ទីកែច្នៃរបស់កម្ពុជានោះ​ មានប្រទេសថៃ​ ជប៉ុន ចិន កោះតៃវ៉ាន់ កូរ៉េខាងត្បូង និងប្រទេសស្វីស។​
 
ការនាំចេញគ្រាប់ស្វាយចន្ទីរបស់កម្ពុជា ទាំងប្រភេទស្រស់និងកែច្នៃខាងលើនេះ គឺមានការធា្លក់ចុះគួរឱ្យកត់សម្គាល់។ របាយការណ៍​ស្តីពីសភាពការណ៍កសិកម្ម បានបញ្ជាក់ថា ១០ខែមកនេះ ការនាំចេញគ្រាប់ស្វាយចន្ទីស្រស់ គឺមានធា្លក់ចុះ ៤៨,៥៩ភាគរយ ខណៈការនាំចេញគ្រាប់ចន្ទីប្រភេទកែច្នៃ ធ្លាក់ចុះអត្រា ៥៨,៩៣ភាគរយ ផងដែរ។ 
 
ពាក់ព័ន្ធនឹងធ្លាក់ចុះនៃការចេញគ្រាប់ស្វាយចន្ទីនេះ សារព័ត៌មានថ្មីៗ(ThmeyThmey)ពុំអាចសុំការពន្យល់ពីលោក ស្រី វុឌ្ឍី អ្នកនាំពាក្យក្រសួងកសិកម្ម, លោក​ គង់ ភាជ ប្រធាននាយកដ្ឋានកសិ-ឧស្សាហកម្ម និង លោក កែ មុន្ធីវុធ ប្រធាននាយកដ្ឋានការពារដំណាំ អនាម័យ និងភូតគាមអនាម័យពីក្រសួងកសិកម្មបានឡើយ ដោយទូរសព្ទហៅចូល ប៉ុន្តែគ្មានអ្នកទទួល។
លោក ប៉ែន វណ្ណរិទ្ធ ប្រធានមន្ទីរកសិកម្មខេត្តកំពង់ធំ បានលើកឡើងថា ការធ្លាក់ចុះនៃការចេញគ្រាប់ស្វាយចន្ទីនេះ គឺដោយសារបញ្ហាអាកាសធាតុ, វិបត្តិកូវីដ-១៩ រួមទាំងវិបត្តិសង្រា្គមរវាងរុស្សី-អ៊ុយក្រែន ដែលជះឥទ្ធិពលដល់ការបញ្ជាទិញពីទីផ្សារអន្តរជាតិ។  ជាមួយនឹងបញ្ហានេះ តម្លៃគ្រាប់ស្វាយចន្ទីស្រស់របស់កម្ពុជាក៏បានធ្លាក់ចុះ ផងដែរ។ 
 
លោក បញ្ជាក់ប្រាប់សារព័ត៌មានថ្មីៗ នារសៀលថ្ងៃទី១៧វិច្ឆិកា យ៉ាងដូច្នេះ៖ «​គ្រាប់ស្វាយចន្ទីស្រស់របស់ពលរដ្ឋដែលលក់ក្នុងឆ្នាំ២០២២ គឺបានតម្លៃពី១ ៣០០ ទៅ១ ៥០០ដុល្លារប៉ុណ្ណោះក្នុងមួយតោន ​បើធៀបនឹងឆ្នាំ២០២១ កសិករយើងលក់បានតម្លៃយ៉ាងហោចណាស់ ១ ៨០០ដុល្លារ »។
 
បើតាមលោក ប៉ែន វណ្ណរិទ្ធ ផ្ទៃដីដាំដុះស្វាយចន្ទីនៅខេត្តកំពង់ធំមានសរុប ១១៥ ០០០ហិកតា។ ក្នុងនោះផ្ទៃដីប្រមូលផល គឺមាន៩២ ០០០ហិកតា ដែលស្មើនឹង៨០ភាគរយនៃផ្ទៃដីដាំដុះសរុបនេះ​។​
 
យោងតាមរបាយការណ៍របស់សមាគមស្វាយ កាលឆ្នាំ២០១៩ កម្ពុជាផលិតគ្រាប់ស្វាយចន្ទីបាន ៦០ម៉ឺនតោន ឈានដល់៩៥ម៉ឺនក្នុងឆ្នាំ២០២០ និងកើនដល់១,១លានតោនក្នុងឆ្នាំ២០២១។ ប៉ុន្តែការផលិតនេះ ក៏ត្រូវបានធ្លាក់ចុះនៅត្រឹម៦៦ម៉ឺនតោន ក្នុងឆ្នាំ២០២២។ 
 
លោក អួត ស៊ីឡុត ប្រធានសមាគមស្វាយចន្ទីកម្ពុជា បានថ្លែងប្រាក់សារព័ត៌មានថ្មីៗតាមប្រព័ន្ធតេលេក្រាមថា ការផលិតស្វាយចន្ទីធា្លក់ចុះនេះ គឺបណ្តាយមកពីបញ្ហាអាកាសធាតុ។ លោក រំពឹងថា ប្រសិនអាកាសធាតុអំណោយផលល្អ ការផលិតស្វាយចន្ទី អាចកើនដល់៨០ម៉ឺនតោន ទៅ១លានតោន ក្នុងឆ្នាំ២០២៣។ 
 
ជុំវិញនៃដំណាំស្វាយចន្ទីនេះ ក្រសួងពាណិជ្ជកម្ម កំពុងកែសម្រួលនិងបន្ថែមខ្លឹមសាររួមទាំងបញ្ជូលនូវទិន្នន័យសំខាន់មួយចំនួន នៅក្នុងសេចក្តីព្រាងគោលនយោបាយជាតិ ស្តីពីស្វាយចន្ទីឆ្នាំ២០២២-២០២៧ ដើម្បីដាក់ឆ្លងកិច្ចប្រជុំពេញអង្គគណៈរដ្ឋមន្ត្រី និងអនុម័តពីសភានៅឆ្នាំចុងឆ្នាំ២០២២។ បើតាមក្រសួងពាណិជ្ជកម្ម គោលនយោបាយជាតិស្តីពីស្វាយចន្ទីនេះ គឺរៀបចំឡើងក្នុងគោលដៅបង្កើនការដាំដុះ និងនាំចេញផលិតផលគ្រាប់ស្វាយចន្ទីកែច្នៃទៅទីផ្សារអន្តរជាតិឱ្យបានកាន់តែច្រើន។
 
បច្ចុប្បន្ន កម្ពុជាមានផ្ទៃដាំដុះស្វាយចន្ទីប្រមាណ៧០ម៉ឺនហិកតា​ ដែលក្នុងនោះ មាន២០ម៉ឺនហិកតា ជាផ្ទៃដីទ្រនាប់។  កំពង់ធំ ជាខេត្តដែលមានផ្ទៃដីដាំដុះស្វាយចន្ទីច្រើនជាងគេ។​  នេះបើតាមរបាយការណ៍របស់សមាគមស្វាយចន្ទី៕