លោក គន់ គីម ទទួលបានងារជា «កិត្តិសង្គហបណ្ឌិត» ដែលមានន័យថា បណ្ឌិតប្រកបដោយកិត្តិយស និងមានចិត្តជួយសង្គ្រោះ
លោកទេសរដ្ឋមន្រ្តី គន់ គីម អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ ត្រូវព្រះមហាក្សត្រ ប្រោសព្រះរាជទានគោរមងារជា «កិត្តិសង្គហបណ្ឌិត»។ ការប្រទានគោរមងារនេះ ធ្វើឡើងតាមរយៈព្រះរាជក្រឹត្យ ដែលចេញតាំងពីថ្ងៃទី២៩ ខែតុលា ឆ្នាំ២០២២ តាមការក្រាបបង្គំថ្វាយសុំពីសម្តេចនាយករដ្ឋមន្រ្តី ហ៊ុន សែន។
កិត្តិសង្គហបណ្ឌិត មកពីពាក្យ៣ម៉ាត់ គឺ កិត្តិ + សង្គហ + បណ្ឌិត។ កិត្តិ ប្រែថា សេចក្ដីថ្កុំថ្កើង, រុងរឿង, ល្បីល្បាញ ឬក៏អាចសំដៅលើកិត្តិយស។ សង្គហ ប្រែថា ការសង្គ្រោះ។ បណ្ឌិត ប្រែថា ជនមានប្រាជ្ញា និងមានចំណេះដឹងជ្រៅជ្រះ ឬពុំចាំបាច់ប្រែក៏បាន។
កិត្តិសង្គហបណ្ឌិត មានន័យជារួមថា បណ្ឌិតប្រកបដោយកិត្តិយស និងមានចិត្តសប្បុរសក្នុងការជួយសង្គ្រោះអ្នកដទៃ។
កន្លងមក មានឥស្សរជនមួយចំនួនរួចមកហើយ ដែលទទួលបានគោរមងារជាកិត្តិសង្គហបណ្ឌិតនេះ រួមមាន អ្នកស្រី ម៉ែន សំអន ឧបនាយករដ្ឋមន្រ្តី-រដ្ឋមន្រ្តីទំនាក់ទំនងរដ្ឋសភា-ព្រឹទ្ធសភា អ្នកស្រី ឃួន សុដារី អនុប្រធានទី២នៃរដ្ឋសភា និងលោក ទេព ងន អនុប្រធានទី២នៃព្រឹទ្ធសភា៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com