ការសិក្សា៖ កុមារនៅខេត្តកណ្ដាលពីអាយុ១០ទៅ១៩ខែ បរិភោគអាហារ-ភេសជ្ជៈមិនល្អដល់សុខភាព មានអត្រាខ្ពស់
ដោយ: អ៊ូ សុខមាន (OU Sokmean)
កុមារតូចៗនៅខេត្តកណ្តាលជាទូទៅ គឺបរិភោគអាហារនិងភេសជ្ជៈមិនល្អចំពោះសុខភាព ដោយភាគច្រើនក្មេងទាំងនោះ បរិភោគទឹកដោះគោផ្អែម និង នំដែលមានរសជាតិផ្អែម និង ប្រៃ។ យោងតាមការសិក្សាស្រាវជ្រាវរបស់អង្គការហេឡែន ខេលល័រអន្តរជាតិ(HELEN KELLER) ក្នុងចំណោមកុមារអាយុពី១០ទៅ១៤ខែ ការបរិភោគមិនល្អចំពោះសុខភាព មានក្នុងអត្រា៤៥,៥ភាគរយ ដែលអត្រានេះកើនដល់៧៩ភាគរយ ក្នុងចំណោមកុមារមានអាយុ១៥ទៅ១៩ខែ។
អាហារ និងភេសជ្ជៈដែលមិនល្អចំពោះសុខភាព គឺសំដៅទៅលើអាហារ និងភេសជ្ជៈទាំងឡាយណាដែលវេចខ្ចប់លក់ជាលក្ខណៈពាណិជ្ជកម្ម ឬម៉ាកផលិតផលសម្រាប់ប្រើប្រាស់ទូទៅ។ ការសិក្សារបស់អង្គការហេទ្បែន ខេលល័រ បានបង្ហាញថា មានអាហារ-ភេសជ្ជៈ៩ក្រុម ដែលកុមារនៅខេត្តកណ្តាល បានបរិភោគមិនល្អចំពោះសុខភាព ព្រោះអាហារ និងភេសជ្ជៈទូទៅទាំងនេះ មានកម្រិតជាតិស្ករ និងអំបិលបន្ថែមខ្ពស់ ជាពិសេសគឺសារធាតុខ្លាញ់មិនល្អចំពោះសុខភាព។ ការសិក្សានេះ គឺផ្អែកតាមសូចនាករស្តីពីការចិញ្ចឹមទារក និងកុមារតូចរបស់អង្គការពិភពលោក(WHO)។
អាហារ-ភេសជ្ជទាំង៩ក្រុមដែលមិនល្អចំពោះសុខភាពកុមារនោះ មាន នំស្រួយរសជាតិផ្អែម, នំស្រួលរសជាតិប្រៃ, នំបុ័ង(នំខេក នំដូណាត់ និងពងទា), ស្ករគ្រាប់ឬនំផ្អែម(ស្ករគ្រាប់ បង្អែម សូកូឡា), ភេសជ្ជៈ, ទឹកដោះគោផ្អែម, ទឹកផ្លែឈើ, ភេសជ្ជៈរសជាតិសូកូឡា ឬស្រូសាលី និងមីកញ្ចប់។ នេះជាលទ្ធផលស្រាវជ្រាវរបស់អង្គការហេទ្បែន ខេលល័រ ដែលប្រើប្រាស់ទិន្នន័យពីការស្ទង់មតិនិងតាមដានជាប់លាប់តាមដំណាក់កាលដែលធ្វើឡើងនៅស្រុកខ្សាច់កណ្តាល ខេត្តកណ្ដាល នៃប្រទេសដែលជាតំបន់ជនបទ និងពាក់កណ្តាលទីប្រជុំជន។
ការស្រាវជ្រាវរបស់អង្គការហេទ្បែន ខេលល័រ ដែលផ្សាយនៅថ្ងៃទី២៥តុលា ឆ្នាំ២០២២ បានបញ្ជាក់ថា នៅក្នុងនោះអ្នកថែទាំកុមារអាយុពី១០ខែ-១៤ខែ មានចំនួន៥៦៧នាក់ ត្រូវបានជ្រើសរើស និងសម្ភាស ចាប់ពីដំណាក់កាលទី១ ដល់ដំណាក់កាលទី៦ នៅពេលកុមារទាំងនោះ មានអាយុដល់១៩ខែ។
ការស្រាវជ្រាវបន្តបង្ហាញយ៉ាងដូច្នេះ៖ «កុមារតូចៗនៅខេត្តកណ្តាលជាទូទៅបរិភោគអាហារនិងភេសជ្ជៈដែលមិនល្អចំពោះសុខភាពក្នុងអត្រាកើនឡើងពី ៤៥,៥ ភាគរយ ក្នុងចំណោមកុមារអាយុ ១០-១៤ ខែ ដល់ ៧៩ ភាគរយ ក្នុងចំណោមកុមារអាយុ ១៥-១៩ ខែ។ អាហារ និងភេសជ្ជៈដែលមិនល្អចំពោះសុខភាពដែលត្រូវបានបរិភោគច្រើនជាងគេគឺមានទឹកដោះគោផ្អែម និងនំដែលមានរសជាតិផ្អែម និងប្រៃ។ ពាក់កណ្តាលនៃកុមារអាយុ ១៥-១៩ ខែ កំពុងបរិភោគទឹកដោះគោផ្អែម ហើយជាង ១ ភាគ ៣ នៃកុមារអាយុនេះ កំពុងបរិភោគនំដែលមានរសជាតិផ្អែម និងប្រៃ»។
យ៉ាងណាក្ដី ការស្រាវជ្រាវនេះក៏ណែនាំដល់អាណាព្យាបាលឱ្យចៀសវាងនូវអាហារមួយចំនួន ដែលជាអាហារ និងភេសជ្ជៈផ្អែម រួមទាំងអាហារមិនល្អដល់សុខភាពកុមារចន្លោះពីអាយុ ៦ ទៅ ២៣ ខែ ដែលអាចបង្កឱ្យមានជំងឺដល់កុមារក្នុងពេលបច្ចុប្បន្ន និងអនាគត។ ការស្រាវជ្រាវពីអ្នកជំនាញទារកនិងកុមារ បានណែនាំឱ្យកុមារក្នុងចន្លោះអាយុនេះ គួរទទួលទានបន្លែ និងផ្លែឈើឱ្យបានគ្រប់គ្រាន់ និងត្រឹមត្រូវ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com