សម្តេច ហ៊ុន សែន ទុកពេល២អាទិត្យឲ្យចៅហ្វាយខេត្តបាត់ដំបង និងប៉ៃលិន ដោះស្រាយបញ្ហាដែនរដ្ឋបាលមួយកន្លែង
ដោយ៖ រួបរួម
សម្តេច ហ៊ុន សែន នាព្រឹកថ្ងៃចន្ទ ទី១៧ ខែតុលា នេះ បានបញ្ជាទៅលោក សុខ លូ អភិបាលខេត្តបាត់ដំបង និងលោកស្រី បាន ស្រីមុំ អភិបាលខេត្តប៉ៃលិន ដោះស្រាយឲ្យចប់នូវបញ្ហាព្រំប្រទល់រដ្ឋបាលមួយកន្លែងរវាងខេត្តទាំងពីរ។ ពីពិធីចែកសញ្ញាបត្រដល់និស្សិតសាកលវិទ្យាល័យជាតិគ្រប់គ្រងនៅមជ្ឈមណ្ឌលជ្រោយចង្វារ សម្តេចនាយករដ្ឋមន្ត្រី បញ្ជាក់ថា សម្តេចនឹងចុះដោះស្រាយដោយផ្ទាល់បើអភិបាលខេត្តទាំងពីរ និងអាជ្ញាធរពាក់ព័ន្ធដោះស្រាយ បញ្ហាជាង៣០ឆ្នាំនេះ មិនបានក្នុងរយៈពេល២សប្តាហ៍។
«បើពីរអាទិត្យទៀតធ្វើមិនចេញ ខ្ញុំចុះទៅតែម្តង ព្រោះវាមិនមែនកាត់ដីឲ្យបរទេសឯណា»។ សម្តេចបានបញ្ជាក់យ៉ាងដូច្នេះ បើមិនបានលម្អិតពីទីតាំងភូមិសាស្ត្រច្បាស់ឡើយ ដោយគ្រាន់តែអះអាងជាតំបន់រស់នៅរបស់ពលរដ្ឋធ្វើសមាហរណកម្មតាំងពីឆ្នាំ១៩៩៦។
ក្រៅពីនិយាយតាមទូរសព្ទជាមួយលោក សុខ លូ អភិបាលខេត្តបាត់ដំបង សម្តេច ហ៊ុន សែន ក៏បានលើកឡើងពីបញ្ហានេះ ប្រាប់សម្តេចឧបនាយករដ្ឋមន្ត្រី ស ខេង កាលពីជំនួបនៅរដ្ឋសភា ផងដែរ ដើម្បីធ្វើឲ្យករណីនេះ ឆាប់ចប់ ហើយប្រជាពលរដ្ឋបានបណ្ណកម្មសិទ្ធិត្រឹមត្រូវ។
បើតាមប្រមុខរដ្ឋាភិបាល ការដោះស្រាយមិនច្បាស់លាស់លើបញ្ហាព្រំប្រទល់ បានធ្វើឲ្យពលរដ្ឋដែលនៅទីនោះ មានការពិបាក ជាពិសេសការចុះឈ្មោះបោះឆ្នោត និងការប្រើប្រាស់សេវាកម្មផ្សេងៗ ដូចជាមីក្រូហិរញ្ញវត្ថុ ធនាគារជាដើម។ «ធ្វើប៉ុន្មានជំនាន់ហើយធ្វើអត់ចេញ»។ សម្តេចបានសម្គាល់បែបនេះ ដោយលើកឡើងថា ដីប៉ុន្មានពាន់ហិកតានៅតំបន់នោះ គួរតែកាត់ទៅឲ្យខាងប៉ៃលិន ព្រោះជិត រីឯបាត់ដំបង ធំស្រាប់ ហើយឆ្ងាយពីរដ្ឋបាលខេត្ត។
សម្តេច ហ៊ុន សែន បានបញ្ជាក់ទៅលោក សុខ លូ និងលោកស្រី បាន ស្រីមុំថា៖ «ពីរនាក់បើធ្វើអត់ទាន់បានទេ គឺខ្ញុំនឹងចុះនៅពីរអាទិត្យទៀត ឲ្យពេលវេលាតែប៉ុណ្ណឹង»។
ជាមួយគ្នានេះ សម្តេចបានលើកឡើងពីមូលដ្ឋានដែលអភិបាលខេត្តច្រើនជំនាន់ដោះស្រាយព្រំប្រទល់រដ្ឋនោះមិនចេញ។ «ចៅហ្វាយខេត្តប៉ុន្មានហើយធ្វើមិនចេញ បើតាមខ្ញុំស៊ើប វាមានអ្នកធំមួយចំនួនវាទៅចាប់ដីនៅទីនោះ ដោយទៅដាំស្វាយលើហ្នឹង អ៊ីចឹងវាទៅរារាំងរដ្ឋបាលខេត្តបាត់ដំបងកុំឲ្យកាត់ដីចូលទៅប៉ៃលិន»។
ពាក់ព័ន្ធបញ្ហាអ្នកធំរារាំងនោះ សម្តេចបានបញ្ជាក់ថា ដីស្វាយរបស់ពួកគេមិនបាត់ទៅណាឡើយ ព្រោះដីបាត់ដំបង ឬដីប៉ៃលិន នៅតែជាដីខ្មែរ ហើយពួកគេអាចបន្តទទួលបានដដែល។ សម្តេចបានបន្ថែមថា៖ «កុំចាំបាច់ទៅរារាំងគេអ៊ីចឹង ខ្ញុំស៊ើបខ្ញុំដឹងតើ ថាមូលហេតុអ្វីបានជារាប់ឆ្នាំ ដោះវាមិនចេញ សម្តេចក្រឡាហោម ក៏បាននិយាយដែរ ថា វាមិនមែនជាការកាត់ដីឲ្យជនបរទេសឯណា ជាការកាត់តម្រឹមព្រំប្រទល់រដ្ឋបាលដើម្បីឲ្យងាយគ្រប់គ្រង ព្រោះខាងប៉ៃលិន លូកមកវាជិត ពីបាត់ដំបងលូកទៅវាឆ្ងាយ»៕
