បក្សកុម្មុយនីស្តចិន៖ ផលប្រយោជន៍ជាតិ និងនយោបាយផ្ទៃក្នុង ជារឿងអាទិភាពទីមួយ
ដោយ៖ ជា ពេជ្រដាឡែន
បក្សកុម្មុយនីស្តចិន នៅថ្ងៃទី១២ ខែតុលា លើកឡើងថា បក្សរបស់ខ្លួនតែងតែចាត់ទុកផលប្រយោជន៍ជាតិជារឿងសំខាន់ទីមួយ ហើយសមាជិកតែងតែបង្ហាញស្មារតីប្រយុទ្ធក្នុងរយៈពេល៥ឆ្នាំមកនេះ។ បក្សកុម្មុយនីស្តចិនក៏អះអាងថា នយោបាយផ្ទៃក្នុងជាកត្តាអាទិភាព ទីមួយក្នុងការដោះស្រាយបញ្ហាជាមួយប្រទេសដទៃផងដែរ។
គណៈមជ្ឈិមបក្សក្មុយនីស្តចិន បានបញ្ចប់កិច្ចប្រជុំពេញអង្គលើកទីប្រាំពីររបស់ខ្លួនដោយបានលើកឡើងអំពីស្នាដៃក្នុងរយៈពេល៥ឆ្នាំកន្លងមកនេះ។ កិច្ចប្រជុំពេញអង្គបួនថ្ងៃ ជាកិច្ចប្រជុំចុងក្រោយរបស់គណៈមជ្ឈិមបក្សមុនសមាជបក្សឈានចូលមកដល់នៅថ្ងៃទី១៦ ខែតុលា។
«គណបក្សនេះ ផ្តល់អាទិភាពដល់ផលប្រយោជន៍ជាតិ និងដាក់នយោបាយផ្ទៃក្នុងជាដំបូង ហើយរក្សាភាពអត់ធ្មត់ជាយុទ្ធសាស្ត្រ បង្ហាញស្មារតីប្រយុទ្ធ និងតស៊ូដើម្បីការពារសេចក្តីថ្លៃថ្នូរ និងផលប្រយោជន៍ជាតិ»។ ទីភ្នាក់ងារព័ត៌មាន Xinhua បានរាយការណ៍បែបនេះដោយស្រង់សេចក្ដីប្រកាសរបស់កិច្ច។
ក្នុងសេចក្ដីប្រកាសដដែល បក្សកុម្មុយនីស្តចិនក៏រៀបរាប់ពីសមិទ្ធិផលរបស់ខ្លួនក្នុងការគ្រប់គ្រងយ៉ាងល្អលើការកាត់បន្ថយហានិភ័យ និងបញ្ហាកើតឡើងពីវិបត្តិនៅអ៊ុយក្រែន ការតស៊ូប្រឆាំងនឹងការបំបែកខ្លួន និងការជ្រៀតជ្រែកពីបរទេស និងព្រមទាំងការចាត់វិធានការដ៏តឹងរ៉ឹងក្នុងការទប់ស្កាត់ជំងឺកូវីដ-១៩។
ស្របពេលជាមួយគ្នានេះ ចិនក៏បានរិះគន់អ្វីដែលខ្លួនមើលឃើញជាការជ្រៀតជ្រែករបស់លោកខាងលិចនៅក្នុងកិច្ចការទីក្រុងហុងកុង និងបញ្ហាជាមួយតៃវ៉ាន់ដែលចិនទាមទារការគ្រប់គ្រងផងដែរ។
នាសមាជបក្សដែលរៀបចំ៥ឆ្នាំម្ដង បក្សកុម្មុយនីស្តចិន នឹងផ្លាស់ប្ដូរក្បាលម៉ាស៊ីនដឹកនាំរបស់ខ្លួន តែលោក ស៊ី ជិនភីង រំពឹងថា នឹងបន្តកាន់អំណាចអគ្គលេខាធិការគណៈមជ្ឈិមបក្សនៅអាណត្តិទី៣ ដែលមានរយៈពេល៥ឆ្នាំទៀត។ បក្សកុម្មុយនីស្តចិន ក៏នឹងកែធម្មនុញ្ញបក្សដើម្បីលើកអំណាចឱ្យលោក ស៊ី ថែមទៀត៕
រូបភាព៖ កិច្ចប្រជុំគណៈមជ្ឈិមបក្សកុម្មុយនីស្តចិន។ រូបថត Xinhua
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com