កម្ពុជា បោះឆ្នោតប្រឆាំងរុស្ស៊ីលេបយកទឹកដីអ៊ុយក្រែន
ដោយ៖ តន ចាន់រិទ្ធារ៉ា
តំណាងកម្ពុជានៅអង្គការសហប្រជាជាតិ នៅថ្ងៃទី១២ ខែតុលា បានបោះឆ្នោតគាំទ្រសេចក្ដីស្នើដំណោះស្រាយរបស់មហាសន្និបាតអង្គការសហប្រជាជាតិដែលថ្កោលទោសការលេបយកទឹកដីអ៊ុយក្រែនពីសំណាក់រុស្ស៊ី។ មហាសន្និបាត ក៏អំពាវនាវឱ្យប្រទេសទាំងអស់កុំទទួលស្គាល់តំបន់ទាំង៤ ដែលរុស្ស៊ីបញ្ចូលជាទឹកដីរបស់ខ្លួនដែរ។
កម្ពុជាស្ថិតក្នុងចំណោមប្រទេស១៤៣ ដែលបោះឆ្នោតគាំទ្រសេចក្ដីស្នើដំណោះស្រាយរបស់មហាសន្និបាតដែលមានចំណងជើងថា ការការពារគោលការណ៍ធម្មនុញ្ញអង្គការសហប្រជាជាតិ។ ប្រទេសដែលបោះឆ្នោតប្រឆាំងមានរុស្ស៊ី ស៊ីរី នីការ៉ាហ្កា កូរ៉េខាងជើង និងបេឡារុស។ ចិន និងឥណ្ឌាស្ថិតក្នុងចំណោមប្រទេសដែលបោះឆ្នោតអនុបវាទ។
សម្រាប់តំបន់អាស៊ាន ក្រៅពីកម្ពុជា សិង្ហបុរី ឥណ្ឌូណេស៊ី ម៉ាឡេស៊ី ហ្វីលីពីន ព្រុយណេ ក៏បោះឆ្នោតគាំទ្រដែរ។ ថៃ វៀតណាម និងឡាវ បោះឆ្នោតអនុបវាទ។
ដំណោះស្រាយដែលត្រូវបានអនុម័តនេះ មិនមានការចាប់បង្ខំឱ្យអនុវត្តឡើយ។ ដំណោះស្រាយចាត់អះអាងថា តំបន់ Donetsk, Kherson, Luhansk និង Zaporizhzhia ត្រូវបានគ្រប់គ្រងបណ្ដោះអាសន្នដោយរុស្ស៊ី ដែលជាការបំពានបូរណភាពទឹកដី ឯករាជ្យ និងអធិបតេយ្យអ៊ុយក្រែន។
ការបោះឆ្នោតនៅមហាសន្និបាត ធ្វើឡើងក្រោយការបោះឆ្នោតនៅក្រុមប្រឹក្សាសន្តិសុខជាប់គាំងដោយសាររុស្ស៊ីវ៉េតូ។ ការសម្រេចរបស់ប្រឹក្សាសន្តិសុខ មានអំណាចចាប់បង្ខំឱ្យអនុវត្តបាន៕
រូបភាព៖ កិច្ចប្រជុំមហាសន្និបាតអង្គការសហប្រជាជាតិ។
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com