តុលាការមីយ៉ាន់ម៉ាកាត់ទោសលោកស្រី ស៊ូជី ឱ្យជាប់គុកថែម៣ឆ្នាំទៀតពីបទអំពើពុករលួយ
ដោយ ឈួន ឈីវអ៊ីង
តុលាការដែលគ្រប់គ្រងដោយយោធាមីយ៉ាន់ម៉ា នៅថ្ងៃទី១២ ខែតុលា បានកាត់ទោសអតីតមេដឹកនាំលោកស្រី អ៊ុងសាន ស៊ូជី ឱ្យជាប់ពន្ធនាគារចំនួន៣ឆ្នាំបន្ថែមទៀតបន្ទាប់ពីលោកស្រីត្រូវបានរកឃើញថា មានពិរុទ្ធពីបទទទួលសំណូកពីអ្នកជំនួញក្នុងស្រុកម្នាក់។ នេះបើតាមការផ្សាយរបស់ទីភ្នាក់ងារព័ត៌មានReuters ដែលស្រង់សម្ដីប្រភពដឹងពីសវនាការនេះ។
ម្ចាស់ពានរង្វាន់ណូបែលសន្តិភាពវ័យ ៧៧ឆ្នាំ លោកស្រី អ៊ុងសាន ស៊ូជី ត្រូវបានកាត់ទោសនៅថ្ងៃទី១២ ខែតុលា ដោយតុលាការក្នុងក្រុងណៃពិដោពីបទប្រព្រឹត្តអំពើពុករលួយដោយទទួលសំណូកពីអ្នកជំនួញក្នុងស្រុក។ លោកស្រី ស៊ូជី ត្រូវបានកាត់ទោសចំនួនពីរករណី ដោយត្រូវដាក់ពន្ធនាគាររយៈពេលបីឆ្នាំបន្ថែមទៀត។
តុលាការមីយ៉ាន់ម៉ាបានសម្រេចថា អតីតមេដឹកនាំមីយ៉ាន់ម៉ារូបនេះបានទទួលសំណូកចំនួន៥៥ម៉ឺនដុល្លារពីមហាសេដ្ឋីសំណង់ លោក Maung Waik។ ប្រភពដដែលប្រាប់ទីភ្នាក់ងារព័ត៌មាន Reuters បែបនេះ
លោកស្រី ស៊ូជី បានប្រតិកម្មចំពោះការចោទប្រកាន់លើខ្លួនថាជារឿងមិនសមហេតុផលឡើយ ហើយបានបដិសេធរាល់សកម្មភាពដែលតុលាការចោទប្រកាន់។
ក្រុមមេធាវីរបស់លោកស្រី គ្រោងនឹងប្តឹងឧទ្ធរណ៍ចំពោះសាលក្រមនេះ។
បច្ចុប្បន្ន លោកស្រី ស៊ូជី កំពុងឃុំខ្លួនដាច់ពីគេនៅក្នុងពន្ធនាគារក្រុងណៃពិដោ ហើយការកាត់ទោសរបស់លោកស្រី ត្រូវបានធ្វើឡើងនៅក្នុងតុលាការអសាធារណៈ។ នេះបើតាមទីភ្នាក់ងារព័ត៌មាន Reuters។
កន្លងមកលោកស្រី ស៊ូជី បានប្រឈមមុខនឹងការចោទប្រកាន់យ៉ាងហោចណាស់១៨បទល្មើសរួចទៅហើយដែលមានទាំងបទចោទបន្លំសន្លឹកឆ្នោត បទចោទ៥ករណីជុំវិញការទិញ និងជួលឧទ្ធម្ភាគចក្រ ក៏ដូចជាការនាំចូលខុសច្បាប់ ការកាន់កាប់វិទ្យុទាក់ទងខុសច្បាប់ និងបំពានវិធានការទប់ស្កាត់ជំងឺកូវីដ-១៩ជាដើម។ ទោសជាប់ពន្ធនាគាររបស់លោកស្រី ស៊ូជី បើគិតជារយៈពេលអតិបរមារួមបញ្ចូលគ្នាមានជិត ១៩០ឆ្នាំឯណោះ។
ក្រុមអ្នកប្រឆាំងរបបយោធាបាននិយាយថា ការចោទប្រកាន់នេះ មានគោលបំណងរារាំងលោកស្រីមិនឲ្យត្រឡប់មកធ្វើនយោបាយម្តងទៀត ឬមិនឱ្យមានឱកាសប្រឆាំងនឹងការកាន់កាប់អំណាចរបស់យោធាចាប់តាំងពីរដ្ឋប្រហារកាលពីឆ្នាំ២០២១។ អ្នកនាំពាក្យរបបយោធារបស់លោក មីន អ៊ុងឡាំង មិនបានផ្ដល់ការអត្ថាធិប្បាយទេជុំវិញរឿងនេះ។ យ៉ាងណាមិញ របបយោធាអះអាងថា តុលាការមីយ៉ាន់ម៉ាមានឯករាជ្យភាព ហើយអ្នកទោសកំពុងទទួលបានដំណើរការកាត់ក្ដីដ៏ត្រឹមត្រូវ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com