ដោយ៖ ញឹក សំអូន

ភ្នំពេញ៖ លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា នៅក្នុងត្រីមាសទី៤នេះ ការនាំចេញកាបូប ស្បែកជើង និងសម្លៀកបំពាក់ នៅក្នុងវិស័យកាត់ដេរបានថយចុះ ១០ភាគរយ ដោយសារវិបត្តិសង្រ្គាមរុស្ស៊ី និងអ៊ុយក្រែន។

បើតាមលោក ហេង សួរ បញ្ហាវិបត្តិសង្គ្រាមរុស្ស៊ី និងអ៊ុយក្រែន ដែលបានធ្វើឱ្យអតិផរណានៅអឺរ៉ុបកើនឡើងខ្លាំង។ អ្នកនាំពាក្យរូបនេះ បន្ថែមថា អតិផរណានៅអឺរ៉ុបកើនឡើងខ្លាំង ដែលនាំឲ្យការចំណាយរបស់ប្រជាពលរដ្ឋកាន់តែច្រើន ហើយកាត់បន្ថយការប្រើប្រាស់សម្លៀកបំពាក់ និងការបញ្ជាទិញពីម្ចាស់ម៉ាកនានា ។ 

ថ្លែងនៅក្នុងសន្និសីទសារព័ត៌មានស្ដីពី«សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងការងារ និងបណ្ដុះបណ្ដាលវិជ្ជាជីវៈ» នៅព្រឹកថ្ងៃទី១២តុលា លោក ហេង សួរ បន្ថែមថា៖« មិនដឹងវិបត្តសង្គ្រាមរុស្ស៊ី និងអ៊ុយក្រែន វាបញ្ចប់នៅថ្ងៃណា។ នេះជាកង្វល់មួយក្នុងការយកចិត្តទុកដាក់ តាមដានទាំងអស់គ្នា​ តើស្ថានភាពនៃវិស័យកាត់ដេរវានឹងទៅជាយ៉ាងម៉េចយើងមិនដឹងនោះទេ។ តែអ្វីដែលយើងបានជួបម្ចាស់ម៉ាកបញ្ជាទិញនៅកម្ពុជា បានប្ដេជ្ញាបន្តបញ្ជាទិញទំនិញពីកម្ពុជាឱ្យបានច្រើនផងដែរ»។

យ៉ាងណាមិញលោក ហេង សួរ ក៏បានអះអាងថា វិស័យកាត់ដេររួមចំណែកច្រើនជាមួយសេដ្ឋកិច្ចកម្ពុជា ដែលបានជួយបង្កើតការងារឱ្យប្រជាពលរដ្ឋប្រមាណ ៨៣ម៉ឺននាក់។ ជាពិសេសបង្កើតការងារដោយប្រយោលដល់អ្នកលក់ដូរ និងការផ្ដល់សេវាដឹកជញ្ជូនផងដែរ។ បើតាមលោក ហេង សួរ មនុស្សជិត ២លាននាក់ បានទទួលផលពីវិស័យកាត់ដេរនេះ។ 

បច្ចុប្បន្នពលករដែលកំពុងធ្វើការងារតាមបណ្ដាប្រទេសផ្សេងៗ ជាង១លាន ៣សែននាក់ ។ បើតាមការព្យាករ ពួកគេបានផ្ទេរប្រាក់ឱ្យក្រុមគ្រួសារមានចំនួន ២៧០០លានដុល្លារ ។ នេះបើតាមលោក ហេង សួរ៕


រូបភាព៖ លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ។ រូបភាព៖ អង្គភាពអ្នកនាំពាក្យរដ្ឋាភិបាល