ប្រធានទីភ្នាក់ងារស៊ើបការសម្ងាត់អង់គ្លេស ព្រមានពីឥទ្ធិពលបច្ចេកវិទ្យាចិន តែចិនច្រានចោល
ដោយ ឈួន ឈីវអ៊ីង
ឥទ្ធិពលផ្នែកបច្ចេកវិទ្យារបស់ចិនដែលកំពុងរីកលូតលាស់យ៉ាងលឿន ក្លាយជាបញ្ហាបន្ទាន់កាន់តែខ្លាំង សម្រាប់បណ្តាប្រទេសលោកខាងលិច ដែលត្រូវតែធ្វើសកម្មភាពដើម្បីការពារតម្លៃ និងឥទ្ធិពលខ្លួន។ ប្រធានទីភ្នាក់ងារស៊ើបការណ៍សម្ងាត់ (GCHQ) របស់អង់គ្លេសបានព្រមានបែបនេះនៅថ្ងៃទី១១ ខែតុលា។
នៅក្នុងសុន្ទរកថាទៅកាន់ក្រុមអ្នកវិភាគផ្នែកការពារជាតិ RUSI នៅក្រុងឡុងដ៍ លោក Jeremy Fleming ប្រធានទីភ្នាក់ងារស៊ើបការណ៍សម្ងាត់អង់គ្លេស បានសង្កត់ធ្ងន់លើសន្ទុះរីកចម្រើនយ៉ាងលឿននៃវិស័យបច្ចេកវិទ្យារបស់ចិន ដែលកំពុងក្លាយជាបញ្ហាបន្ទាន់គួរគិតពិចារណារ។ លោក Fleming អះអាងថា វិស័យបច្ចេកវិទ្យាចិននឹងគំរាមកំហែងដល់តម្លៃ ក៏ដូចជាឥទ្ធិពលរបស់បណ្ដាប្រទេសលោកខាងលិច។
«បច្ចេកវិទ្យាមិនគ្រាន់តែសម្រាប់ផ្ដល់ឱកាស សម្រាប់ការប្រកួតប្រជែង និងកិច្ចសហការប៉ុណ្ណោះទេ វាបានក្លាយជាសមរភូមិសម្រាប់ការគ្រប់គ្រង តម្លៃ និងឥទ្ធិពលផងដែរ»។ លោក Fleming លើកឡើងបែបនេះ។ ប្រធានទីភ្នាក់ងារស៊ើបការណ៍របស់អង់គ្លេសបន្ថែមថា ចិនព្យាយាមស្វែងរកភាពលេចធ្លោនៅក្នុងវិស័យបច្ចេកវិទ្យាថ្មីៗ ដូចជាការរុករកតាមផ្កាយរណប ជាមួយនឹងប្រព័ន្ធ BeiDou របស់ខ្លួន និងការបង្កើតរូបិយប័ណ្ណឌីជីថល «ប្រាក់យ័នឌីជីថល» ថែមទៀត។
លោក Fleming និយាយថា ថ្នាក់ដឹកនាំចិន មើលឃើញការរីកចម្រើនផ្នែកបច្ចេកវិទ្យាជាឧបករណ៍ផ្ដល់អត្ថប្រយោជន៍តាមរយៈការជួយគ្រប់គ្រងទីផ្សាររបស់ពួកគេ និងប្រជាជនរបស់ពួកគេ ហើយចិនមើលឃើញប្រទេសនានាជាសត្រូវ ឬជាអតិថិជនដ៏មានសក្តានុពល ដែលអាចគំរាម បង្ខិតបង្ខំ ឬបញ្ចុះបញ្ចូលទៀតផង។
ហេតុនេះ ប្រធានទីភ្នាក់ងារសន្តិសុខអ៊ីនធឺណិតរូបនេះបានបានជំរុញឱ្យបណ្ដាប្រទេសលោកខាងលិចធ្វើសកម្មភាព និងវិនិយោគលើវិស័យបច្ចេកវិទ្យាជំនាន់ក្រោយឱ្យបានខ្លាំងក្លាដែរ។
បើតាមទីភ្នាក់ងាព័ត៌មាន AFP លោក Fleming ព្រមានបណ្ដាប្រទេសលោកខាងលិចថា នៅពេលដែលចិនពង្រីកឥទ្ធិពលរបស់ខ្លួនបន្តិចម្តងៗ និងដាក់បច្ចេកវិទ្យារបស់ខ្លួនឱ្យប្រើជាសាកល ជាពិសេសនៅក្នុងប្រទេសកំពុងអភិវឌ្ឍនោះ បណ្តាប្រទេសលោកខាងលិចត្រូវតែត្រៀមខ្លួនជាស្រេចដើម្បីផ្ដល់ដំណោះស្រាយដែលអាចអនុវត្តប្រកបដោយប្រសិទ្ធភាព មានតម្លៃសមរម្យ និងដំណោះស្រាយដែលគាំទ្រដោយមូលនិធិអន្តរជាតិ ឬការវិនិយោគ។
យ៉ាងណាមិញ ទីក្រុងប៉េកាំងបានប្រតិកម្ម និងច្រានចោលដាច់អហង្ការចំពោះការលើកឡើងរបស់លោក Fleming។ អ្នកនាំពាក្យក្រសួងការបរទេសចិន លោកស្រី Mao Ning បាននិយាយថា ការអះអាងរបស់លោក Fleming គ្មានមូលដ្ឋានពិតប្រាកដទេ ព្រោះចិនអភិវឌ្ឍហិរញ្ញវត្ថុ និងបច្ចេកវិទ្យា ដើម្បីជួយប្រជាជនចិនឱ្យមានជីវភាពរស់នៅកាន់តែប្រសើរឡើង។ លោកស្រី Mao បន្ថែមថាចិនមិនកំណត់គោលដៅចំពោះអ្នកណាម្នាក់ឡើយ ហើយមិនបង្កើតជាការគំរាមកំហែងទេ៕
លោក Jeremy Fleming នាយកទីភ្នាក់ងារស៊ើបការណ៍អង់គ្លេស។ រូបថត AFP
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com