ដោយ៖ ញ៉ែម ចាន់

បាត់ដំបង៖  ពលរដ្ឋបីគ្រួសារ រស់នៅ ភូមិអូរចារ សង្កាត់អូរចារ ក្រុងបាត់ដំបង កំពុងកាកកប លើរបរធ្វើសំបកសាយ៉ ឬឡត និងនំឆាងប៉ពា ដោយក្នុងមួយថ្ងៃអាចលក់បាន ១០០ទៅ៥០០គីឡូក្រាមឯណោះ។  សំបកសាយ៉ និងសំបកឆាងប៉ពា ត្រូវបានគេពេញនិយម យកធ្វើនំ និងធ្វើជាម្ហូបក្នុងពិធីមង្គលការ និងពិធីបុណ្យផ្សេងៗ។

ដើម្បីជ្រាបច្បាស់សូមអញ្ជើញលោកអ្នកទស្សនាវីដេអូខាងក្រោម៖

សំបកនំឆាងប៉ពា សាយ៉ និង ឡត ត្រូវបានធ្វើអំពីម្សៅមី លាយជាមួយគ្រឿងផ្សំផ្សេងទៀត ។ អ្នកស្រី សែម ស្រី ប្រកបរបរនេះ ប្រមាណ ១០ឆ្នាំ បានឱ្យដឹងថា ក្នុងមួយថ្ងៃអ្នកស្រី ធ្វើបាន ២០ គីឡូក្រាម និងរកប្រាក់ចំណេញបានប្រមាណ៦ម៉ឺនរៀលក្នុងមួយថ្ងៃ ដោយលក់ក្នុងតម្លៃ ៨០០រៀល ក្នុងមួយថ្ងៃ ។ អ្នកស្រីថា សំបកទាំងអស់មិនពិបាកលក់ឡើយ ដោយមានអតិថិជនបញ្ជាទិញជាប្រចាំ។

ចំណែក អ្នកស្រី ហ៊ួ សុភាព ដែលប្រកបរបរនេះ ប្រមាណ ២០ឆ្នាំ  ក៏បានរៀបរាប់ថា សព្វថ្ងៃនេះ សំបក សាយ៉ ឬឡត សម្បូរ អថិតិជនបញ្ជាទិញច្រើនគួរសម  ជាពិសេសក្នុងរដូវមង្គលការ ដែលអ្នកស្រី អាចលក់បាន រហូត ៥០០ គីឡូក្រាមក្នុងមួយថ្ងៃ៕