ក្រុងកំពង់ឆ្នាំង ត្រូវបានទទួលស្គាល់ជាក្រុងបញ្ចប់ការបន្ទោបង់ពាសវាលពាសកាល
ដោយ: អ៊ូ សុខមាន (OU Sokmean)
ក្រុងកំពង់ឆ្នាំង ត្រូវបានទទួលស្គាល់ជាក្រុងបានបញ្ចប់ការបន្ទោបង់ពាសវាលពាសកាល(ODF)។ ក្រុងនេះ ក្លាយជាក្រុងគំរូដំបូងគេក្នុងចំណោមក្រុង-ស្រុកទាំង៨ នៃខេត្តកំពង់ឆ្នាំង។
ក្រសួងអភិវឌ្ឍន៍ជនបទ ប្រកាសទទួលស្គាល់ក្រុងកំពង់ឆ្នាំង ដែលបានបញ្ចប់ការបន្ទោបង់ពាសវាលពាសកាល (ODF) ដំបូងគេបង្អស់ ក្នុងចំណោមក្រុង-ស្រុកទាំង ៨ នៅខេត្តកំពង់ឆ្នាំង។ លទ្ធផលដែលសម្រេចបាននេះ គឺជាការរួមចំណែកយ៉ាងធំ ជាមួយរាជរដ្ឋាភិបាលក្នុងការផ្គត់ផ្គង់ទឹក ការសម្អាត និងអនាម័យជនបទ។
នាពិធីប្រកាសទទួលស្គាល់ជាផ្លូវការក្រុងកំពង់ឆ្នាំងជាក្រុងបញ្ចប់ការបន្ទោបង់ពាសវាលពាសកាល នាថ្ងៃទី១៧ឧសភា ឆ្នាំ២០២២ លោក ស៊ុន សុវណ្ណារិទ្ធ អភិបាលខេត្តកំពង់ឆ្នាំង បានថ្លែងថា លទ្ធផលដែលខេត្តទទួលបាននេះ បង្ហាញឱ្យឃើញពីការយកចិត្តទុកដាក់របស់រាជរដ្ឋាភិបាល និងក្រសួងអភិវឌ្ឍន៍ជនបទក្នុងការលើកទឹកចិត្តដល់រដ្ឋបាលថ្នាក់ក្រោមជាតិ ឱ្យកាន់តែមានកម្លាំងចិត្តកាន់តែខ្លាំងក្លាថែមទៀត ក្នុងការបំពេញតួនាទីភារកិច្ចលើកកម្ពស់សុខុមាលភាព និងជីវភាពរស់នៅរបស់ប្រជាពលរដ្ឋនៅមូលដ្ឋាន។
អភិបាលខេត្តកំពង់ឆ្នាំងបន្តនិយាយដូច្នេះ៖ « ខ្ញុំសូមចូលរួមសាទរយ៉ាងក្រៃលែង ជាមួយបងប្អូនប្រជាពលរដ្ឋ និងអាជ្ញាធរគ្រប់លំដាប់ថ្នាក់ក្នុងក្រុងកំពង់ឆ្នាំង ដែលត្រូវបានគណៈកម្មការវាតតម្លៃទទួលស្គាល់ជាផ្លូវការ ក្លាយជាក្រុង/ស្រុកគំរូទីមួយ ក្នុងខេត្តកំពង់ឆ្នាំង ដែលសម្រេចបានបញ្ចប់បន្ទោបង់ពាសវាលពាសកាល នាថ្ងៃនេះ»។
ពិធីប្រកាសទទួលស្គាល់ជាផ្លូវការក្រុងកំពង់ឆ្នាំងជាក្រុងបញ្ចប់ការបន្ទោបង់ពាសវាលពាសកាល នាថ្ងៃទី១៧ឧសភា ឆ្នាំ២០២២។ រូបថត៖ ក្រសួងអភិវឌ្ឍន៍ជនបទ
បើតាមលោក ស៊ុន សុវណ្ណារិទ្ធ ក្រៅពីក្រុងកំពង់ឆ្នាំងបានសម្រេចការបញ្ចប់បន្ទាបង់ពាសវាលពាសកាលនេះ ក៏មានឃុំចំនួន២៣ និងភូមិ ២១៩នៅទូទាំងខេត្ត ក៏បានបញ្ចប់ការបន្ទោបង់ពាសវាលពាសកាលនេះ ផងដែរ។ លោក បានបញ្ជាក់ថា៖«តាមរយៈការប្រកាសទទួលបានក្រុងកំពង់ឆ្នាំងមានODFនេះ នឹងជំរុញការងារផ្គត់ផ្គង់ទឹកស្អាត សុខភាព អនាម័យជនបទក្នុងខេត្តកំពង់ឆ្នាំងទាំងមូលកាន់តែមានការអភិវឌ្ឍរីកចម្រើនខ្លាំងថែមទៀត។ ជាពិសេសការពង្រីកវិសាលភាពភូមិ ឃុំ ស្រុកគោលដៅបន្ថែមទៀត ដើម្បីឈានទៅសម្រេចបានខេត្តបញ្ចប់ការបន្ទោបង់ពាសវាលពាសកាល នៅឆ្នាំ២០៣០ ដែលបានគ្រោងទុក»។
បច្ចុប្បន្ននៅទូទាំងខេត្តកំពង់ឆ្នាំង អត្រាពលរដ្ឋមានប្រភពទឹកប្រើប្រាស់ចំនួន៧៦ភាគរយ ស្មើនឹង ១០៦ ៨៩៨ខ្នងផ្ទះ និងពលរដ្ឋដែលមានបង្គួនអនាម័យប្រើប្រាស់ មាន៨០ភាគរយ ស្មើនឹង ១០០ ៤១០ខ្នងផ្ទះ។ នេះជារៀបរាប់បន្ថែមរបស់លោកស៊ុន សុវណ្ណារិទ្ធ។
កាលពីថ្ងៃទី២៧មេសា ឆ្នាំ២០២២ លោក អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ ប្រកាសថា ខេត្តស្វាយរៀង បានក្លាយជាខេត្តទី១ ដែលបានបញ្ចប់ការបន្ទោបង់ពាសវាលពាសកាលទាំងស្រុង(ODF)១០០ភាគរយ ដែលគ្រប់ខ្នងផ្ទះទាំងអស់នៅខេត្តស្វាយរៀង គឺសុទ្ធតែមានបង្គន់អនាម័យប្រើប្រាស់។ ខេត្តនេះ ស្ថិតនៅក្នុងគោដៅ ដែលក្រសួងអភិវឌ្ឍន៍ជនបទ កំណត់យកខេត្តចំនួន៥ ក្នុងចំណោមរាជធានី-ខេត្តទាំង២៥ ឱ្យរួចផុតពីការបន្ទោបង់ពាសវាលពាសទាំងស្រុង កាលនៅត្រឹមឆ្នាំ២០២៣។
លោក អ៊ុក រ៉ាប៊ុន បានបញ្ជាក់នៅក្នុងពិធីប្រកាសទទួលស្គាល់ជាផ្លូវការក្រុងកំពង់ឆ្នាំងជាក្រុងបញ្ចប់ការបន្ទោបង់ពាសវាលពាសកាល នាថ្ងៃទី១៧ឧសភា ថា ខេត្តគោលដៅODFទាំង៥នោះ ក្រៅពីខេត្តស្វាយរៀង គឺមានខេត្តកំពង់ឆ្នាំង កែប ព្រៃវែង និងខេត្តកំពង់ស្ពឺ៕
