សាលាបារាំងចុងបូព៌ា ប្រគល់វត្ថុបុរាណ១៤៦កេស ឱ្យអាជ្ញាធរជាតិអប្សរារក្សាទុក
ដោយ៖ ប៉ូ សុភា
ភ្នំពេញ៖ សាលាបារាំងចុងបូព៌ា បានប្រគល់វត្ថុបុរាណចំនួន១៤៦កេស រួមមានសិលាចារឹក ព្រះពុទ្ធរូបសរសរឈើជាដើមប្រគល់ជូនអាជ្ញាធរជាតិអប្សរារក្សាទុក។ វត្ថុទាំងនេះបានពីការធ្វើកំណាយ នៅប្រាសាទមេបុណ្យខាងលិច ចាប់ពីឆ្នាំ២០១២ ដល់ឆ្នាំ២០១៧។
សាលាបារាំងចុងបូព៌ា (EFEO) បានប្រគល់បុរាណវត្ថុចំនួន១៤៦កេស ដែលបានរកឃើញក្នុងពេលធ្វើកំណាយស្រាវជ្រាវក្នុងឆ្នាំ២០១២ដល់ឆ្នាំ២០១៧ អំឡុងពេលជួសជុលប្រាសាទមេបុណ្យខាងលិច ដល់អាជ្ញាធរជាតិអប្សរា ដើម្បីរក្សាទុក។
វត្ថុទាំងនោះរួមមាន កំណាត់សរសរឈើ ចំនួន១១ដើម និងសិលាចារឹក១ផ្ទាំង។ វត្ថុផ្សេងទៀត ភាគច្រើនជាបំណែកភាជន៍ដែលមានស្រទាប់រលោង និងពុំមានស្រទាប់រលោង, វត្ថុសំណាក
(ដីសម្រាប់វិភាគ) បំណែកចម្លាក់ថ្មភក់ និងថ្មភក់បំណែកលោកហៈធាតុ ដូចជាដែក ស្ពាន់ លង្ហិន ជាពិសេសជាងនេះគឺព្រះពុទ្ធរូបធ្វើពីក្រមួនចំនួន១អង្គដាក់ក្នុងឆ្នាំងដីធំមួយជាមួយអំបោះឆៅបញ្ចុះក្នុងដី។ ការប្រគល់វត្ថុទាំងនេះ ធ្វើឡើងនៅថ្ងៃទី១១ ខែឧសភាតាមរយៈមជ្ឈមណ្ឌលអន្តរជាតិស្រាវជ្រាវ និងតម្កល់ឯកសារអង្គរ។
រូបភាពដោយ អាជ្ញាធរជាតិអប្សរា
នេះមិនមែនជាលើកទី១ទេ ដែលសាលាបារាំងចុងបូព៌ា បានប្រគល់បុរាណវត្ថុ រកឃើញនៅប្រាសាទមេបុណ្យខាងលិច ជូនអាជ្ញាធរជាតិអប្សរា គ្រាន់តែលើកនេះ វត្ថុបុរាណដែលបានប្រគល់ជូនមានចំនួនច្រើនជាងពេលមុនៗ។ នេះបើតាមលោក ទិន ទីណា អនុប្រធានមជ្ឈមណ្ឌលអន្តរជាតិស្រាវជ្រាវ និងតម្កល់ឯកសារអង្គរ។
រូបភាពដោយ អាជ្ញាធរជាតិអប្សរា
លោក ទិន ទីណា អះអាងទៀតថា ក្រៅពីសាលាបារាំងចុងបូព៌ា ស្ថាប័នផ្សេងៗក៏តែងប្រគល់វត្ថុបុរាណ ឱ្យអាជ្ញាធរជាតិអប្សរាដែរ បន្ទាប់ពីបានរកឃើញក្នុងអំឡុងពេលជួសជុល និងស្រាវជ្រាវក្នុងរមណីយដ្ឋានអង្គរ។ ទន្ទឹមនឹងនេះ ស្ថាប័នអន្តរជាតិទាំងអស់ដែលកំពុងបំពេញការងារជួសជុលប្រាសាទ និងសិក្សាស្រាវជ្រាវនៅតំបន់អង្គរ តែងប្រគល់បុរាណវត្ថុ ដែលរកឃើញជូនមកអាជ្ញាធរជាតិអប្សរា ក្រោយពេលសិក្សារួច។ បើស្ថាប័នអន្តរជាតិ មានចង់សិក្សាពីវត្ថុសិល្បៈទាំងនោះបន្ថែម គឺតម្រូវឱ្យស្នើសុំការអនុញ្ញាតសិន។ នេះបើតាមការបន្ថែមរបស់ លោក ទិន ទីណា អនុប្រធានមជ្ឈមណ្ឌលអន្តរជាតិស្រាវជ្រាវ និងតម្កល់ ឯកសារអង្គរ។
រូបភាពដោយ អាជ្ញាធរជាតិអប្សរា
សូមបញ្ជាក់ថា ប្រាសាទមេបុណ្យខាងលិច ត្រូវបានកសាងឡើងនៅពាក់កណ្តាលសតវត្សទី១១ ដោយព្រះបាទឧទយាទិត្យវរ្ម័នទី២ ចន្លោះឆ្នាំ១០៤៩-១០៦៦ នៅលើកោះតូចមួយកណ្តាលបារាយណ៍ទឹកថ្លា ដើម្បីឧទ្ទិសថ្វាយព្រះនរាយណ៍៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com