ដោយ៖ សុង សុធាវី

ភ្នំពេញ៖ ប្ដីប្រពន្ធមួយគូ នៅស្រុកសំរោងទង ខេត្តកំពង់ស្ពឺ បានប្រមូលទិញសំរាមប្លាស្ទិក ច្នៃជាគ្រាប់ជ័រ។ អ្នកស្រី ដួង ឆេងហួ ម្ចាស់សិប្បកម្ម Collect Plastic បានឱ្យដឹងថា  ក្នុងមួយសប្តាហ៍ អ្នកស្រី អាចផលិតគ្រាប់ជ័របានជិតពីរតោន និងលក់បាន ៥០០ដុល្លារក្នុងមួយតោន។

ដើម្បីជ្រាបកាន់តែច្បាស់ សូមលោកអ្នកនាងទស្សនាបទសម្ភាសន៍រវាងកញ្ញា សុង សុធាវី អ្នកសម្របសម្រួលកម្មវិធី «គំនិតថ្មី»  ជាមួយ អ្នកស្រី ដួង ឆេងហួ ម្ចាស់សិប្បកម្ម Collect Plastic ដូចតទៅ៖
 
 
អ្នកស្រី ដួង ឆេងហួ បើកអាជីវកម្មនេះ ព្រោះចិត្តស្រឡាញ់បរិស្ថាន  ពិសេសគិតគូរ ពីផលប៉ះពាល់សំរាមប្លាស្ទិកចំពោះបរិស្ថាន។  រយៈពេលជិត១ឆ្នាំមកនេះ អ្នកស្រី ដួង ឆេងហួ បានប្រមូលទិញសំរាមប្លាស្ទិក ជាច្រើនតោនក្នុងមួយថ្ងៃៗ ដើម្បីកែច្នៃជាគ្រាប់ជ័រ។ គ្រាប់ជ័រនេះ អាចផលិតជា កញ្រ្ចែងជ័រ ចានជ័រ ធុង និងបាល់ជ័រជាដើម។ 

អ្នកស្រី ដួង ឆេងហួ បានបញ្ជាក់ដូច្នេះ៖« ខ្ញុំបានប្រមូលទិញសំរាមប្លាស្ទិក ឬ ថង់ដាច់ រហែក ខូច ពីខេត្តនានា ក្នុងមួយគីឡូចាប់ពី៣០០ ទៅ៥០០ រៀល។ បន្ទាប់មក យកទៅចម្រាញ់តាមដំណាក់កាល ទម្រាំតែកើតចេញជា គ្រាប់ជ័រ»។ 


អ្នកស្រី ដួង ឆេងហួ  និងស្វាមី ក្នុងបទសម្ភាសន៍ ក្នុង កម្មវិធី «គំនិតថ្មី»

ទម្រាំតែទទួលបានគ្រាប់ជ័រ ដែលមានគុណភាពល្អ និងស្របតាមតម្រូវការរបស់អតិថិជនអ្នកស្រី ឆេងហួ និងស្វាមី ឆ្លងកាត់បទពិសោធន៍លំបាកជាច្រើន។  អ្នកស្រី ឆេងហួ បានបញ្ជាក់ដូចច្នេះ៖ «អាជីវកម្មប្រភេទនេះ ទម្រាំតែផលិតចេញជាគ្រាប់ជ័រ ដែលត្រូវតាមស្តង់ដារនាំចេញ ទាមទាឱ្យមានចិត្តស្រឡាញ់តស៊ូខ្លាំង ជាមួយនឹងក្លិនស្អុយរបស់ថង់សំរាមគ្រប់ប្រភេទ ហើយវាក៏ប៉ះពាល់ដល់សុខភាពផងដែរ»៕ 


 
គ្រាប់ជ័រ ផលិតរួចហើយ