ដោយ៖ សុង សុធាវី

ភ្នំពេញ៖  អ្នកដែលមានចំណេះដឹងហិរញ្ញវត្ថុ គឺជាអ្នកដែលចេះចាត់ចែងលុយកាក់ប្រចាំថ្ងៃបានត្រឹមត្រូវ ចំណាយត្រូវតម្រូវការ។ នេះជាការលើកឡើងរបស់អ្នកស្រី ប៉ែន បុប្ផា នាយិកាក្រុមហ៊ុឫទ្ធិពល។ ក្នុងនាមជាអ្នកបណ្តុះបណ្តាលចំណេះដឹងហិរញ្ញវត្ថុមួយរូបផងនោះ អ្នកស្រី ប៉ែន បុប្ផា ក៏បានគូសបញ្ជាក់ដែរថា អ្នកដែលមានចំណេះដឹងផ្នែកហិរញ្ញវត្ថុ ក៏អាចអាចគេចផុតពីបញ្ហាបំណុលដែលកើតឡើងពីការចាយខុសគោលដៅ ឬគេចផុតពីបំណុលវណ្ឌកផងដែរ។

 

ដើម្បីជ្រាបកាន់តែច្បាស់ សូមលោកអ្នកនាងទស្សនាបទសម្ភាសន៍ រវាងកញ្ញា សុង សុធាវី អ្នកសម្របសម្រួល កម្មវិធី «គំនិតថ្មី»  និង អ្នកស្រី ប៉ែន បុប្ផា ដូចតទៅ៖
 
 
​អ្នកស្រី ប៉ែន បុប្ផា នាយិកាក្រុមហ៊ុឫទ្ធិពល និងជាអ្នកបណ្តុះបណ្តាលចំណេះដឹងហិរញ្ញវត្ថុបានបញ្ជាក់ថា ចំណេះដឹងហិរញ្ញវត្ថុ គឺជាផ្នែកមួយនៃជីវិត ហើយអ្នកដែល​មាននូវចំណេះដឹងទាក់ទងនឹងហិរញ្ញវត្ថុ ​គេនឹងអាចចាត់ចែង ទុកដាក់លុយកាក់បានត្រឹមត្រូវ ​ចៀសផុតពីបំណុលវណ្ឌក។ អ្នកស្រី បានលើកឡើងដូច្នេះ នៅក្នុងកិច្ចសម្ភាសជាមួយកម្មវិធី«គំនិតថ្មី»នៃសារព័ត៌មានថ្មីៗ។
 
«ទាំងអស់គ្នា សុទ្ធតែត្រូវការចាយលុយ អ៊ីចឹងយើងគួរតែត្រូវចាប់ផ្តើមមានចំណេះដឹង​រឿងលុយកាក់ ចំណេះដឹងហិរញ្ញវត្ថុ កាន់តែឆាប់ កាន់តែល្អ។ នៅពេលដែលគាត់នៅតូច ឱ្យគាត់យល់ថា តើលោកពុកអ្នកម៉ែគាត់ ធ្វើម៉េចបានលុយយកមកចិញ្ចឹមគាត់? អ៊ីចឹងគាត់ត្រូវប្រើប្រាស់លុយដែលឪពុកម្តាយឱ្យហ្នឹងបែបណា? បើឱ្យទៅសាលា ត្រូវយកទៅទិញអី? យកទៅប្រើម៉េច? ហើយត្រូវសន្សំ។ អ៊ីចឹងបន្តិចម្តងៗ គាត់អាចយល់ពីរបៀបចាត់ចែងលុយកាក់»។ អ្នកស្រី ប៉ែន បុប្ផា បានបញ្ជាក់ដូច្នេះ។
 
​​នៅក្នុងកិច្ចសម្ភាសដដែល សហគ្រិនរូបនេះ  បានលើកទឹកចិត្តពលរដ្ឋខ្មែរ ចាប់ផ្តើម​រៀបចំផែនកា​រសម្រាប់ជីវិត និងគិតគូរឱ្យល្អិតល្អន់ទៅលើការចំណាយដែលជាតម្រូវការចាំបាច់ និងចំណាយលើតម្រូវការបន្ទាប់បន្សំ។ លើសពីនេះ អ្នកស្រី ក៏ជំរុញឱ្យ​អាណាព្យាបាល គួរចេះបង្រៀន និងលើកទឹកចិត្តកូនតូចៗ​ឱ្យមានទម្លាប់​សន្សំលុយផងដែរ។ ស្រ្តីវ័យ៣៩ឆ្នាំរូបនេះ បញ្ជាក់ដូច្នេះ៖ «ចំណេះដឹងផ្នែកហិរញ្ញវត្ថុ គឺពិតជារឿងដ៏សំខាន់ហើយ​មនុស្សគ្រប់គ្នា គួរ​តែបង្កើនការយកចិត្តទុកដាក់ ពិសេសយុវជនកម្ពុជា ដែលជាធនធានមនុស្សរបស់ប្រទេស និងក្លាយទៅជាឪពុកម្តាយគេទៅថ្ងៃក្រោយ។ ពួកគាត់អាចនឹងក្លាយទៅជាជនរងគ្រោះ ដោយសារលុយ ឬបំណុលទៅវិញ»៕