ក្រុមហ៊ុនមួយនៅបាត់ដំបង ប្រមូលទិញស្វាយ ម្នាស់ ក្រូច ប្រមាណ៣០០តោនរាល់ខែ កែច្នៃជាតំណាប់
ដោយ៖ សុង សុធាវី
ភ្នំពេញ៖ ក្រុមហ៊ុន មិសុតា ហ្វូដ បានដំណើរការរោងចក្រផលិតផ្លែឈើសម្ងួត ដែលមានទីតាំងក្នុងសង្កាត់អូរចា ក្រុងបាត់ដំបង ខេត្តបាត់ដំបង រយៈពេល៤ឆ្នាំហើយ។ មិនត្រឹមតែចង់បង្ហាញគុណភាពតំណាប់ផ្លែឈើខ្មែរ តែនៅក្នុងស្រុកនោះទេ ក្រុមហ៊ុននេះ ក៏ប្រឹងប្រែងពង្រីកទីផ្សារផលិតផលខ្លួននៅក្រៅប្រទេសដែរ ពិសេសជំរុញការនាំចេញទៅប្រទេសជប៉ុន។ លោក ផល រតនា អ្នកគ្រប់គ្រងការផ្សាយពាណិជ្ជកម្មរបស់ក្រុមហ៊ុន មិសុតា បានប្រាប់កម្មវិធី«គំនិតថ្មី»នៃសារព័ត៌មានថ្មីៗថា ក្រៅពីផ្តល់កាងារដល់ពលរដ្ឋក្នុងខេត្តបាត់ដំបងប្រមាណ៥០នាក់ ក្រុមហ៊ុនកែច្នៃផ្លែឈើសម្ងួតនេះ ក៏អាចប្រមូលទិញផ្លែឈើតាមរដូវកាល ពីប្រជាកសិករក្នុងខេត្តបាត់ដំបង ពី២០០-៣០០តោន ក្នុងមួយខែៗដែរ។ ទោះយ៉ាងណា បរិមាណនៃការប្រមូលផ្លែឈើពីកសិករក៏ប្រែប្រួលដែរ អាស្រ័យលើតម្រូវការរបស់អតិថិជន ។
ដើម្បីជ្រាបកាន់តែច្បាស់ សូមលោកអ្នកនាងទស្សនាបទសម្ភាសន៍រវាង កញ្ញា សុង សុធាវី
អ្នកសម្របសម្រួល កម្មវិធី «គំនិតថ្មី» និង លោក ផល រតនា ដូចតទៅ៖
https://fb.watch/99-DmjhKhW/
លោក ផល រតនា អ្នកគ្រប់គ្រងផ្នែកផ្សព្វផ្សាយពាណិជ្ជកម្ម ក្រុមហ៊ុន មិសុតា ហ្វូដ បានបញ្ជាក់ថា ក្នុងមួយខែៗ ក្រុមហ៊ុន អាចជួយទិញផ្លែឈើមួយចំនួនដូចជា ស្វាយ ម្នាស់ ក្រូចពោធិ៍សាត់ ពី២០០ ទៅ៣០០តោន ពីប្រជាកសិករក្នុងខេត្តបាត់ដំបង ដើម្បីយកមកកែច្នៃជាតំណាប់ផ្លែឈើ។ បើតាមលោក ផល រតនា បរិមាណនេះ ក៏អាចប្រែប្រួលដែរ អាស្រ័យលើការបញ្ជាទិញ និងតម្រូវការរបស់អតិថិជន។ ក្នុងបទសម្ភាសន៍ជាមួយកម្មវិធី «គំនិតថ្មី» នៃសារព័ត៌មានថ្មីៗ លោក ផល រតនា បានគូសបញ្ជាក់ថា ក្រុមហ៊ុនតែគិតគូរទៅលើរសជាតិ ចំណូលចិត្តផ្សេងគ្នារបស់អតិថិជន ទាំងនៅអាស៊ី និងអឺរ៉ុប គឺត្រូវបត់បែន និងមានគំនិតច្នៃប្រឌិតថ្មី ប្លែកជានិច្ច។
លោក ផល រតនា អ្នកគ្រប់គ្រងផ្នែកផ្សាយពាណិជ្ជកម្មក្រុមហ៊ុន មិសុតា ហ្វូដ
បច្ចុប្បន្នផលិតផលរបស់ក្រុមហ៊ុនមិសុតាហ្វូដ មិនត្រឹមតែផ្គត់ផ្គង់នៅទីផ្សារក្នុងស្រុកនោះទេ ប៉ុន្តែក៏ត្រូវបាននាំចេញទៅទីផ្សារបរទេសមួយចំនួនដែរ ពិសេសទីផ្សារប្រទេសជប៉ុន។ នេះបើតាមលោក ផល រតនា ដោយលោកបានឱ្យដឹងទៀតថា ទម្រាំតែមានការទទួលស្គាល់នូវស្តង់ដារគុណភាព ពីទីផ្សារប្រទេសជប៉ុន ក្រុមហ៊ុនមិសុតា បានបំពេញនូវលក្ខខណ្ឌជាច្រើន ទាំងសម្ភារៈប្រើប្រាស់ ដំណើរការផលិត និងការបណ្តាលបុគ្គលិក ដើម្បីធានាទាំងគុណភាព រសជាតិ និងសុវត្ថិភាពផលិតផលខ្លួន៕
